ایمنسٹی انڈیا کا کہنا ہے کہ حکومت کے ذریعے اس کے بینک اکاؤنٹس منجمد کرنے کے سبب اس کو اپنا کام روکنا پڑ رہا ہے
نئی دہلی، ستمبر 29: حقوق کی تنظیم ایمنسٹی انڈیا کا کہنا ہے کہ اس نے گذشتہ دو سالوں سے جاری حکومتی کریک ڈاؤن اور حکومت کے ذریعے اس کے بینک کھاتوں کو منجمد کرنے کی وجہ سے اپنی کاروائیاں بند کردی ہیں۔
ایمنسٹی انٹرنیشنل انڈیا کا کہنا ہے کہ حکومت کی ’’مسلسل متعصبانہ‘‘ کارروائیوں کے سبب وہ ہندوستان میں کام روک رہا ہے۔
#NEWS: Amnesty International India Halts Its Work On Upholding Human Rights In India Due To Reprisal From Government Of Indiahttps://t.co/W7IbP4CKDq
— Amnesty India (@AIIndia) September 29, 2020
حقوق گروپ نے کہا کہ وزیر اعظم نریندر مودی کی حکومت نے ان کے ہندوستانی دفتر کا بینک اکاؤنٹ منجمد کر دیا ہے اور انھیں اس پر مجبور کیا ہے کہ وہ ہندوستان میں عملے کو چھوڑ دیں اور مہم اور تحقیقی کام کو روک دیں۔
ایمنسٹی انٹرنیشنل انڈیا کے ایگزیکٹو ڈائریکٹر اویناش کمار نے ایک بیان میں کہا کہ ’’پچھلے دو سالوں سے ایمنسٹی انٹرنیشنل انڈیا پر مسلسل کریک ڈاؤن اور اس کے بینک اکاؤنٹس کو مکمل طور پر منجمد کرنا حادثاتی نہیں ہے۔‘‘
حکومت نے ابھی تک اس معاملے میں کوئی بیان جاری نہیں کیا ہے۔