نئی دہلی، دسمبر 12: بار اینڈ بنچ کی خبر کے مطابق دہلی کی ایک عدالت نے پیر کو کارکن عمر خالد کو ایک ہفتے کی عبوری ضمانت دے دی۔
لائیو لاء کے مطابق عمر خالد کو 23 دسمبر کو رہا کیا جائے گا اور اسے 30 دسمبر کو خود سپردگی کرنی ہوگی۔
خالد نے اپنی بہن کی شادی میں شرکت کے لیے دو ہفتوں کے لیے عبوری ضمانت کی درخواست کی تھی۔
عمر خالد کو دہلی پولیس نے ستمبر 2020 میں گرفتار کیا تھا۔
کارکن کے خلاف دہلی فسادات سے متعلق ایک غیر قانونی سرگرمیاں (روک تھام) ایکٹ کے تحت مقدمہ درج کیا گیا ہے۔ تشدد میں 53 افراد ہلاک اور سینکڑوں زخمی ہوئے تھے۔ ہلاک ہونے والوں میں زیادہ تر مسلمان تھے۔
دہلی پولیس کا دعویٰ ہے کہ تشدد وزیر اعظم نریندر مودی کی حکومت کو بدنام کرنے کی ایک بڑی سازش کا حصہ تھا اور ان لوگوں نے اس کا منصوبہ بنایا تھا جنھوں نے شہریت ترمیمی قانون کے خلاف مظاہروں کو منظم کیا تھا۔
موجودہ کیس میں عبوری ضمانت کی درخواست کرتے ہوئے خالد کے وکیل نے عدالت کو بتایا تھا کہ اگر شادی میں شرکت کی اجازت دی گئی تو وہ میڈیا سے بات نہیں کریں گے اور نہ ہی عوام سے ملاقات کریں گے۔
دہلی پولیس نے تاہم اس درخواست کی مخالفت کرتے ہوئے کہا کہ خالد سوشل میڈیا پر غلط معلومات پھیلا سکتا ہے اور بدامنی پھیلا سکتا ہے۔
پولیس نے یہ بھی دعویٰ کیا کہ خالد رہا ہونے کی صورت میں کیس کے گواہوں پر اثر انداز ہو سکتا ہے۔
پولیس نے کہا تھا ’’اس کی باقاعدہ ضمانت کی درخواست اس عدالت نے اور اپیل ہائی کورٹ کے ڈویژن بنچ نے خارج کردی ہے۔ مزید، اس کے والدین تمام ضروری انتظامات کرنے کے اہل ہیں۔‘‘
18 اکتوبر کو دہلی ہائی کورٹ نے خالد کو یہ کہتے ہوئے ضمانت دینے سے انکار کر دیا تھا کہ ان کے خلاف الزامات پہلی نظر میں سچے ہیں اور اس لیے غیر قانونی سرگرمیاں (روک تھام) ایکٹ کی دفعہ 43D(5) اسے ضمانت دینے سے روکتی ہے۔
4 دسمبر کو عمر خالد کو، ایک اور کارکن خالد سیفی کے ساتھ، فسادات کے دوران دہلی کے کھجوری خاص علاقے میں ہجومی تشدد سے متعلق ایک الگ کیس میں بری کر دیا گیا۔ اپریل 2021 میں انھیں اس کیس میں ضمانت دی گئی تھی۔
اگرچہ خالد اور سیفی ہجوم کا حصہ نہیں تھے، لیکن ان پر کیس میں مجرمانہ سازش کا الزام لگایا گیا تھا۔