شاید کہ اتر جائے ترے دل میں مری بات

سماجی برائیوں پر کنٹرول کے لیے کچھ قابل عمل تجاویز

تاریخ اشاعت - 18 مارچ، 2021

رضوان حسین ، دبئی

گزشتہ چند دنوں سے احمد آباد کی عائشہ کی خود کشی کے واقعے کے تناظر میں ہمارے اہل دانش کا حسب سابق روایتی رد عمل سامنے آیا۔ کسی نے اسلام میں خود کشی کی قباحت پر گفتگو کی تو کوئی جہیز کے موضوع پر اپنا غصہ اُتارتا ہوا نظر آیا۔ کسی نے صبر نہ کرنے اور اپنے شوہر کی اذیت نہ برداشت کرنے پر مرنے والی لڑکی کو ہی قصو روار ٹھیرایا۔ لیڈروں کی لمبی لمبی تقریریں، سیاست دانوں کے جذباتی بیانات، خطباء اور علماء کے خطبے اس بار بھی سننے کو ملے۔
ایسا ہر واقعے اور سانحے کے بعد ہوتا ہے۔ لیکن سوال یہ ہے کہ آخر اِس طرح کا طرز عمل کب تک چلے گا۔ کب تک اپنی نااہلی، کمزوری اور اپنی انا کے دفاع کے لیے جہیز کو اور آج کی کم ہمت نئی نسل کو قصور وار ٹھہرا کر ملت بری الذمہ ہو جائے گی۔ کاش کہ سماج سے نا امید اس مسکراتی لڑکی کے وہ آخری الفاظ کہ ’’اللہ سے دعا کرتی ہوں کہ اب دوبارہ انسانوں کی شکل کبھی نہ دکھائے’’ ہماری ملت کے ٹھیکیدار، سیاست دان، قاضی حضرات، جماعتوں، انجمنوں کی نیندیں اڑا دیتیں۔ غموں کے پہاڑ میں دبی اس لڑکی کا انسانوں سے بیزاری کا حقیقی سبب تلاش کرتیں۔ وہ سماج میں تبدیلی لانے کے سلسلے میں غور کرتے۔ لیکن ایسا نہیں ہوا۔ پتہ نہیں اور کتنی عائشائیں یونہی نذر آب ہو جائیں گی۔ ہر کوئی مرض پر گفتگو کر رہا ہے۔ کن وجوہ کی بنا پر یہ مرض لاحق ہوا اس پر کوئی بات نہیں کرتا۔ مستقبل میں اِس طرح کے اقدامات سے نئی نسل کو بچانے کے لیے کیا تبدیلی لائی جانی چاہیے اور لائی جاسکتی ہے ہمیں اس پر توجہ مرکوز کرنی ہوگی۔ اگر آج اس پر سخت اقدام کیے جائیں گے تبھی ہم اللہ کے یہاں منھ دکھانے کے قابل ہو سکیں گے۔ کیوں نہ ہم مل کر کچھ ایسے اقدام کریں کے مستقبل میں کوئی عائشہ نا امید ہو کر انتہائی قدم نہ اٹھائے۔ ذیل میں چند مشورے ارباب حل و عقد کی خدمت میں پیش ہیں۔ع؎ شاید کہ اتر جائے ترے دل میں مری بات۔
1۔ قاضی حضرات سختی کے ساتھ طے کریں کہ وہ کسی ایسے نکاح کی تقریب کا حصہ نہیں بنیں گے جہاں جہیز کی ریل پیل ہو اور جہاں لڑکے اور لڑکی کے خاندانوں کی بے جا شان و شوکت کی نمائش ہو۔ ایسے لوگ اپنے بیٹوں کے نکاح کے لیے قاضی یا مولوی کے نہ ملنے پر مجبور اور پریشان ہوجائیں۔ اِس کی عمل آوری کے لیے وقف بورڈ اور مسلم پرسنل لا بورڈ کو اپنا بھر پور رول ادا کرنا ہو گا۔
2۔ مساجد کے ذمہ داران طے کریں کہ مسجدوں میں کسی ایسے خاندان کو نکاح کی تقریب منعقد کرنے نہ دی جائے جو جہیز لینے اور دینے والا ہو۔اگر ایسا ہے تو مولوی یا قاضی حضرات ان کا نکاح نہ پڑھائیں۔
3۔تنظیمیں، جماعتیں اور انجمنیں نوجوانوں کے لیے نکاح سے پہلے کونسلنگ کے سیشن چلائیں، جس طرح عازمینِ حج کی سفرِ حج پر جانے سے پہلے تربیت کا نظم کیا جاتا ہے، ان تنظیموں کی عالی شان عمارتوں کے کسی کونے، کمرے میں ایسا کوئی گوشہ ضرور مختص ہو جہاں مظلوم بہنوں اور ازدواجی مسائل کے حل کے لیے کونسلرس اور ماہرین نفسیات دستیاب ہوں۔ یہ چھوٹا سا کم خرچ والا کام وسیع وسائل کی حامل تنظیمیں اور جماعتیں ضرور کر سکتی ہیں۔ آج ہندوستان کی عدالتوں میں لاکھوں گھریلو مسائل کے معاملے زیر التوا ہیں جہاں کم علم مسلمان صرف ایک سماعت کے منتظر ہیں۔ یہ ایسے مسائل ہیں جو ذی علم لوگوں کی معمولی رہنمائی اور ہمت افزائی سے حل کیے جا سکتے ہیں۔ یہ مسائل حل نہ ہونے کی وجہ سے لاکھوں زندگیاں اجیرن بنی ہوئی ہیں۔ کاش یہ تنظیمیں ہوش کے ناخن لیں اور اِس نہج پر کچھ اقدامات کریں۔
4۔ ماں باپ یہ طے کریں وہ اپنی لڑکی کو کسی ایسے گھر میں ہرگز نہیں بھیجیں گے جہاں جہیز کی مانگ ہو۔ یہ بات ہمیشہ یاد رکھیے کہ جہیز کی خیرات دے کر یہ سمجھنا کہ لڑکا یا اس کے گھر والے آپ کی لڑکی کو خوش رکھیں گے محض خام خیالی اور بہت بڑی غلط فہمی ہے۔ مشاہدے میں آیا ہے کہ کتنے ہی ایسے بھکاری سڑک کنارے مر جاتے ہیں جو درحقیقت لاکھوں کے مالک ہوتے ہیں، ان کی موت کے بعد اس راز سے پردہ اٹھتا ہے کہ مرنے والا ’’فقیر‘‘ تو کروڑ پتی تھا مگر مانگنے کی عادت سے مجبور تھا۔ خیراتی داماد بھی اسی طرح تمام عمر خیرات ہی کی توقع میں جیتا ہے۔
5۔ نکاح خواں اور قاضی حضرات اس بات کو یقینی بنائیں کہ ہر نکاح کرنے والے جوڑے اور اس کے والدین کو نکاح نامہ کو پڑھ کر اس کی اچھی طرح تفہیم کرائیں۔ ہر فرد کو ان کے حقوق و فرائض سے آگاہ کیا جائے۔ اس کے لیے ایک شارٹ ٹرم کونسلنگ سیشن بھی قاضی کی جانب سے ہونا چاہیے اور اِس ٹریننگ سیشن کی سند کو نکاح نامہ کے ساتھ مسلک کیا جانا چاہیے۔ اگر ہمارے معاشرے میں ایسا ہو جائے تو بہت سے مسائل پیدا ہونے سے پہلے ہی ختم ہو جائیں گے۔ تعلیم یافتہ نوجوان بھی بغیر پڑھے نکاح نامہ پر دستخط کر دیتے ہیں یہ جانے بغیر کہ یہ ان کی زندگی اور مستقبل کا اہم ترین ترین معاہدہ ۔
6۔ہمارے معاشرے کا ہر فرد اِس بات کو ہر زاویے سے نئی نسل کے ذہن نشین کرائے کہ اسلام میں نکاح صرف ایک سول کنٹریکٹ ہے، کوئی جنموں کا بندھن نہیں۔ یہ ایک انتہائی مضبوط کنٹریکٹ (قرآنی زبان میں میثاقِ غلیظ، یعنی پختہ معاہدہ) ہے، لیکن ناچاقی اور نااتفاقی (incompatibility) ایک فطری امر ہے۔ جہاں تک طرفین (شوہر اور بیوی) اِس معاہدے پر صبر و تحمل اور رواداری کے ساتھ عمل کر سکیں اور ساتھ رہیں۔ لیکن اگر علیحدگی ناگزیر ہو جائے تو اسلام نے ایگزٹ ڈور بھی دیا ہے، وہ بآسانی خلع اور طلاق لے سکتے ہیں۔ طلاق لے کر آئی ہوئی بیٹی کو ماں باپ اور بہن بھائی اپنائیت کا احساس دلائیں، نہ کہ اس کو بوجھ سمجھیں۔ یاد رکھیے اسلام میں طلاق شدہ بہن یا بیٹی کی کفالت کرنے والے کا بڑا اجر ہے۔
7۔ماں باپ خصوصاً لڑکیوں کو یہ احساس دلائیں کہ بیٹا اور بیٹی میں کوئی فرق نہیں ہے۔ وہ صرف اس کا نکاح کر رہے ہیں، نہ کہ کنیا دان؟ اسلام میں کوئی بھی باپ اپنی بیٹی کو خیرات میں نہیں دے سکتا۔ عورت یہاں با وقار طریقے سے اپنا مہر حاصل کر کے اپنے شوہر کے نکاح میں جاتی ہے۔ جس طرح بیٹے کو تعلیم کے بعد خود مختار بننے کے مواقع فراہم ہوتے ہیں اسی طرح ہر ماں پاب کا فرض ہے کہ ویسے ہی مواقع بیٹی کو بھی فراہم کریں تاکہ وہ مستقبل میں خود کو کسی پر بوجھ نہ سمجھے۔ ہمارے معاشرے کی ایک کڑوی حقیقت یہ ہے کہ ذہین اور با صلاحیت لڑکیاں باورچی خانوں کی نذر ہو جاتی ہیں جو نخلِ اسلام خدیجۃ الکبریؓ جیسی عظیم تاجرہ اور مدبرہ کے تعاون سے تناور درخت بنا اور جہاں نصیبہ بنت کعب جیسی عورتیں جنگوں میں مردوں کے شانہ بہ شانہ شامل رہیں۔ کیسی ستم ظریفی ہے کہ اسی مذہب کے ماننے والے عورتوں کے معاشی عروج کے قائل نہیں ہیں؟ ہماری بیٹیاں اور بہنیں اگر آج نا امیدی کی شکار ہو کر جان سے ہاتھ دھو بیٹھتی ہیں تو اس میں ہمارے معاشرے کی اس سوچ کا بھی دخل ہے۔
8۔ والدین اپنے بیٹوں کی بھی تربیت پر بھر پور توجہ دیں۔ اباحیت اور فحاشی کے اس دور میں اپنے بچوں کی کردار سازی پر توجہ دیں، یقینی بنائیں کہ ان کی جوانیاں بے داغ رہیں، وہ زنا کے قریب نہ پھٹکیں، صحیح عمر میں ان کی شادیوں کا انتظام کر دیں۔ جس نوجوان کا دِل کسی ایک عورت پر نہیں ٹکتا وہ پورے سماج کا مجرم ہے۔ اس بگاڑ میں سماجی ماحول کے ساتھ پرورش کا بھی رول ہے۔ والدین اپنے بیٹے کو نکاح کی اصل حقیقت اور بیوی کے اصل مقام کی بھی تعلیم دیں۔
یہ چند تجاویز تھیں۔ امت مسلمہ کے غیور اہل دانش ایسے کئی اور سخت اقدامات کر کے مستقبل کی کئی عائشاؤں کو بچا سکتے ہیں۔ ہمیں روایتی تقریریں، احتجاج اور نعرے بازی سے بڑھ کر کچھ عملی کام کرنے کی ضرورت ہے۔ اسلام کا صحیح فلسفہ نکاح ہمارے معاشرے میں رائج کرنے کی ضرورت ہے۔ ایسا نہ ہوا تو نہ جانے اور کتنی معصوم لڑکیاں اسی طرح خود کشی و خود سوزی کا راستہ اپنائیں گی۔ آپ کیا سمجھتے ہیں کہ یہ محض عائشہ کی پست ہمتی کا شاخسانہ تھا؟ کیا وہ نہیں جانتی تھی کے اسلام میں خود کشی حرام ہے؟ کیا آپ نے اس کے آخری لفظ نہیں سنے ’’مجھے دعاؤں میں یاد رکھنا، کیا پتہ جنت ملے یا نہ ملے‘‘ حقیقی جرم جہیز کی لعنت کا ہے اور اِس لعنتی رواج کو رائج ہوتا دیکھ کر خاموشی سے اپنی آنکھیں بند کرنے والے سماج کے ٹھیکیداروں کا ہے۔ ان ماں باپ کا ہے جو بیٹا اور بیٹی میں تفریق کرتے ہیں اور ان کے درمیان عدل کے ساتھ صحیح تعلیم و تربیت اور تعلیم کے بعد مستقبل کی رہنمائی نہیں کرتے۔

یہ بھی پڑھیں