نئی دہلی، اپریل 19: مہاراشٹر کے وزیر اعلی ادھو ٹھاکرے نے کہا ہے کہ ان کی حکومت غیر ہاٹ سپاٹ علاقوں میں کچھ صنعتوں کو دوبارہ کام شروع کرنے کی اجازت دے گی، لیکن ضروری احتیاطی تدابیر کے ساتھ۔
مہاراشٹرا میں کورونا وائرس کے 211 اموات کے ساتھ 3،600 سے زیادہ کیس ہیں، جس کی وجہ سے یہ ہندوستان کی بدترین متاثرہ ریاست ہے۔
انھوں نے ٹویٹر پر کہا ’’ہم پابندی اور احتیاطی تدابیر کے ساتھ اورینج اور گرین زون میں کچھ صنعتی سرگرمیوں کی اجازت دے رہے ہیں۔ ابھی تک ہم نے صرف ضروری شعبے کی صنعتوں اور ضروری سامان کی نقل و حمل کے لیے اجازتیں دے رکھی ہیں۔‘‘
We are allowing some industrial activity in orange and green zones with restrictions and precautions. Instructions have been given. So far, we had given permissions only for industries in the essential sector and transport of essentials.
— CMO Maharashtra (@CMOMaharashtra) April 19, 2020
کورونا وائرس کے معاملات کی تعداد کی بنیاد پر مرکز نے ہندوستان بھر کے اضلاع کو ریڈ، اورینج اور گرین زون میں تقسیم کیا ہے۔ وہ مقامات جہاں کوویڈ 19 میں تیزی سے اضافہ ہو رہا ہے وہ ریڈ زون ہیں۔ کوویڈ 19 کے کم کیسز اور انفیکشن کی سست شرح نمو والے علاقوں کو اورینج زون کے طور پر درجہ بند کیا گیا ہے اور گرین زون وہ علاقے ہیں جہاں دو ہفتوں میں کوویڈ 19 کا کوئی واقعہ سامنے نہیں آیا ہے۔
ٹھاکرے نے مزید کہا کہ وہ صنعتیں جو لاک ڈاؤن کے دوران اپنے کارکنوں کو رہائش فراہم کرنے کے لیے تیار ہیں، انھیں حکومت کی مدد ملے گی۔ انھوں نے کہا ’’ہم نے مالکان سے کہا ہے کہ جہاں بھی ممکن ہو، اگر آپ اپنے احاطے میں اپنے ملازمین اور کارکنوں کی دیکھ بھال کرسکیں تو ہم اناج فراہم کریں گے۔ آپ کو ضروری خام مال بھی ملے گا۔ اپنا کام کریں۔‘‘
مہاراشٹر کے وزیر اعلی نے واضح کیا کہ ریاست کی سرحدیں سیل رہیں گی اور صرف ضروری سامان کی نقل و حرکت کی اجازت ہوگی۔ انھوں نے کہا ’’سامان کی نقل و حمل کے علاوہ اضلاع کی سرحدیں نہیں کھولی جائیں گی۔ ہمیں کم از کم 3 مئی تک ان پابندیوں کی پیروی کرنی ہوگی۔۔‘‘
ٹھاکرے نے تارکین وطن مزدوروں کو بھی یہ یقین دہانی کرائی کہ حکومت گھر پہنچنے میں ان کی مدد کرے گی۔ انھوں نے کہا ’’ہم آہستہ آہستہ ایک بار پھر مہاراشٹر میں سرگرمیاں شروع کر رہے ہیں اور اگر ممکن ہو تو کام دوبارہ شروع کریں تاکہ آپ کی روزی روٹی یقینی ہو۔ ایک بار جب چیزیں آسان ہو جائیں گی، میں آپ سے وعدہ کرتا ہوں کہ مہاراشٹر حکومت اس بات کو یقینی بنائے گی کہ آپ گھر جا سکیں۔‘‘
اس سے قبل آج ہی ٹھاکرے کے دہلی کے ہم منصب اروند کیجریوال نے کہا کہ دارالحکومت میں لاک ڈاؤن کے قواعد میں کوئی نرمی نہیں کی جائے گی کیونکہ کوویڈ 19 کے کیسوں کی تعداد بڑھ رہی ہے۔ دہلی میں کوویڈ 19 کے 42 اموات کے ساتھ قریب 1،900 واقعات ہیں۔ انھوں نے مزید کہا کہ چوں کہ دہلی کے تمام گیارہ اضلاع کو ہاٹ سپاٹس قرار دے دیا گیا ہے، لہذا پابندیوں کو کم نہیں کیا جاسکتا۔
حکومت نے 20 اپریل سے نان ہاٹ سپاٹ علاقوں میں کچھ سرگرمیاں دوبارہ شروع کرنے کی اجازت دے دی ہے۔ لاک ڈاؤن کے دوران دیہی علاقوں، غیر بینکاری مالیاتی اداروں اور مائیکرو فنانس کارپوریشنوں کو کام کرنے کی اجازت ہوگی۔