جین-زی کے دور میں مسلم نوجوان اپنی دینی و ملی شناخت کے ساتھ آگے بڑھیں
مسلم قیادت نوجوانوں میں قائدانہ صلاحیتیں پروان چڑھائے
حیدرآباد میں 22 نومبر کو آئی وائی ایم کی پہلی ریاستی یوتھ کانفرنس کا انعقاد
موجودہ دور میں عالمی اور ملکی منظر نامے پر ایک طائرانہ نظر ڈالنے سے یہ حقیقت سامنے آتی ہے کہ اکیسویں صدی میں دنیا تبدیلی اور انقلاب کی دہلیز پر کھڑی ہے۔ حالات جس برق رفتاری سے بدل رہے ہیں، اس کے نتیجے میں پوری دنیا میں ایک نیا بیانیہ ابھر کر سامنے آرہا ہے۔ دنیا کے اس بدلتے ہوئے منظرنامے میں جو رنگ نمایاں ہورہے ہیں ان میں نوجوان نسل سرفہرست ہے جسے ’جنریشن زی‘ (Gen Z) کا نام دیا گیا ہے۔
بنگلہ دیش سے سری لنکا تک، فرانس سے البانیہ تک اور امریکہ سے ہندوستان تک جاری مزاحمتی تحریکوں کی قیادت نوجوانوں کے ہاتھوں میں ہے۔ نوجوانوں کی جدوجہد اس وقت عالمی توجہ کا مرکز بنی ہوئی ہے۔ مختلف ممالک میں حکم رانوں کی مطلق العنانی نے نوجوانوں کے جذبات اور احساسات کو اس حد تک مشتعل کردیا کہ وہ اپنے مستقبل کی پروا کیے بغیر سڑکوں پر نکل آئے اور ان کے احتجاج نے حکومتوں کے ایوانوں میں لرزہ طاری کر دیا ہے۔ کہیں حکم رانوں کو اقتدار چھوڑ کر ملک سے فرار ہونا پڑا تو کہیں برسرِ اقتدار طبقہ عوام کے درمیان آنے سے بھی گھبرانے لگا۔
نوجوانوں کی یہ ناراضگی اور غصہ ان حکم رانوں کے خلاف ہے جنہوں نے ملکی خزانوں پر قبضہ کرکے اپنے ہی عوام کو نانِ شبینہ کا محتاج بنا دیا ہے۔ ایک طرف حکم راں اپنے عیش و عشرت کے محلات آراستہ کرتے رہے تو دوسری طرف غریب عوام دو وقت کی روٹی کے لیے ترستے رہے۔ جب ظلم، ناانصافی، تعصب، نفرت اور عناد حد سے بڑھ جاتے ہیں تو انقلاب کی آہٹ سنائی دینے لگتی ہے۔
دنیا کے گلوبل ولیج میں تبدیل ہو جانے کے بعد ایک مثبت تبدیلی یہ بھی آئی ہے کہ دنیا کے کسی بھی حصے میں رونما ہونے والے واقعے کے اثرات پوری دنیا میں محسوس کیے جاتے ہیں۔ آج نوجوانوں میں بے اطمینانی اور بے یقینی کی کیفیت ہر طرف دیکھی جا سکتی ہے۔ اعلیٰ تعلیمی ڈگریاں رکھنے کے باوجود نوجوان بے روزگار رہیں تو ان میں احساسِ محرومی پیدا ہونا فطری ہے۔ جب یہ احساس اپنی انتہا کو پہنچ جاتا ہے تو نظام کے خلاف احتجاج، مزاحمت اور بالآخر بغاوت کی صورت اختیار کرلیتا ہے۔
نوجوانوں کی ان تحریکوں کے پس منظر میں حکم رانوں کا وہ منفی رویہ کارفرما رہا ہے جس کے نتیجے میں نوجوان نسل کا حکومتوں پر سے اعتماد اور بھروسا اٹھ گیا اور وہ سراپا احتجاج بننے پر مجبور ہوگئے۔ تاہم، حکومتیں نوجوانوں کے مطالبات تسلیم کرنے کے بجائے ان کی تحریکوں کو کچلنے کی کوشش کرتی نظر آتی ہیں۔
    ہندوستان میں اس وقت قومی منظر نامے پر نوجوان جس انداز میں چھائے ہوئے نظر آرہے ہیں، آزادی کے بعد شاید پہلی مرتبہ ایسا منظر دیکھنے کو مل رہا ہے۔ آزادی کے 78 برسوں کے دوران بلا امتیاز ہر سیاسی جماعت نے نوجوانوں کا استحصال کیا۔ جن جماعتوں کو اقتدار میں آنے کا موقع ملا، انہوں نے نوجوانوں کو طفل تسلیاں دے کر بہلایا۔ پون صدی کے دوران ایک پوری نسل سیاست دانوں کے کبھی پورے نہ ہونے والے وعدوں کی زنبیل تھامے اپنی زندگی گزار گئی۔ لیکن اب نوجوانوں کا شعور بیدار ہوا ہے۔ انہوں نے اپنے دوست اور دشمن کو پہچان لیا ہے۔ انہیں یہ احساس بھی ہوگیا ہے کہ اگر جوانی کے قیمتی سال حصولِ تعلیم میں صرف کرنے کے باوجود بہتر روزگار میسر نہ ہو تو حکومت سے سوال کرنا اور اپنا حق مانگنا ضروری ہوجاتا ہے۔ یہی وجہ ہے کہ ملک میں نوجوانوں کی مزاحمتی تحریک کو تقویت حاصل ہوئی ہے۔
ملک کے نوجوان اب کسی ایک مخصوص مسئلے کے حل کے لیے احتجاج نہیں کر رہے ہیں بلکہ ملک اور قوم سے جڑے ہر مسئلے پر آواز اٹھا رہے ہیں۔ نیٹ-26 کے پرچے کے افشا کے بعد نوجوانوں نے مرکزی وزیر تعلیم دھرمیندر پردھان کے خلاف زبردست احتجاج کیا، جس کے نتیجے میں مرکزی وزیر کو بالآخر اپنی وزارت سے استعفیٰ دینا پڑا۔ اس کے بعد نوجوانوں نے چیف الیکشن کمشنر گیانیش کمار کی من مانی اور ان کے مبینہ غیرآئینی اقدامات کے خلاف آواز اٹھاتے ہوئے ان سے بھی عہدہ چھوڑنے کا مطالبہ کیا۔ اب یہ احتجاج ملک گیر تحریک کی شکل اختیار کرچکا ہے اور اپوزیشن جماعتوں نے بھی اس احتجاج کو منظم کرنے میں اپنی عافیت سمجھی ہے۔ اگر نوجوان ان تحریکوں کا حصہ نہ بنتے تو موجودہ حکومت اپنے موقف سے پیچھے نہ ہٹتی اور نہ ہی کسی میں یہ ہمت ہوتی کہ وہ ایک ظالم حکومت سے ٹکر لے سکے۔ یہ نوجوانوں کی قوت ہی ہے جس نے حکومت کو گھٹنے ٹیکنے پر مجبور کر دیا ہے۔ اعلیٰ تعلیم یافتہ نوجوان جب اپنے اضطراب اور بے چینی کو برداشت نہ کرتے ہوئے احتجاج پر اتر آتے ہیں، پولیس کی لاٹھیاں کھاتے ہیں اور بے جا مقدمات میں ماخوذ کیے جاتے ہیں تو یہ سوال بھی پیدا ہوتا ہے کہ اس ملک کے مسلم نوجوانوں کو ملک و ملت کے مستقبل کو سنوارنے اور اپنے حال و مستقبل کو بہتر بنانے کے لیے کیا کسی انقلابی اقدام کی ضرورت نہیں ہے؟ یہی وہ سوال ہے جس کا جواب ہر مسلم نوجوان کو تلاش کرنا ہے۔
اس میں کوئی دو رائے نہیں کہ مسلم نوجوان بھی نیٹ پیپر لیک کے خلاف چلائی گئی احتجاجی مہم کا حصہ رہے ہیں اور بڑی تعداد میں چیف الیکشن کمشنر کی برطرفی کی تحریک میں بھی شامل ہیں۔ کئی مسلم تنظیموں نے بھی الیکشن کمیشن کے خلاف مورچہ سنبھالا ہے۔ لیکن قومی منظر نامے پر مسلم نوجوانوں اور مسلم تنظیموں کا ذکر نمایاں انداز میں نہیں کیا جاتا۔ اس کی ایک اہم وجہ یہ ہے کہ مسلمان بھیڑ میں نعرے لگانے اور جھنڈے اٹھانے تک محدود ہوکر رہ گئے ہیں۔ اس طرزِ عمل کو بدلنا ہوگا اور ایک واضح حکمتِ عملی اختیار کرنی ہوگی۔
نوجوانوں کی جانب سے شروع کی گئی احتجاجی مہم ملک میں ایک بڑی تبدیلی کا پیش خیمہ بنتی جا رہی ہے۔ موجودہ دور نوجوانوں کا دور ہے۔ ہمارے ملک کی آبادی کا بڑا حصہ نوجوانوں پر مشتمل ہے اور ظاہر ہے کہ اس میں مسلم نوجوان بھی شامل ہیں۔ مسلم نوجوانوں کے ساتھ حکومتوں کا جو مخصوص رویہ ہے، اس سے نبردآزما ہونے کے لیے ان کے پاس کیا لائحۂ عمل ہے؟ شہریت ترمیمی قانون (سی اے اے) کے خلاف جن نوجوانوں نے احتجاج منظم کیا تھا، وہ آج جیلوں میں بند ہیں۔ انہیں طویل عرصے سے مقدمات کی سماعت اور عدالتی کارروائی میں تاخیر کے باعث قید و بند کی صعوبتیں برداشت کرنی پڑ رہی ہیں۔ ملک میں انصاف کے دوہرے پیمانے قائم ہوگئے ہیں۔ تعلیم اور روزگار کے شعبوں میں مسلم نوجوانوں کو جس امتیازی سلوک کا سامنا کرنا پڑ رہا ہے، وہ بھی ایک تلخ حقیقت ہے۔ مسلم آبادیوں میں اسکولوں اور کالجوں کے بجائے پولیس اسٹیشنوں کی تعداد بڑھتی جارہی ہے۔ عام مسلم نوجوان بھی حکومتی خفیہ ایجنسیوں کی نگاہ میں مشکوک شہری کی حیثیت رکھتا ہے۔
مسلم معاشرے کی صورتِ حال بھی دن بہ دن تشویش ناک ہوتی جا رہی ہے۔ حیدرآباد جیسے شہر میں، جہاں مسلمان بڑی تعداد میں آباد ہیں، جہاں مسلمانوں کی تہذیب و تمدن کا چرچا ہے اور جہاں لاتعداد مسلم تنظیمیں اور دینی مدارس موجود ہیں، روزانہ قتل کی وارداتیں پیش آرہی ہیں۔ المیہ یہ ہے کہ ان واقعات میں قاتل بھی مسلمان ہوتا ہے اور مقتول بھی مسلمان۔ یہ تاریخی شہر سماجی برائیوں کے دلدل میں پھنستا جا رہا ہے۔ شراب نوشی، جوا، سود، نوجوانوں کی بے راہ روی اور اخلاقی انحطاط جیسے مسائل مسلم معاشرے میں تشویش ناک حد تک سرایت کر چکے ہیں۔ مسلم نوجوانوں کا ایک طبقہ لا ابالی پن اور بے مقصد زندگی کا عادی ہوتا جا رہا ہے۔ ان کی تعلیم و تربیت کے لیے کوئی منظم نظام قائم نہیں ہے۔ سیاسی ہنگامے تو بہت ہوتے ہیں لیکن سیاسی جماعتیں تعلیم یافتہ مسلم نوجوانوں کو سیاسی نمائندگی دینے سے گریز کرتی ہیں۔
حالات کے اس تناظر میں جب کہ نوجوانوں کے ہاتھوں میں ملک اور قوم کی باگ ڈور آنے والی ہے، یہ سوال اہمیت اختیار کرجاتا ہے کہ مسلم نوجوانوں کا کردار کیا ہوگا؟ مسلم نوجوانوں کو نوشتہ دیوار پڑھتے ہوئے اپنے وطن اور اپنی ملت کی سربلندی کے لیے انقلابی اقدامات کرنے ہوں گے۔ اس کے لیے اجتماعی جدوجہد اور مخلصانہ کردار ناگزیر ہے۔ مسلم نوجوانوں کے لیے ایک متحدہ اور مضبوط پلیٹ فارم کا قیام وقت کا تقاضا ہے۔ اگر مسلم نوجوان اپنی دینی و ملی شناخت کے ساتھ آگے بڑھتے ہیں تو اس کے دور رس نتائج برآمد ہوسکتے ہیں۔ دوسروں کے پلیٹ فارم سے وابستہ ہوکر جدوجہد کرنے کی صورت میں ان کے استحصال کا اندیشہ رہے گا۔ ملک و قوم کی تعمیر و ترقی میں مؤثر کردار ادا کرنے کے لیے مسلم نوجوانوں کو اپنے ایجنڈے کے مطابق اپنی منزل کا تعین کرنا ہوگا۔ اس مقصد کے حصول کے لیے مختصر اور طویل مدتی منصوبہ بندی کرکے اس پر عمل درآمد ضروری ہے۔
2014 کے پارلیمانی انتخابات کے بعد ملک میں جن طاقتوں کے ہاتھوں میں اقتدار آیا ہے، ان کی اسلام اور مسلمانوں سے ازلی دشمنی کسی سے پوشیدہ نہیں۔ اسی ذہنیت کا نتیجہ ہے کہ یہ عناصر اسلامی شعائر کو برداشت کرنے کے لیے تیار نہیں۔ مساجد پر بلڈوزر چلانا، دینی مدارس کو بند کرنا، دینی جماعتوں پر غیرآئینی پابندیاں عائد کرنا اور اسلامی شریعت کو نشانہ بنانا اسی بیمار ذہنیت کی عکاسی کرتا ہے۔ کل تک عام مسلمانوں کو نشانہ بنایا جاتا تھا، اب اعلیٰ تعلیم یافتہ مسلم نوجوانوں پر دہشت گردی کے الزامات عائد کرکے ان کی زندگیاں اجیرن کی جا رہی ہیں۔ اگر مسلم نوجوان حالات کی اس سنگینی کا ادراک کرتے ہوئے ظلم و نا انصافی کے خلاف چٹان بن کر کھڑے ہو جائیں تو مسلم دشمن طاقتوں کو پسپائی اختیار کرنے پر مجبور کیا جاسکتا ہے اور اسلام و مسلمانوں کو مٹانے کی سازشوں کو ناکام بنایا جاسکتا ہے۔
مسلم نوجوانوں میں انقلابی روح بیدار کرنے کے لیے تین محاذوں پر تبدیلی ناگزیر ہے۔ سب سے پہلے مسلم نوجوانوں کو اپنی ذات میں مثبت تبدیلی لانی ہوگی۔ ان کے قول و فعل میں تضاد نہیں ہونا چاہیے۔ جب فرد بدلے گا تو ماحول کو بدلنے میں بھی دیر نہیں لگے گی۔ انفرادی تبدیلی کے بعد معاشرے میں اصلاح کے لیے اجتماعی جدوجہد کرنا ہوگی۔ مسلمانوں کے بہت سے مسائل کا تعلق معاشرتی رویوں سے ہے۔ معاشرتی اصلاح ہوجائے تو بہت سے معاملات میں قانون کا سہارا لینے کی ضرورت ہی باقی نہیں رہے گی۔ معاشرے میں صالح اقدار فروغ پائیں تو قتل و غارت گری اور دیگر سماجی برائیوں کی روک تھام ممکن ہے۔ مسلم معاشرہ دین کی تعلیمات پر عمل پیرا ہوجائے تو نوجوانوں کی بے راہ روی اور اخلاقی بے اعتدالی کا خاتمہ بھی ممکن ہوسکتا ہے۔
فرد اور معاشرے کی اصلاح کے بعد قومی سطح پر انسانی حقوق کا تحفظ، عام شہریوں کو انصاف کی فراہمی، نوجوانوں کے لیے روزگار کے مواقع، خواتین کی عفت و عصمت کا تحفظ، دستوری اور قانونی اداروں میں شفافیت، ملک میں قانون کی حکمرانی اور حکم رانوں میں جواب دہی کا احساس عام کرنے کے لیے مؤثر کردار ادا کیا جاسکتا ہے۔ ملک اس وقت جن گمبھیر مسائل سے دوچار ہے ان سے نجات دلانے میں مسلم نوجوان ایک تاریخی کردار ادا کر سکتے ہیں۔ مسلمانوں نے اس ملک کی آزادی کے لیے اپنی جانوں کی قربانیاں پیش کی ہیں۔ اب مسلم نوجوانوں کو ملک کی تعمیر و ترقی میں بھی ناقابلِ فراموش کردار ادا کرنا ہوگا۔ مسلم نوجوانوں میں قائدانہ صلاحیتیں پیدا کرنے کی ذمہ داری مسلم قیادت پر عائد ہوتی ہے۔ امت میں باصلاحیت اور مخلص نوجوانوں کی کوئی کمی نہیں ہے۔ چنانچہ قومی اور ملی حالات کے اسی پس منظر میں آئیڈیل یوتھ موومنٹ (آئی وائی ایم) کا قیام عمل میں آیا۔ اس کے قیام کا مقصد مسلم نوجوانوں کو اپنی ذات میں تبدیلی لانے، معاشرتی اصلاح اور ملک کی تعمیر و ترقی میں اپنی صلاحیتوں کا بھرپور مظاہرہ کرنے کے لیے تیار کرنا ہے۔ تنظیم کے زیرِ اہتمام 22 نومبر 2026، بروز اتوار نمائش میدان حیدرآباد میں پہلی ریاستی یوتھ کانفرنس بڑے پیمانے پر منعقد کی جا رہی ہے۔ امید ہے کہ یہ کانفرنس مسلم نوجوانوں میں حرکت و عمل کا نیا عزم و حوصلہ پیدا کرے گی اور ملک کی تعمیر و ترقی کے مختلف محاذوں پر ان کے کردار کو مؤثر اور نتیجہ خیز بنانے میں ایک سنگِ میل ثابت ہوگی۔