نئی دہلی،20اگست :۔
پاکستان میں گزشتہ دنوں مذہبی بنیاد پر تنازعہ کا افسوسناک واقعہ پیش آیا جس میں کچھ شر پسندوں نے پاکستان میں اقلیتی طبقہ سے تعلق رکھنے والے عیسائیوں کے گھروں اورگرجاگھروں پر حملے کئے ،عبادت گاہوں کو نذر آتش کر دیا۔پاکستان میں ہوئے اس اندوہناک واقعہ کی پوری دنیا میں مذمت کی جا رہی ہے ۔ ہندوستان میں معروف ملی تنظیم جماعت اسلامی ہند نے بھی اس واقعہ کی پر زور مذمت کی ہے۔
میڈیا کو ایک بیان میں جماعت اسلامی ہند کے قومی سکریٹری، کے کے سہیل نے کہا، “جماعت اسلامی ہند پاکستان کے فیصل آباد کے جڑانوالہ میں توہین مذہب کے الزامات اور چرچوں کو نذر آتش کرنے پر عیسائیوں پر حملے کی مذمت کرتی ہے۔ ہم یہ پیغام دینا چاہتے ہیں کہ مسلمان عیسائیوں کے دکھ درد میں شریک ہیں اور ہم ان کے ساتھ مکمل یکجہتی کا اظہار کرتے ہیں۔ گرجا گھروں کی توڑ پھوڑ، بائبل کو جلانا، اور آس پاس کے مکانات جو عیسائیوں کے تھے ان کو نقصان پہنچانا، انتہائی افسوسناک اور انتہائی شرمناک ہے۔ کسی مذہبی عبادت گاہ کی بے حرمتی ساتھی انسانوں اور ان کے عقائد کی عدم برداشت اور سراسر بے عزتی کو ظاہر کرتی ہے۔ جماعت اس حملے کو تمام مذاہب اور انسانیت پر اجتماعی حملہ کے طور پر دیکھتی ہے۔ جڑانوالہ واقعہ کی اسلام میں کوئی اجازت نہیں ہے۔ ایسی حرکتوں اور ان کے مرتکب افراد کا اسلام سے کوئی تعلق نہیں ہے۔ اسلام واضح طور پر بائبل اور گرجا گھروں کو جلانے سے منع کرتا ہے۔ اسلام انسان کی جان و مال کی حفاظت کا مطالبہ کرتا ہے۔ اسلام میں ایک فرد کی جان اور وقار مقدس ہے۔ ان کاموں کو اسلام سے نہیں جوڑا جا سکتا۔ جو لوگ اسلام کے نام پر ایسی حرکتیں کر رہے ہیں انہیں معلوم ہونا چاہیے کہ وہ اس کا غلط استعمال کر رہے ہیں اور اسے بدنام کر رہے ہیں۔ انہیں ایسا کرنے کا کوئی حق نہیں ہے۔
جماعت سلامی ہند کے قومی سکریٹری نے مزید کہا، "جماعت اسلامی مسلم علمائے کرام اور انصاف پسند شہریوں کی طرف سے عبادت گاہوں کی بحالی اور متاثرین کو مناسب معاوضہ دینے کے مطالبے کو سراہتی ہے اور اس کی تائید کرتی ہے۔”
انہوں نے کہا، "معاشروں میں بڑھتی ہوئی عدم برداشت، نفرت اور فتنہ انگیزی سنگین تشویش کا باعث ہے اور ہمارے اخلاقی اقدار کو نقصان پہنچا رہی ہے۔
جماعت اسلامی ہند تمام مذاہب سے تعلق رکھنے والے لوگوں سے اپیل کرتی ہے کہ وہ ان لوگوں کے اشتعال میں آنے سے گریز کریں جو نفرت کے شعلے بھڑکانا چاہتے ہیں۔ اگر ان کے مذہبی جذبات کو ٹھیس پہنچانے والے کسی بھی واقعے کا علم ہوتا ہے تو انہیں صرف متعلقہ حکام کو آگاہ کرنا چاہیے۔ کسی کو بھی یہ حق نہیں ہے کہ وہ قانون کو اپنے ہاتھ میں لے اور اپنی مرضی کے مطابق اس کا بدلہ لے۔