اترپردیش کے کانپور میں جرائم پیشہ افراد سے مقابلے میں پولیس کے آٹھ اہلکار ہلاک، چار زخمی
لکھنؤ، جولائی 3: پی ٹی آئی کی خبر کے مطابق اتر پردیش کے کانپور میں جمعہ کے روز پولیس کے 8 اہلکاروں کو ایک جھڑپ کے دوران گولی مار کر ہلاک کردیا گیا۔ وہیں چار دیگر پولیس والے شدید زخمی ہوگئے۔ وزیر اعلی آدتیہ ناتھ نے اموات پر تعزیت کی اور ریاستی پولیس سے کہا کہ وہ مجرموں کے خلاف سخت کارروائی کرے۔
یہ انکاؤنٹر اس وقت ہوا جب پولیس ٹیم 2 جولائی اور 3 جولائی کی درمیانی رات ڈِکرو گاؤں میں ایک ہسٹری شیٹر وکاس دوبے کو گرفتار کرنے کی کوشش کر رہی تھی۔
اترپردیش کے ڈائریکٹر جنرل آف پولیس ایچ سی اوستھی نے کہا کہ دوبے اور اس کے لوگوں نے اس گاؤں کو جانے والے راستے میں رکاوٹیں لگا کر گھات لگا کر حملہ کیا۔ جیسے ہی پولیس اہلکاروں نے ناکہ بندی صاف کی اور گاؤں میں داخل ہوئے، شرپسندوں نے ایک عمارت کی چھت سے اندھا دھند فائرنگ شروع کردی۔ فائرنگ میں ایک ڈپٹی سپرنٹنڈنٹ آف پولیس، تین سب انسپکٹر اور چار کانسٹیبل ہلاک ہوگئے۔
اوستھی نے اے این آئی کو بتایا ’’دوبے کے خلاف دفعہ 307 کے تحت مقدمہ درج کیا گیا تھا۔ جوابی فائرنگ بھی ہوئی لیکن مجرموں اونچائی پر تھے۔ اس طرح ہمارے آٹھ آدمی ہلاک ہوگئے۔‘‘
Case under Sec 307 was lodged against history-sheeter Vikas Dubey, Police had gone to arrest him. JCBs were put up there which obstructed our vehicles. When Force got down, criminals opened fire. There was retaliatory firing but criminals were at a height, so our 8 men died: DGP pic.twitter.com/k8tuxPuWLc
— ANI UP (@ANINewsUP) July 3, 2020
اوستھی نے مزید کہا کہ اس واقعے کی تحقیقات کے لیے ایک فارنسک ٹیم انکاؤنٹر کی جگہ پر پہنچ گئی ہے اور اتر پردیش پولیس کے خصوصی ٹاسک فورس کو طلب کیا گیا ہے۔ ایڈیشنل ڈائریکٹر جنرل آف پولیس اور کانپور کے انسپکٹر جنرل بھی موقع پر موجود ہیں۔