جموں و کشمیر میں دہشت گردی سے متعلق معاملات کے لیے نئی ریاستی تحقیقاتی ایجنسی قائم کی گئی
نئی دہلی، نومبر 2: حکومت نے پیر کو اعلان کیا کہ جموں و کشمیر میں دہشت گردی سے متعلق معاملات کی تحقیقات اور ان پر مقدمہ چلانے کے لیے ایک نئی ریاستی تحقیقاتی ایجنسی ہوگی۔
ایک نامعلوم اہلکار نے دی انڈین ایکسپریس کو بتایا کہ اس ریاستی تحقیقاتی ایجنسی کو ایسے معاملات کی خصوصی تحقیقات کے لیے قائم کیا گیا ہے جو قومی تفتیشی ایجنسی کو نہیں بھیجے جاتے۔
جموں و کشمیر حکومت نے ایک بیان میں کہا ’’ایس آئی اے قومی تحقیقاتی ایجنسی اور دیگر مرکزی ایجنسیوں کے ساتھ تال میل کے لیے نوڈل ایجنسی ہو گی اور ایسے دیگر اقدامات کرے گی جو دہشت گردی سے متعلق مقدمات کی تیز رفتار اور موثر تفتیش اور پراسیکیوشن کے لیے ضروری ہوں۔‘‘
کرمنل انویسٹی گیشن ڈپارٹمنٹ کا سربراہ اس ریاستی تحقیقاتی ایجنسی کا ایسک آفیسیو ڈائریکٹر ہوگا۔
یہ ایجنسی غیر قانونی سرگرمیاں (روک تھام) ایکٹ، دھماکہ خیز مواد ایکٹ، اٹامک انرجی ایکٹ، اینٹی ہائی جیکنگ ایکٹ، بڑے پیمانے پر تباہی پھیلانے والے ہتھیاروں اور ان کی ڈیلیوری سسٹمز ایکٹ اور دیگر کے تحت درج مقدمات کو سنبھالے گی۔
جموں و کشمیر حکومت نے کہا کہ تھانوں کے انچارج افسران دہشت گردی سے متعلق معاملات کے بارے میں ریاستی تحقیقاتی ایجنسی کو فوری طور پر مطلع کریں گے۔
ڈائریکٹر جنرل آف پولیس کو یہ اختیار حاصل ہو گا کہ وہ تفتیش کے کسی بھی موقع پر کیس کو ایجنسی کے حوالے کر سکتا ہے۔
جموں و کشمیر حکومت نے کہا ’’ایسے معاملات میں جہاں تفتیش SIA کو منتقل نہیں کی جاتی ہے، PHQ [پولیس ہیڈکوارٹر] اس بات کو یقینی بنائے گا کہ SIA کو باقاعدگی سے، ترجیحاً پندرہ دن کی بنیاد پر تفتیش کی پیش رفت کے بارے میں مطلع کیا جائے۔‘‘
نئی ایجنسی کا اعلان اگست 2019 میں سابق ریاست کی خصوصی حیثیت کے خاتمے کے بعد سے مرکزی وزیر داخلہ امت شاہ کے جموں و کشمیر کے پہلے دورے کے ایک ہفتہ سے زیادہ کے بعد کیا گیا۔
کشمیر میں اکتوبر میں شہریوں کی ہلاکتوں کا ایک سلسلہ دیکھا گیا ہے۔ مہاجر مزدوروں سمیت 11 شہری عسکریت پسندوں کے ہاتھوں مارے گئے۔ مزاحمتی محاذ نے، جسے پاکستان میں قائم دہشت گرد گروپ لشکر طیبہ کی شاخ سمجھا جاتا ہے، زیادہ تر ہلاکتوں کی ذمہ داری قبول کی ہے۔