تذکیر بالقرآن

قرآن مجید آسان ہے

تاریخ اشاعت - 8 اپریل، 2021

لئیق اللہ خاں منصوری، ایم اے (بنگلورو)

وَلَقَدْ یَسَّرْنَا الْقُرْاٰنَ لِلذِّکْرِ فَھَلْ مِنْ مُّدَّکِر
’’ہم نے اس قرآن کو نصیحت کے لیے آسان ذریعہ بنا دیا ہے، پھر کیا ہے کوئی نصیحت قبول کرنے والا؟۔‘‘
(القمر : ۱۷)
یہ آیت سورہ قمر میں چار بار آئی ہے۔ اس آیت میں ایک چیلنج کا انداز اختیار کیا گیا ہے۔ اللہ تعالیٰ نے قرآن مجید کو نصیحت حاصل کرنے کے لیے آسان بنا دیا ہے۔ یہ بات پوری سورت میں چار بار بیان کی گئی اور اس کے ساتھ یہ سوال بھی چار بار اٹھایا کہ ’’ہے کوئی نصیحت حاصل کرنے والا؟‘‘
٭ اس اعلان اور اس سوال کو بار بار سننے کے بعد بندے پر گویا اتمام حجت ہو جاتا ہے اور اس کے لیے ضروری ہو جاتا ہے کہ وہ قرآن کو سمجھنے اور اس سے ہدایت حاصل کرنے کے لیے استطاعت بھر کوشش شروع کر دے۔
٭ آیت میں قرآن کو ’’ذکر‘‘ کے لیے آسان بنانے کی بات ہے۔ ذکر کے معنی یاد کرنے، حفظ کرنے کے بھی ہیں اور کسی کلام سے نصیحت و عبرت حاصل کرنے کے بھی، یہ دونوں معنی یہاں مراد ہو سکتے ہیں۔
(معارف القرآن)۔
٭ قرآن مجید واقعی حفظ کے لیے بھی آسان ہے۔ دنیا کی کسی اور کتاب کو حفظ کرنا آسان نہیں ہے۔ یہ صرف قرآن کے ساتھ خاص ہے۔
٭ ذکر کا دوسرا مفہوم ’’نصیحت اور یاد دہانی‘‘ ہے۔ اس حوالے سے بھی مسلمانوں کو توجہ کرنے کی ضرورت ہے۔ اللہ تعالٰی نے درس و عبرت کے لیے قرآن کو آسان بنا دیا ہے۔ ہر انسان قرآن کے پیغام کو سن کر نصیحت حاصل کر سکتا ہے۔ یہ قرآن کا اعجاز ہے کہ دنیا میں سب سے زیادہ پڑھی جانے والی کتاب یہی قرآن مجید ہے لیکن اس کتاب کے
ساتھ ایک بڑا المیہ یہ ہے کہ سب سے کم سمجھی جانے والی کتاب بھی یہی قرآن مجید ہے۔ مسلمان قرآن کی تلاوت تو کرتے ہیں لیکن اسے سمجھنے کی کوشش نہیں کرتے۔ یہی وجہ ہے کہ آج مسلمان قرآن کے ہوتے ہوئے اندھیروں میں بھٹک رہے ہیں۔حالانکہ آج قرآن سمجھنے کے لیے بہت ساری سہولتیں ہیں۔ علمائے کرام نے قرآن کی تفسیریں عوام الناس کو سمجھانے کے لیے ہی لکھی ہیں۔ آج تقریباً ہر بڑی زبان میں قرآن کی تفسیر موجود ہے۔ ہے کوئی قرآن کو سمجھنے کی کوشش کرنے والا؟
٭ قرآن ’’تذکر بالقرآن‘‘ کے لیے آسان ہے۔ لیکن ’’تدبر بالقرآن‘‘ کے لیے مشکل ہے۔ یعنی قرآن سے رہنمائی حاصل کرنا آسان ہے، لیکن قرآن کی گہرائیوں میں اترنا اور اس میں تدبر کرنا اور اجتہاد کرنا آسان نہیں ہے۔ اس کے لیے عربی زبان اور دیگر ضروری علوم سے واقفیت ضروری ہے۔ تفاسیر کا وسیع مطالعہ بھی تدبر میں مفید ہو گا۔
تیسیر قرآن (قرآن کو آسان کرنے) کے مختلف پہلوؤں کو تدبر قرآن میں بیان کیا گیا ہے۔
(۱) قرآن عربی مبین میں نازل ہوا ہے تاکہ آسانی سے سمجھا جا سکے۔
(۲) اللہ نے اسے تھوڑا تھوڑا کر کے نازل کیا ہے تاکہ اس کے پیغام کو اخذ کرنے میں سہولت ہو سکے۔(۳) نزول قرآن کی ابتداء چھوٹے چھوٹے فقروں سے ہوئی پھر دقیق مضامین بیان ہوئے۔
(۴) قرآن میں مختلف انداز اور اسلوب میں بات سمجھائی گئی ہے۔
(۵) قرآن میں سورتوں اور آیات کا آپسی ربط بھی ’’تیسیر‘‘ ہی کے لیے ہے۔
اللہ تعالیٰ ہمیں قرآن سے نصیحت حاصل کرنے کی جانب متوجہ فرمائے۔ قرآن مجید کو سمجھ کر اس پر عمل کرنے کی سعادت بخشے۔ آمین