فاروق عبداللہ نے جموں و کشمیر میں اپنے ایم پی فنڈ سے کورونا وائرس سے نمٹنے کے لیے ایک کروڑ روپے جاری کیے
سرینگر، مارچ 21: رکن پارلیمنٹ اور جموں و کشمیر نیشنل کانفرنس کے صدر ڈاکٹر فاروق عبد اللہ نے ہفتہ کے روز اپنے سرینگر کے حلقے میں کورونا وائرس کا مقابلہ کرنے کے لیے اپنے ممبر پارلیمنٹ فنڈ سے ایک کروڑ روپے جاری کیے۔ شاید وہ ملک کے پہلے ایسے ممبر پارلیمنٹ ہیں جنھوں نے COVID-19 سے نمٹنے کے لیے فنڈز جاری کیے ہیں۔
ان کی پارٹی نے اپنے آفیشیل ٹویٹر ہینڈل پر لکھا ’’اس میں سے ایس کے آئی ایم ایس سرینگر کے لیے 50 لاکھ روپے اور بڈگام اور گندربل اضلاع کے لیے 25-25 لاکھ روپے مختص کیے گئے ہیں۔‘‘
انھوں نے جنوبی اور شمالی کشمیر سے تعلق رکھنے والے اپنی پارٹی کے دیگر ممبران پارلیمنٹ سے بھی کہا ہے کہ وہ اپنے اپنے انتخابی حلقوں میں مقامی سطح پر اس وبا پر قابو پانے کے لیے فنڈز جاری کریں۔
Party president and MP Srinagar Dr Farooq Abdullah today released an amount of Rs 1 Cr to combat #COVID19 threat in J&K from his MPLAD. Out of this, Rs 50 lakh has been earmarked for SKIMS Srinagar and Rs 25 lakh each for Budgam and Ganderbal districts. pic.twitter.com/faUhZuJfYZ
— JKNC (@JKNC_) March 21, 2020
پارٹی صدر کی ہدایت کے مطابق اننت ناگ سے رکن پارلیمنٹ حسنین مسعودی نے بھی اپنے حلقے میں وبا کے خطرے سے نمٹنے کے لیے ایک کروڑ روپیے کی رقم جاری کی ہے۔ یہ رقم اننت ناگ، کولگام، شوپیاں اور پلوامہ اضلاع میں برابر برابر تقسیم کی جائے گی۔
ڈاکٹر فاروق عبد اللہ کو گذشتہ ہفتے ہی جیل سے رہا کیا گیا ہے، جب جموں و کشمیر حکومت نے پبلک سیفٹی ایکٹ (PSA) کے تحت ان کی نظربندی منسوخ کردی تھی۔ رکن پارلیمنٹ فاروق عبد للہ، دو سابق وزراے اعلیٰ سمیت ان سیکڑوں سیاسی رہنماؤں میں شامل تھے جنھیں گذشہ سال 5 اگست کو مرکز کے ذریعہ دفعہ 370 کی منسوخی کے بعد نظربند کر دیا گیا تھا۔
مرکزی وزارت صحت اور خاندانی بہبود کے مطابق جموں و کشمیر میں کورونا وائرس کے چار تصدیق شدہ مقدمات درج کیے گئے ہیں۔ جب کہ قومی سطح پر متاثرین کی تعداد 280 کو عبور کر چکی ہے۔