نئی دہلی، فروری 27: اتوار کی سہ پہر سے دہلی میں ہونے والے تشدد میں ہلاکتوں کی تعداد جمعرات کی سہ پہر 34 ہوگئی۔ 330 سے زائد زخمی افراد تاحال جی ٹی بی اسپتال میں زیر علاج ہیں، ان میں سے بیشتر کی حالت تشویشناک ہے۔
ہلاک ہونے والوں میں ایک 85 سالہ خاتون اور ایک نوجوان بھی شامل ہے جس کی شادی ایک ہفتہ قبل ہی 14 فروری کو ہوئی تھی۔
جاں بحق ہونے والوں میں سے کچھ کی شناخت اسحاق خان (25)، محمد مدثر (26)، محمد مبارک حسین (30)، شان محمد (34)، ذاکر سیفی (22)، مہتاب (24)، اشفاق (22)، محمد فرقان (22)، محسن علی (23)، معروف علی (31)، امان (8)، اکبری (85)، دیپک کمار (34)، انکت شرما (26)، ویر بھان (49)، پرویش (48)، رتن لال (40)، راہول ٹھاکر اور ونود کمار کے طور پر ہوئی ہے۔
اطلاعات کے مطابق مہتاب نامی ایک بڑھئی دودھ خریدنے نکلا تھا جب اسے شرپسندوں نے پکڑا اور اسے زندہ جلا دیا۔ ہاپوڑ کے رہائشی 23 سالہ محسن علی نے حال ہی میں شادی کی تھی۔ اس کی نعش اس کے لواحقین نے جی ٹی بی اسپتال کی مردہ خانے سے پائی۔ کسی کو معلوم نہیں ہے کہ اسے کہاں اور کیسے مارا گیا۔
منگل کے روز مصطفی آباد میں اپنے گھر واپسی پر پیشہ کے لحاظ سے ایک الیکٹریشن اشفاق حسین کو گولی مار کر ہلاک کردیا گیا۔ اس کے گلے میں چھرا بھی مارا گیا تھا تاکہ یہ یقینی بنایا جاسکے کہ اس کی موت ہوگئی۔ اس کی شادی ایک ہفتہ قبل ہی 14 فروری کو ہوئی تھی۔
دیپک کمار، ان کے بیٹے وویک چوہدری کے مطابق، برہماپوری میں دوا خریدنے گئے تھے جب ان پر ہجوم نے حملہ کیا اور انھیں ہلاک کردیا۔
22 سالہ ذاکر سیفی، ان کی بہن ستارہ کے مطابق، منگل کے روز برجپوری کی مقامی مسجد میں نماز پڑھنے گئے تھے جب اسے گولی مار دی گئی اور اس پر چاقو سے وار کیا گیا تھا۔
گامری گاؤں میں گھر کو آگ لگانے کے بعد 85 سالہ خاتون اکبری کی موت ہوگئی۔ ان کے بیٹے سعید سلمانی نے میڈیا والوں کو بتایا کہ وہ دودھ خریدنے گیا تھا جب ایک ہجوم نے ان کے گھر پر حملہ کیا۔ جب اس کے بچے اور بیوی بھاگ گئے لیکن اس کی والدہ بڑھاپے کی وجہ سے باہر نہیں جاسکیں۔ شرپسندوں نے اس کے گراؤنڈ پلس دو منزلہ مکان کو آگ لگا دی جس میں اس کی ماں کو زندہ جلایا گیا تھا۔
تین مساجد اور ایک ’مدرسہ‘ بھی جلائے گئے
اتوار کو شمال مشرقی دہلی میں شروع ہونے والے تشدد میں تین مساجد کو بھی نشانہ بنایا گیا اور انھیں آگ لگا دی گئی۔ دو مساجد جو جل گئیں، وہ اشوک نگر میں واقع ہیں۔ برج پوری میں ایک اور مسجد میں توڑ پھوڑ کی گئی اور نذر آتش کیا گیا۔ شرپسندوں نے برجپوری میں مسجد کے مینار پر بھی چڑھائی کی اور اس پر "جے شری رام” کا نعرہ لگاتے ہوئے بھگوا جھنڈے لگائے۔ برج پوری میں ایک مدرسہ بھی نذر آتش کیا گیا۔ شرپسندوں نے برج پوری میں ایک اسکول کو بھی نذر آتش کیا اور برج پوری میں فاروقیہ مسجد کے اندر نماز پڑھنے والے لوگوں پر حملہ کیا۔ عینی شاہدین نے بتایا کہ حملہ آوروں نے ہیلمٹ پہن رکھے تھے۔ انھوں نے پٹرول بم بھی پھینکے۔