کھرگون تشدد: 12 سالہ لڑکے سے مبینہ طور پر سرکاری املاک کو نقصان پہنچانے پر 2.9 لاکھ روپے ادا کرنے کو کہا گیا
نئی دہلی، اکتوبر 19: این ڈی ٹی وی نے منگل کو اطلاع دی کہ مدھیہ پردیش کے کھرگون میں ایک 12 سالہ لڑکے کو قصبے میں 10 اپریل کو ہونے والے فرقہ وارانہ تشدد کے دوران عوامی املاک کو مبینہ طور پر نقصان پہنچانے کے لیے 2.9 لاکھ روپے ادا کرنے کا نوٹس ملا ہے۔
اس کے والد کالو خان کو بھی ریاست کے کلیمز ٹریبونل نے مدھیہ پردیش پریوینشن اینڈ ریکوری آف ڈیمیجز ٹو پبلک پراپرٹی ایکٹ کے تحت 4.8 لاکھ روپے ادا کرنے کو کہا ہے۔
یہ قانون، جو جنوری میں نافذ ہوا، حکومت کو ان مجرموں سے معاوضہ لینے کی اجازت دیتا ہے جو احتجاج کے دوران سرکاری اور نجی املاک کو نقصان پہنچاتے ہیں۔
10 اپریل کو کھرگون میں فرقہ وارانہ تشدد اس وقت شروع ہوا جب کچھ لوگوں نے رام نومی کے جلوس پر مبینہ طور پر پتھراؤ کیا تھا، جس میں تالاب چوک کے علاقے میں اونچی آواز میں اور اشتعال انگیز موسیقی بجانے پر اعتراض ہوا تھا۔ تشدد میں ایک شخص ہلاک اور کم از کم 24 زخمی ہوئے تھے۔ دس گھر بھی جل گئے تھے۔
11 اپریل کو مدھیہ پردیش نے کھرگون میں مسلمانوں کے گھروں اور دکانوں کو مسمار کر دیا تھا۔
کلیمز ٹریبونل کو اب تک 343 شکایات موصول ہوئی ہیں جن میں تشدد کے بعد حل طلب کیا گیا ہے۔ این ڈی ٹی وی کے مطابق اس نے ان میں سے صرف 34 شکایات کو قبول کیا ہے۔ اب تک ٹربیونل نے چھ مقدمات کو نمٹا دیا ہے – چار ہندوؤں کے اور دو مسلمانوں کے اور 50 افراد سے تقریباً 7.46 لاکھ وصول کیے ہیں۔
خان اور اس کے بیٹے کے خلاف مقدمے میں، اس کے پڑوسیوں نے دعویٰ کیا ہے کہ انھوں نے 10 اپریل کو تشدد کے دوران ان کے گھر کو لوٹا اور توڑ پھوڑ کی۔ کیس میں چھ دیگر افراد کو بھی نوٹس جاری کیے گئے ہیں۔
تاہم خان کے اہل خانہ نے ان الزامات سے انکار کیا ہے اور کہا ہے کہ ان کا بیٹا ’’مسلسل اس خوف میں ہے کہ پولیس اسے گرفتار کر لے گی۔‘‘
خان نے مزید کہا ’’میرا بیٹا نابالغ ہے۔ جب فساد ہوا تو ہم سو رہے تھے۔ ہم انصاف چاہتے ہیں۔‘‘
ٹائمز آف انڈیا کی خبر کے مطابق، خان کے وکیل اشہر علی وارثی نے کہا کہ ان کے موکل کے خلاف مقدمہ درج ہونے کے فوراً بعد مدھیہ پردیش ہائی کورٹ کے اندور بنچ کے سامنے راحت کی درخواست کی گئی تھی۔
تاہم 12 ستمبر کو عدالت نے اس درخواست کو مسترد کر دیا اور خان کے خاندان سے کہا کہ وہ ٹربیونل سے رجوع کریں، ٹربیونل نے بھی بعد میں اس کی درخواست کو مسترد کردیا۔
کلیمز ٹربیونل کے دو ممبران میں سے ایک پربھات پراشر نے ٹائمز آف انڈیا کو بتایا ’’لڑکے کے خلاف توڑ پھوڑ اور آتش زنی کا الزام ہے۔ شکایت کنندہ نے اس کا نام لیا ہے اور لڑکے کا وکیل یہ ثابت نہیں کر سکا کہ وہ [لڑکا] بھیڑ میں نہیں تھا۔‘‘
تاہم وارثی نے بعد میں این ڈی ٹی وی کو بتایا کہ ٹریبونل نے قانون کا اطلاق کیے بغیر من مانی سے کام کیا ہے۔
وکیل نے کہا کہ ٹربیونل نے فساد میں لڑکے کے مبینہ کردار کی مکمل انکوائری کیے بغیر نوٹس جاری کیا ہے۔ انھوں نے دعویٰ کیا کہ ٹربیونل ان لوگوں کو جرمانے کر رہا ہے جنھیں مجرم قرار نہیں دیا گیا ہے۔