نئی دہلی، ستمبر 4: جھارکھنڈ میں سیاسی بحران کے درمیان ہیمنت سورین کی قیادت والی حکومت پیر کو ایک خصوصی اسمبلی اجلاس کے دوران اعتماد کے ووٹ کا مطالبہ کرے گی۔
اسمبلی سکریٹریٹ سے ایم ایل ایز کو بھیجے گئے ایک خط کے مطابق وزیر اعلی سورین نے کہا کہ وہ ایوان میں اپنی اکثریت ثابت کرنے کے لیے تحریک اعتماد کے لیے تیار ہیں۔
پارلیمانی امور کے وزیر عالمگیر عالم نے کہا کہ جھارکھنڈ میں ’’انتشار کی کیفیت‘‘ ہے، جس کی وجہ سے حکومت اپنی اکثریت ثابت کرے گی۔ انھوں نے کہا کہ ہمارے وفد نے گورنر سے ملاقات کی اور انھوں نے ایک یا دو دن میں ہوا صاف کرنے کی یقین دہانی کرائی، لیکن اب تک کچھ نہیں ہوا۔
عالم نے کہا کہ جھارکھنڈ میں حکمران اتحاد کے پاس 81 رکنی ایوان میں مقبول مینڈیٹ اور مطلوبہ تعداد ہے۔
انھوں نے یہ بھی نوٹ کیا کہ عام آدمی پارٹی کی قیادت والی دہلی حکومت نے اپنے طور پر اعتماد کی تحریک پیش کی تھی تاکہ یہ ظاہر کیا جا سکے کہ بھارتیہ جنتا پارٹی کا ’’آپریشن لوٹس‘‘ وہاں ناکام ہو گیا ہے۔ آپریشن لوٹس ایک اصطلاح ہے جس کا استعمال بی جے پی کی جانب سے حزب اختلاف کی جماعتوں میں پھوٹ ڈالنے کی مبینہ کوششوں کے لیے کیا جاتا ہے۔
عالم نے کہا ’’ہم [جھارکھنڈ کا حکمراں اتحاد] یہاں بھی ایسا ہی کر رہے ہیں۔‘‘
جمعرات کو عام آدمی پارٹی نے ریاستی اسمبلی میں وزیر اعلی اروند کیجریوال کے ذریعہ پیش کردہ اعتماد کا ووٹ جیت لیا۔ کیجریوال نے دعویٰ کیا تھا کہ بی جے پی نے ان کے 40 ایم ایل ایز کو 20 کروڑ روپے کی پیشکش کی تھی تاکہ وہ پارٹی بدل لیں۔
بی جے پی نے ان الزامات کو مسترد کرتے ہوئے عام آدمی پارٹی پر اپنی حکومت کی بدعنوانی سے توجہ ہٹانے کا الزام لگایا۔