جھارکھنڈ انتخابات: کئی بوتھوں پر ای وی ایم خراب، دیر سے شروع ہوئی ووٹنگ

جھارکھنڈ اسمبلی الیکشن کے پہلے مرحلہ میں 13 سیٹوں پر آج ووٹ ڈالے جا رہے ہیں۔ ان سیٹوں پر وزیر صحت رام چندر چندرونشی، سابق وزیر برائے دیہی ترقی ددئی دوبے، سابق وزیر صحت بھانو پرتاپ شاہی اور سابق وزیر تعلیم بیدناتھ رام سمیت کئی مشہور ہستیوں کا وقار داؤ پر ہے۔ ان سیٹوں پر صبح 7 بجے سے ہی ووٹنگ شروع ہو چکی ہے جو کہ 3 بجے تک جاری رہے گی۔

پانکی اسمبلی کے بوتھ نمبر 106 گوراڈیہہ خاص میں مشین خراب ہونے کی وجہ سے اب تک ووٹنگ کا عمل شروع نہیں ہو سکا ہے۔ مشین بدلنے کی کوشش کی جا رہی ہے۔ اس کے علاوہ بوتھ نمبر 132 اتکرمت مدھیہ ودیالیہ کٹھوندھا میں دیر سے ووٹنگ شروع ہوئی۔ حسین آباد میں بھی بوتھ نمبر 97 پر ای وی ایم مین خرابی کے سبب ووٹنگ وقت پر شروع نہیں ہو پائی تھی، لیکن اب مشین بدلنے کے بعد لوگ اپنے حق رائے دہی کا استعمال کر رہے ہیں۔