نئی دہلی، مئی 16: مرکزی حکومت نے اتوار کو ریاستوں اور مرکز کے زیر انتظام علاقوں کو، جن کی گندم کی خریداری کی آخری تاریخ تیزی سے قریب آرہی ہے، 31 مئی تک اس عمل کو جاری رکھنے کے لیے کہا ہے۔ اس نے فوڈ کارپوریشن آف انڈیا سے بھی کہا ہے کہ وہ مرکزی پول کے تحت کسانوں سے گندم کی خریداری جاری رکھے۔
مرکزی پول مرکزی اور ریاستی حکومتوں کے ذریعہ کم سے کم امدادی قیمت کے ذریعہ خریدے گئے اناج کے ذخیرہ سے متعلق ہے اور کچھ اسکیموں کے ذریعہ تقسیم کرنے کے لیے محفوظ ہے۔
کم از کم امدادی قیمت وہ شرح ہے جس پر حکومت زرعی پیداوار خریدتی ہے اور یہ کسانوں کی پیداواری لاگت کے کم از کم ڈیڑھ گنا کے حساب سے ہوتی ہے۔ بہت سی فصلوں کے بازار کے نرخ عام طور پر کم از کم امدادی قیمت سے کافی نیچے ہوتے ہیں۔
مرکزی وزارت برائے امور صارفین، خوراک اور عوامی تقسیم کی ایک پریس ریلیز کے مطابق مرکز نے اتوار کو کہا کہ اس نے ریاستوں اور مرکز کے زیر انتظام علاقوں کی جانب سے خریداری کی مدت بڑھانے کی درخواستوں کی وجہ سے آخری تاریخ میں توسیع کی ہے۔
پنجاب، ہریانہ، دہلی اور جموں و کشمیر کو 31 مئی تک گندم کی خریداری کے لیے کہا گیا ہے۔ راجستھان حکومت 10 جون تک اناج خریدے گی، جب کہ اتر پردیش، مدھیہ پردیش، گجرات اور ہماچل پردیش 25 جون تک گندم خریدیں گے۔
اتراکھنڈ میں 30 جون تک اور بہار میں 15 جولائی تک گندم کی خریداری جاری رہے گی۔
وزارت نے کہا کہ موجودہ ربیع منڈی سیزن کے دوران سنٹرل پول میں گندم کی خریداری پچھلے سیزن سے کم تھی۔ اس نے دعویٰ کیا کہ اس کی وجہ یہ ہے کہ مارکیٹ کی قیمتیں کم از کم امدادی قیمت سے زیادہ تھیں اور کسان نجی تاجروں کو گندم فروخت کر رہے تھے۔
دریں اثنا مرکزی حکومت نے فوڈ کارپوریشن آف انڈیا کو پنجاب، ہریانہ اور چندی گڑھ سے گندم کی خریداری کے لیے اناج کے معیار کے اصولوں میں نرمی کرنے کی اجازت دی ہے۔
اس میں کہا گیا ہے کہ ’’منفی موسمی حالات کسانوں کے قابو سے باہر ہیں اور اس لیے ان کو اس طرح کے قدرتی واقعات کے لیے سزا نہیں دی جانی چاہیے۔‘‘
13 مئی کو بھارت نے ملک میں فصل کی بڑھتی ہوئی قیمتوں پر قابو پانے کے لیے گندم کی برآمدات پر پابندی لگانے کا اعلان کیا تھا۔ تاہم حکومت نے کہا تھا کہ 13 مئی کو یا اس سے پہلے آرڈر کی گئی شپمنٹس برآمد کی جائیں گی۔
ہندوستان کے ڈائریکٹوریٹ جنرل آف فارن ٹریڈ نے کہا ہے کہ دیگر ممالک کو خوراک کی حفاظت کی ضروریات کو پورا کرنے میں مرکزی حکومت کی طرف سے اجازت ملنے کی صورت میں برآمدات کی اجازت دی جائے گی۔
عالمی مانگ میں ریکارڈ اضافے کے درمیان ہی بھارت میں گندم کی پیداوار گر گئی ہے، خاص طور پر مارچ سے شدید گرمی کی لہر کی وجہ سے۔