دہلی اقلیتی کمیشن نے شمال مشرقی دہلی کے پولیس چیف کو متاثرہ علاقوں میں پولیس کی مزید نفری بھیجنے اور دفعہ 144 لگانے کی ہدایت کی
نئی دہلی، فروری 25 — دہلی اقلیتی کمیشن نے منگل کی سہ پہر شمال مشرقی دہلی کے ڈپٹی کمشنر آف پولیس کو ہدایت کی کہ وہ تشدد سے متاثرہ علاقوں میں پولیس کی مزید نفری بھیجیں اور دفعہ 144 نافذ کیے رہیں جب تک کہ صورت حال معمول پر نہ آجائے، وہاں پھنسے ہوئے افراد کو منتقل کرنے کے لیے کوشش کریں اور زخمیوں کو جی ٹی بی ہسپتال، شاہدرہ جیسے اسپتالوں میں لے جائیں۔
شمال مشرقی دہلی کے متعدد علاقوں بشمول موج پور، کاروال نگر، سیلم پور، بابر پور، گونڈا، مصطفی آباد، گوکلپوری، جعفرآباد اور اشوک نگر میں پیر کی سہ پہر سے شدید تشدد دیکھا گیا ہے۔
منگل کی رات تک ایک پولیس اہلکار سمیت کم از کم 13 افراد ہلاک اور 50 سے زائد پولیس اہلکار اور 130 شہری زخمی ہوئے۔
دہلی اقلیتی کمیشن کے چیئرمین ڈاکٹر ظفر الاسلام خان نے ڈی سی پی شمال مشرقی دہلی کو اپنے نوٹس میں لکھا ’’آپ کا علاقہ 24 فروری 2020 سے جل رہا ہے… مسلح غنڈوں نے مختلف علاقوں میں پر امن مظاہرین کے ساتھ ساتھ عام شہریوں پر پستول، لاٹھی اور پتھراؤ وغیرہ کا استعمال کیا۔ بازاروں اور دکانوں کو نذر آتش کیا جارہا ہے، گھروں پر حملہ کیا گیا ہے، متعدد افراد سمیت ایک پولیس اہلکار ہلاک اور 60 سے زیادہ افراد شدید زخمی ہوئے ہیں۔‘‘
ڈاکٹر خان نے ڈی سی پی کو یہ بھی حکم دیا ہے کہ وہ تشدد کی تحقیقات کا آغاز کریں اور کمیشن کو ان معلومات کے ساتھ رپورٹ بھیجیں:-
۔ کپل مشرا کے خلاف کیا کارروائی کی گئی جس نے اتوار کو دہلی پولیس کو الٹی میٹم جاری کیا تھا؟
– علاقے سے باہر مسلح فسادیوں کے داخلے کو روکنے کے لیے کیا کارروائی کی گئی؟
– علاقے میں پتھر لے جانے والے ڈمپروں کے داخلے کو روکنے کے لیے کیا اقدامات کیے گئے اور اس کا ذمہ دار کون ہے؟
– شرپسند عناصر کو روکنے کے لیے کیا اقدامات اٹھائے گئے تھے جن کو لوگوں نے سڑک پر نوجوانوں کو کھینچتے ہوئے دیکھا تھا اور کپل مشرا کے خلاف کارروائی کے لیے موج پور پولیس اسٹیشن میں متعدد وکلا کی طرف سے درج شکایت پر کیا اقدامات اٹھائے گئے ہیں؟
کمیشن نے یہ بھی طلب کیا:-
۔ ان افراد کی فہرست جو تشدد کے دوران فوت ہوئے اور ان کی موت کے اسباب۔
– زخمی ہونے والے افراد کی فہرست اور ان کے زخمی ہونے کی وجوہات
– اس معاملے میں درج ایف آئی آر کی کاپیوں کے ساتھ فہرست بنائیں اور فسادیوں کے خلاف کارروائی کی جائے۔
کمیشن نے شمال مشرقی دہلی کے ڈی سی پی سے 6 مارچ 2020 تک اپنا جواب داخل کرنے کو کہا ہے۔
ڈاکٹر خان نے متنبہ کیا ہے کہ اگر ڈی سی پی اپنا جواب/ کاروائی کی گئی رپورٹ بروقت پیش کرنے میں ناکام رہے تو کمیشن کے ذریعہ مزید کارروائی عمل میں لائی جائے گی جو ایک عدالتی ادارہ ہے جس میں عدالتی اختیارات سول عدالت کے طور پر کام کرتے ہیں۔ صرف ہائی کورٹ کے ذریعہ کمیشن کے احکامات پر روک لگائی جا سکتی ہے۔
دہلی اقلیتی کمیشن نے لیفٹیننٹ گورنر کو بھی خط لکھا
ڈاکٹر خان نے دہلی کے لیفٹیننٹ گورنر کو ایک علاحدہ خط لکھا ہے جس میں ان سے درخواست کی گئی ہے کہ وہ دہلی پولیس کو متاثرہ علاقوں میں مزید نفری بھیجنے، فسادیوں کی گرفتاری اور ان کے خلاف قانونی کارروائی کا حکم دیں ااور علاقے سے باہر جانے کے خواہش مند رہائشیوں خاص طور پر زخمیوں کی مدد کریں۔
ڈاکٹر خا نے لکھا ’’جب میں آپ کو 25 فروری 2020 کی شام 4 بجے لکھ رہا ہوں، علاقے کے لوگ مجھے آگاہ کر رہے ہیں کہ ہنگامے جاری ہیں، بندوقیں استعمال کرنے والے مسلح غنڈوں کے ذریعے پورے علاقے پر حملہ کیا جارہا ہے۔ آج کل صدر ٹرمپ کے رخصت ہونے کے بعد صورت حال مزید خراب ہوسکتی ہے۔ براہ کرم اس پر فوری طور پر دیکھیں کیونکہ کسی تاخیر کے نتیجے میں زیادہ سے زیادہ جانی و مالی نقصان ہو گا۔‘‘
ادھر دہلی پولیس نے منگل کی رات شمال مشرقی دہلی کے متعدد علاقوں میں دفعہ 144 نافذ کردی۔ اس نے تشدد پر قابو پانے کے لیے دیکھتے ہی گولی مارنے کے احکامات بھی جاری کیے۔