عیدالفطریوم الاجر اعمال مسنونہ

تاریخ اشاعت - 27 اپریل، 2022

حمیراعلیم

اللہ تعالیٰ نے مسلمانوں کو دو خوشی کے دن عطا فرمائے ہیں عید الفطر اور عید الاضحٰی۔ عیدالفطر رمضان کے مہینے کے بعد یکم شوال کو منائی جاتی ہے۔جو مسلمان پورا مہینہ اللہ تعالیٰ کی عبادات اور فرمانبرداری میں مشغول رہ کر اس کی رحمتیں اور برکتیں سمیٹتے ہیں ان میں سے بیشتر چاند رات کو ہی ان سب پہ پانی پھیر دیتے ہیں۔چاند رات کو خریداری اور سڑکوں پہ ہلے گلے میں وہ نماز اور اخلاق سب بھلا دیتے ہیں اس کی وجہ یا تو لاعلمی ہے یا کوتاہی۔اس لیے آج ہم آپ کو عیدالفطر کو بمطابق سنت منانے کے طریقے بتاتے ہیں۔
1: غسل
’’علی رضی اللہ عنہ سے کسی نے غسل کے بارے میں سوال کیا تو آپ نے فرمایا۔
’’ اگر تم چاہو تو روز نہا سکتے ہو۔لیکن جمعہ، عرفہ کے دن اور عید الفطر پہ ضرور غسل کرو۔ )الشافعی مسند)
2: نیا لباس پہننااور سجنا سنورنا
البہیقی نافع سے مستند اسناد کے ساتھ روایت کرتے ہیں کہ
’’ عمر رضی اللہ عنہ عید کے دن نیا لباس زیب تن فرماتے تھے۔‘‘
شیخ ابن عثیمین فرماتے ہیں۔’’عید کے دن سجنا سنورنا سنت رسول صلی اللہ علیہ و آلہ و سلم ہے۔‘‘(الصلہ و ابواب فی صلوۃ العید صفحہ10)
3:خوشبو لگانا
ابن رجب الحنبلی کہتے ہیں۔’’میں نے امام مالک سے سنا ہے کہ علماء عید کے دن سجنے سنورنے اور خوشبو لگانے کو مستحب قرار دیتے ہیں۔‘‘ (ابن رجب6-68)
لیکن خواتین کو صرف گھر پہ ہی سجنا سنورنا اور خوشبو لگانا چاہیے۔ (الموسوع الفقیہہ)
اور انہیں عید گاہ میں مردوں میں شامل ہونے کی بجائے الگ جگہ پر نماز پڑھنا چاہیے ہے۔بعض لوگ خواتین کو نماز کیلئے مسجد یا عید گاہ جانے کی اجازت نہیں دیتے ان کے لیے یہ حدیث کافی ہے۔
’’ ام عطیہ رضی اللہ عنہا سے مروی ہے کہ ہمیں حکم دیا گیا کہ ہم نوجوان لڑکیوں اور حائضہ کو عیدین کی نماز کے لیے نکالیں ۔وہ مسلمانوں کی دعاوں اور امور خیر میں شریک ہوں البتہ حائضہ نماز گاہ سے دور رہے۔‘‘ (صحیح بخاری 324۔974)
یعنی اتنی تاکید فرمائی کہ حائضہ کو بھی آنے کا حکم دیا گیا۔اسی موقعہ پہ نبی کریم صلی اللہ علیہ و آلہ و سلم نے خواتین سے زکوٰۃ بھی لی۔
جابر بن عبداللہ سے روایت ہے کہ (عید کے دن) نبی کریم صلی اللہ علیہ وسلم کھڑے ہوئے، پہلے آپ صلی اللہ علیہ وسلم نے نماز پڑھی پھر خطبہ دیا، اس سے فارغ ہو کر آپ صلی اللہ علیہ وسلم عورتوں کی طرف گئے اور انہیں نصیحت کی۔ آپ صلی اللہ علیہ وسلم بلال رضی اللہ عنہ کے ہاتھ کا سہارا لیے ہوئے تھے اور بلال رضی اللہ عنہ نے اپنا کپڑا پھیلا رکھا تھا عورتیں اس میں خیرات ڈال رہی تھیں۔ میں نے اس پر عطاء سے پوچھا کہ کیا اس زمانہ میں بھی آپ امام پر یہ حق سمجھتے ہیں کہ نماز سے فارغ ہونے کے بعد وہ عورتوں کے پاس آ کر انہیں نصیحت کرے۔ انہوں نے فرمایا کہ بیشک یہ ان پر حق ہے اور سبب کیا جو وہ ایسا نہ کریں۔‘‘
سلیمان بن حرب نے بیان کیا کہا ہم سے شعبہ نے انہوں نے عدی بن ثابت سے انہوں نے سعید بن جبیر سےانہوں نے ابن عباس رضی اللہ عنہما سے کہ نبی کریم صلی اللہ علیہ وسلم نے عیدالفطر کے دن دو رکعتیں پڑھیں نہ ان سے پہلے کوئی نفل پڑھی نہ ان کے بعد۔ پھر (خطبہ پڑھ کر) آپ صلی اللہ علیہ وسلم عورتوں کے پاس آئے اور بلال آپ کے ساتھ تھے۔ آپ صلی اللہ علیہ وسلم نے عورتوں سے فرمایا خیرات کرو۔ وہ خیرات دینے لگیں کوئی اپنی بالی پیش کرنے لگی کوئی اپنا ہار دینے لگی۔‘‘
4: تکبیر
سورہ البقرہ کی آیت 185 میں رمضان کے حوالے سے فرمان ربی ہے
’’ تاکہ تم گنتی پوری کر لو اور اللہ کی بڑائی بیان کرو۔‘‘
تکبیرات اس وقت تک کہنی چاہیے ہیں جب تک کہ امام خطبہ کیلئے نہ آ جائے۔
اللہ اکبر اللہ اکبر لا الہ الا اللہ واللہ اکبر اللہ اکبر وللہ الحمد۔
5:متبادل راستے سے عید گاہ آنا اور جانا
’’جابر بن عبداللہ فرماتے ہیں۔نبی صلی اللہ علیہ و آلہ و سلم عید گاہ جانے اور آنے کیلئے دو مختلف راستے استعمال فرماتے تھے۔‘‘ابن ماجہ 1298 ۔ بخاری 943۔986)
6:گھر سے میٹھا کھا کر جانا
علی رضی اللہ عنہ سے روایت ہے کہ نبی صلی اللہ علیہ و آلہ و سلم عید کی نماز کیلئے نکلنے سے پہلے کچھ میٹھا نوش فرماتے تھے۔ )سنن الترمذی 530۔ابن ماجہ 1294)
کھجور کھانا، مستحب ہے۔
7:لوگوں کو ملنے جانا
علماء کا کہنا ہے کہ متبادل راستہ اختیار کرنے کی وجہ یہ تھی کہ زیادہ لوگوں سے ملاقات ہو سکے۔(فتح الباری 2-473)
8:مبارکباد دینا
’’جبیر ابن نفیر رضی اللہ عنہ سے روایت ہے کہ جب صحابہ کرام رضی اللہ عنہم عید والے دن ایک دوسرے کو ملتے تو کہتے
تقبل اللہ منا و منکم۔
اللہ تم سے اور ہم سے قبول فرما لے۔‘‘)الحافظ الفتح الباری 2-517)
9:کھانا پینا اور تفریح
نبی صلی اللہ علیہ و آلہ و سلم اور صحابہ کرام رضی اللہ عنہم تفریح فرماتے مگر اس میں بھی اعتدال اور میانہ روی کا دامن ہاتھ سے نہ جانے دیتے اور یہ خیال رکھتے کہ کچھ ایسا نہ کریں جس سے اللہ کی نافرمانی ہو۔جبکہ آج چاند رات شروع ہوتے ہی ہر جگہ ناچ گانے اور حرام کاموں کی شروعات ہو جاتی ہے۔
نسیبہ رضی اللہ عنہا سے مروی ہے نبی صلی اللہ علیہ و آلہ و سلم نے فرمایا۔
’’ ایام تشریق کھانے پینے اور اللہ کو یاد کرنے کے دن ہیں۔‘‘)مسلم 1141)
’’انس بن مالک فرماتے ہیں نبی کریم صلی اللہ علیہ و آلہ و سلم مدینہ تشریف لائے تو مدینہ میں دو دن مقرر تھے جن میں لوگ کھیل کود کرتے تھے۔آپ صلعم نے فرمایا۔‘‘ ان دو دنوں کو اللہ تعالیٰ نے دو بہتر دنوں سے بدل دیا ہے عید الفطر اور عید الاضحٰی۔‘‘ (صحیح بخاری 956۔بلاغ المرام 494)
عائشہ رضی اللہ عنہا فرماتی ہیں ’’ عید والے دن دو حبشی نیزہ بازی کر رہے تھےنبی صلی اللہ علیہ و آلہ و سلم نے مجھ سے پوچھا : کیا تم کرتب دیکھنا چاہتی ہو؟ میں نے جواب دیا: جی ہاں۔تب نبی صلی اللہ علیہ و آلہ و سلم نے مجھے اپنے پیچھے کھڑا کیا۔اور فرمایا۔ جاری رکھو بنو ارفدہ۔‘‘
جب میں تھک گئی تو آپ صلعم نے پوچھا۔
’’ کیا تم تھک گئی ہو؟میں نے جواب دیا: ’’جی ہاں۔‘‘ آپ نے فرمایا: اچھا پھر جاو۔‘‘
(حیح البخاری 907۔المسلم 892)
اس حدیث سے معلوم ہوتا ہے کہ تفریح کرنے میں کوئی حرج نہیں لیکن نامحرموں کیساتھ اختلاط نہ ہو۔کسی اچھی جگہ سیر کیلئے یا تفریح کیلئے جایا جا سکتا ہے۔
النووی فرماتے ہیں کہ ’’عید کے دن ایسے کھیل کھیلنے میں کوئی حرج نہیں جس میں کوئی گناہ نہ ہو۔‘‘
’’حافظ ابن الحجر فرماتے ہیں۔‘‘ عید کے دن اپنے بیوی بچوں کیساتھ اچھا سلوک کرنے کا حکم ہے ایسے کام کریں جن سے انہیں خوشی اور سکون ملے۔اور وہ عبادات کی سختی کے بعد کچھ آرام پا سکیں۔ فتح الباری 2-514
شیخ عثیمین فرماتے ہیں۔’’ عید والے دن تحائف اور کھانے کی اشیاء کے تبادلے میں کوئی حرج نہیں۔‘‘ (مجموعہ فتاوی الشیخ عثیمین 16-276)
10:زکوۃ الفطر
عید کی نماز سے پہلے پہلے زکوۃ الفطر ادا کر دینی چاہیے۔
حضرت عبد اللہ بن عمر رضی اللہ عنہ فرماتے ہیں کہ نبی صلی اللہ علیہ و آلہ و سلم نے لوگوں کے نماز کے لیے نکلنے سے پہلے صدقۃ الفطر ادا کرنے کا حکم دیا ہے۔ (بخاری شریف)
حضرت عبد اللہ بن عباس رضی ا للہ عنہ سے روایت ہے نبی صلی اللہ علیہ و آلہ و سلم نے روزہ دار کے روزہ کو بے ہودہ گوئی اور فحش کلامی سے پاک کرنے اور غرباء و مساکین کی خوراک مہیا کرنے کے لیے صدقۃ الفطر فرض کیا ہے، جو شخص نماز سے پہلے یہ صدقہ ادا کرے، اس کا صدقہ قبول ہے (اس کے لیے یہ دونوں مقصد حاصل ہو جاتے ہیں) اور جو شخص نماز کے بعد ادا کرے، تو (صدقۃ الفطر ادا نہ ہو گا بلکہ) یہ دوسرے نفلی صدقات کی طرح ایک صدقہ ہے۔‘‘
حضرت عبد اللہ بن عمر رضی اللہ عنہ فرماتے ہیں کہ آنحضرتﷺ نے غلام، آزاد، مرد و عورت اور چھوٹے بڑے ہر فرد پر جو یا کھجور سے ایک صاع صدقہ الفطر ادا کیا کرتے تھے، ایک سال مدینہ میں کھجوریں پیدا نہ ہوئیں، تو انہوں نے اس سال جو سے صدقۃ الفطر ادا کیا۔ (بخاری شریف)
11:نماز عید
نماز عید ہر مسلمان مردوعورت پہ واجب ہے جسے کوئی شرعی عذر نہ ہو مثلا بیماری وغیرہ کیونکہ نبی صلی اللہ علیہ و آلہ و سلم نے اس کا حکم دیا ہے۔یہ نمازعید گاہ یا کھلے میدان میں پڑھی جاتی ہے۔اس سے پہلے یا بعد میں کوئی سنت نہیں البتہ تحیتہ المسجد پڑھے جا سکتے ہیں۔
’’ابن عباس رضی اللہ عنہ فرماتے ہیں۔ نبی صلی اللہ علیہ و آلہ و سلم نے عید کی نماز دو رکعت پڑھی نہ اس سے پہلے کوئی نماز،پڑھی نہ اس کے بعد۔‘‘ (صحیح البخاری 964 مسلم 884)
’’عید کی نماز کے لیے نہ ہی اذان کہی جائیگی نہ ہی اقامت کیونکہ رسول اللہ صلی اللہ علیہ و آلہ و سلم نے نماز عید بغیر اذان و اقامت کے پڑھی ہے۔‘‘ ابی داؤد 1147
’’ ابو سعید خدری رضی اللہ عنہ فرماتے ہیں۔‘‘ رسول اللہ صلی اللہ علیہ و آلہ و سلم جب عیدین کی نماز کیلئے نکلتے تو سب سے پہلے نمازپڑھتے اور پھر لوگوں کی طرف منہ کر کے کھڑے ہوتے۔لوگ صفوں میں بیٹھے ہوتے آپ انہیں وعظ کرتے اور حکم دیتے۔
(صحیح البخاری 956 مسلم 889)
یعنی پہلے نمازپڑھی جاتی ہے پھر خطبہ ہوتا ہے۔جس میں امام احکام الٰہی بیان کرتا ہے اور نصیحت کرتا ہے۔
نمازعید میں پہلی رکعت میں قرآت سے پہلے سات تکبیریں اور دوسری رکعت میں قرآت سے پہلے پانچ تکبیریں ہیں۔
عبداللہ بن عمر رضی اللہ عنہ سے روایت ہے۔’’ نبی صلی اللہ علیہ و آلہ و سلم نے فرمایا: عید کے دن پہلی رکعت میں سات بار تکبیر کہنا ہے اور دوسری رکعت میں پانچ بار۔اور قرآت دونوں رکعات میں تکبیرات کے بعد ہے۔‘‘ )سنن ابی داؤد 1150 بلاغ المرام 495)
اللہ تعالیٰ ہماری عبادات و دعائیں قبول فرمائے اور ہمیں تمام احکام الہی اور سنتوں پہ عمل کی توفیق عطا فرمائے۔