نئی دہلی، اکتوبر 17: اے ایف پی نے پیر کو رپورٹ کیا کہ پاکستان کے سابق وزیر اعظم عمران خان نے ضمنی انتخابات میں قومی اسمبلی کی آٹھ میں سے چھ نشستوں پر کامیابی حاصل کی ہے۔
اتوار کو ہونے والے ضمنی انتخابات کو سابق کرکٹ اسٹار کے لیے مقبولیت کے امتحان کے طور پر دیکھا جا رہا تھا، جنھیں اپریل میں پارلیمنٹ میں عدم اعتماد کے ووٹ کے ذریعے عہدے سے ہٹا دیا گیا تھا۔
تاہم ان کی پاکستان تحریک انصاف پارٹی کو مجموعی طور پر نشستوں کے نقصان کا سامنا کرنا پڑا کیوں کہ اس نے پہلے تمام آٹھ حلقوں پر قبضہ کیا تھا۔ حکمران اتحاد کی رکن پاکستان پیپلز پارٹی نے اتوار کے انتخابات میں دیگر دو نشستوں پر کامیابی حاصل کی جو خان کی برطرفی کے بعد پاکستان تحریک انصاف کے تمام 131 قانون سازوں کے مستعفی ہونے کے بعد ہوئے تھے۔
اے ایف پی کی خبر کے مطابق پاکستان کے الیکشن کمیشن نے اب تک آٹھ حلقوں میں ضمنی انتخابات کا اعلان کیا ہے۔ پاکستان میں قومی اسمبلی کے انتخابات میں ایک امیدوار کی نشستوں کی تعداد کی کوئی بالائی حد نہیں ہے۔ تاہم یہ عام بات نہیں ہے کہ ایک امیدوار اتنی نشستوں پر الیکشن لڑے جتنی نشستوں پر خان نے مقابلہ کیا ہے۔
سابق وزیراعظم کو ایک کو چھوڑ کر تمام نشستیں ترک کرنا ہوں گی اور دیگر حلقوں میں نئے انتخابات کرائے جائیں گے۔ لیکن اتوار کے ضمنی انتخابات کے نتائج کو سیاسی تجزیہ کار ان قومی انتخابات کے لیے ایک نشان کے طور پر دیکھ رہے ہیں جن کا انعقاد اگلے سال اکتوبر تک ہونا چاہیے۔
خان کے سابق وزیر اطلاعات اور پاکستان تحریک انصاف کے مرکزی ترجمان فواد چوہدری نے کہا کہ نتائج سے ظاہر ہوتا ہے کہ ووٹرز نے نئے انتخابات کا مطالبہ کیا ہے۔
عہدے سے ہٹائے جانے کے بعد خان نے باقاعدگی سے ملک بھر سے ہزاروں کی تعداد میں ریلیاں نکالی ہیں۔ اپنی تقاریر میں انھوں نے الزام لگایا ہے کہ موجودہ وزیر اعظم شہباز شریف کی حکومت امریکہ کی قیادت میں ایک سازش کی وجہ سے برسراقتدار آئی ہے۔
اسلام آباد میں سینٹر فار ریسرچ اینڈ سیکیورٹی اسٹڈیز کے ایک تجزیہ کار امتیاز گل نے نتائج کے بعد پیر کو اے ایف پی کو بتایا کہ ’’مشترکہ اپوزیشن کے سامنے آٹھ میں سے چھ نشستیں جیتنا کوئی چھوٹی بات نہیں ہے۔ یہ ایک ایسی حقیقت کی نشان دہی کرتا ہے جو پورے حکمران اتحاد کے لیے تلخ ہو سکتی ہے… عمران خان کا بیانیہ اب بھی ملک بھر میں بہت سے لوگوں کو متاثر کر رہا ہے۔‘‘