ڈی این اے کو دریافت کرنے والے سائنسداں کے نام طب کا نوبیل ا نعام

نئی دہلی: دنیا کا اعلیٰ ترین انعام دینے والی سویڈن کی اسمبلی آف کیرولنسکا انسٹی ٹیوٹ نے شعبہ طب میں گراں قدر تحقیق کے لیے2022 کا نوبیل انعام اپنے ہی ملک کے سائنسدان سوانتے پابو کو دینے کا اعلان کردیا۔

واضح رہے کہ نوبیل کمیٹی ہر سال انعامات جیتنے والے افراد کے ناموں کا اعلان اکتوبر کے پہلے ہفتے میں شروع کرتی ہے۔

کمیٹی مجموعی طور پر 6 شعبوں طب، معاشیات، کیمسٹری، فزکس، ادب اور امن کے نوبیل انعامات دیتی ہے۔

اس سال نوبیل انعامات جیتنے والے افراد کے ناموں کے اعلانات کا سلسلہ 3 اکتوبر سے شروع ہوگیا ہے اور سب سے پہلے طب کے نوبیل انعام جیتنے والے خوش نصیب سائنسدان سوانتے پابو کے نام کا اعلان کیا گیا ہے۔

نوبیل کمیٹی کی جانب سے جاری بیان میں بتایا گیا کہ طب کا انعام سویڈن کے سائنسدان سوانتے پابو کو دیا گیا، جنہوں نے زمانہ قدیم کے انسانوں سے متعلق معلومات حاصل کرنے کا جدید طریقہ جسے ڈی این اے بھی کہا جاتا ہے، وہ دریافت کیا۔

سوانتے پابونے انسانی ارتقا اور جینز کو سمجھنے اور پڑھنے کا طریقہ دریافت کیا ہے۔انہوں نے ہزاروں سال پرانی ہڈی کے جینوم یا ڈی این اے کو سمجھنے کا جدید اور آسان طریقہ دریافت کیا، جس سے 40 ہزار سال پرانے انسانوں سے متعلق معلومات حاصل کرنا ممکن ہوسکا ہے۔

سوانتے پابو نے 40 ہزار سال قبل یورپ اور وسطی ایشیا میں پائے جانے والے انسانوں ‘نینڈر تھلز’ (Neanderthals) جن کی ساخت بندروں سے زیادہ ملتی جلتی تھی، ان کے ارتقا کو سمجھنے کا طریقہ دریافت کیا، یوں ان کے طریقے سے جدید دور کے انسانوں جنہیں سائنسی طور پر (Homo sapiens) کہا جاتا ہے اور پرانے دور کے انسانوں میں مماثلت کی تحقیقات کا بھی راستہ کھل گیا ہے۔

نوبیل کمیٹی نے اپنی ٹوئٹ میں بتایا کہ سوانتے پابو کو نوبیل انعام جیتنے کی خوشخبری صبح کو اس وقت دی گئی جب وہ کافی پی رہے تھے اور وہ خبر سن کر ششدر رہ گئے اور انہوں نے سب سے پہلے اپنی اہلیہ کے ساتھ یہ خوش کن خبر شیئر کی۔

سوانتے پابو کو رواں برس دسمبر کے پہلے ہفتے میں نوبیل انعام کی رقم اور ایوارڈ اسٹاک ہوم میں دیا جائے گا۔

نوبیل کمیٹی دوسرے نوبیل انعام کا اعلان 4 اکتوبر، تیسرے کا 5 اکتوبر جب کہ چوتھے انعام کا اعلان 6 اکتوبر کو کرے گی۔

کمیٹی نوبیل انعام کا اعلان 7 اکتوبر جب کہ معیشت کے نوبیل انعام کا اعلان آخر میں 10 اکتوبر کو کرے گی۔

گزشتہ برس طب کا نوبیل انعام تین سائنسدانوں کو دیا گیا تھا، 2021 کا نوبیل انعام جسمانی درجہ حرارت اور احساسات کو دریافت کرنے والے سائنسدانوں سان فرانسسکو کی یونیورسٹی آف کیلی فورنیا کے ڈاکٹر پروفیسر ڈیوس جولیس اور کیلی فورنیا کے اسکرپ ریسرچ انسٹی ٹیوٹ کے پروفیسر ڈاکٹر آرڈم پیٹاپوٹیم کو دیا گیا تھا۔