نئی دہلی ،25 اپریل :۔
راجستھان میں وزیر اعظم نریندر مودی کے ذریعہ کھل کر مسلمانوں کے خلاف اشتعال بیان پر ملک کی تمام اپوزیشن پارٹیاں تنقید کر رہی تھیں اور الیکشن کمیشن کی خاموشی پر سوال ٹھا رہی تھیں مگر اتنی تاخیر کے بعد بالآخر کمیشن بیدار ہوا اور وزیر اعظم کو نوٹس جاری کیا ۔لیکن کمیشن نے اس میں حکمراں جماعت کی وفاداری کو بھی ملحوظ رکھا ہے وزیر اعظم کے ساتھ راہل گاندھی کو بھی نوٹس جاری کیا ہے۔
رپورٹ کے مطابق مرکزی الیکشن کمیشن نے اب پی ایم مودی کے ساتھ ساتھ کانگریس لیڈر راہل گاندھی سے ان کے بیانات پر جواب طلب کرنے کا فیصلہ کیا ہے۔ الیکشن کمیشن نے دونوں رہنماؤں سے 29 اپریل کی صبح 11 بجے تک جواب طلب کیا ہے۔ اکیلا الیکشن کمیشن پی ایم مودی کو نوٹس بھیجنے کی ہمت نہیں کر سکا۔ اس لیے راہل کو بھی اس میں شامل کیا گیا۔ مسلمانوں اور کانگریس کو نشانہ بناتے ہوئے پی ایم مودی کا بیان بین الاقوامی میڈیا میں سرخیوں میں آیا تھا۔ سب نے اس سلسلے میں مودی اور الیکشن کمیشن سے سوال کیے تھے۔ کئی غیر ملکی میڈیا نے الیکشن کمیشن سے رائے مانگی تھی لیکن کمیشن خاموش رہا۔ راہل گاندھی کے خلاف بھی جب انہیں بی جے پی کا میمورنڈم ملا تو وہ فوراً سرگرم ہو گئے اور توازن برقرار رکھتے ہوئے دونوں لیڈروں کو نوٹس بھیجے۔
اس حوالے سے الیکشن کمیشن کے قوانین کے مطابق ای سی آئی ایسے معاملات میں عوامی نمائندگی ایکٹ کی دفعہ 77 کے تحت کارروائی کرتی ہے۔ جس میں پارٹی کے اسٹار کمپینر کے بیان پر تنازعہ پیدا ہونے کے بعد پہلے قدم کے طور پر پارٹی صدور کو ذمہ دار ٹھہراتے ہوئے نوٹس بھیجا جاتا ہے۔ اس حوالے سے الیکشن کمیشن کے کسی رہنما کے خلاف قانونی کارروائی کا کوئی حق نہیں۔ لیکن اگر الیکشن کمیشن چاہے تو سٹار کمپینر کو براہ راست وارننگ دے سکتا ہے۔ یہاں یہ بتانا ضروری ہے کہ الیکشن کمیشن نے ابھی تک مودی کو 2024 میں ان کے کسی بھی بیان کے لیے براہ راست وارننگ نہیں دی ہے۔ لیکن انہوں نے راہل گاندھی کا ہیلی کاپٹر چیک کروایا۔ جبکہ آر جے ڈی کے تیجسوی یادو نے جے پی نڈا پر مبینہ بیگ کو ہوائی جہاز سے لے جانے کا الزام لگایا ہے۔ کانگریس نے بھی مودی اور امیت شاہ پر ایسے ہی الزامات لگائے ہیں لیکن الیکشن کمیشن نے مودی اور شاہ کے طیاروں کی جانچ نہیں کی۔خیال رہے کہ 2019 کے عام انتخابات میں ایک آئی اے ایس نے پی ایم مودی کے طیارے کی تلاشی لے کر ایسی بے باکی دکھائی تھی، اسے الیکشن کمیشن نے معطل کر دیا تھا۔