پرسنل ڈیٹا پروٹیکشن بل پارلیمنٹ کے سرمائی اجلاس میں پیش کیا جائے گا، مرکز نے سپریم کورٹ کو مطلع کیا

نئی دہلی، ستمبر 29: مرکزی حکومت نے جمعرات کو سپریم کورٹ کو مطلع کیا کہ پرسنل ڈیٹا پروٹیکشن بل پارلیمنٹ کے آنے والے سرمائی اجلاس میں پیش کیا جائے گا۔

یہ معلومات سالیسیٹر جنرل تشار مہتا نے واٹس ایپ کی پرائیویسی پالیسی 2021 پر سماعت کے دوران فراہم کی۔

پرسنل ڈیٹا پروٹیکشن بل 2019، 3 اگست کو واپس لے لیا گیا تھا جب پارلیمنٹ کی مشترکہ کمیٹی نے اس میں 81 تبدیلیوں اور 12 ’’اہم سفارشات‘‘ کی تھیں۔

یہ بل جسے مرکزی کابینہ نے دسمبر 2019 میں منظور کیا تھا، لوگوں کی واضح اجازت کے بغیر ان کی ذاتی معلومات کے استعمال پر پابندیوں کی تجویز پیش کرتا ہے۔ مسودہ بل میں شامل آئٹمز میں رضامندی، ذاتی ڈیٹا، دی جانے والی چھوٹ، ذاتی ڈیٹا کے ذخیرہ کرنے کی پابندیاں اور انفرادی حقوق شامل ہیں۔

نومبر میں پارلیمانی کمیٹی کے کئی ارکان جن میں کانگریس کے ارکان پارلیمنٹ جے رام رمیش، منیش تیواری، وویک تنکھا اور گورو گوگوئی، ترنمول کانگریس کے قانون ساز ڈیرک اوبرائن اور مہوا موئترا اور بیجو جنتا دل کے امر پٹنائک نے پینل کی جانب سے اس کی منظوری کے بعد اپنی مخالفت کا اظہار کیا تھا۔

انھوں نے یہ بھی کہا تھا کہ یہ بل سپریم کورٹ کے 2017 کے تاریخی فیصلے کے نچوڑ کو حاصل کرنے میں ناکام رہا جس میں نو ججوں کی بنچ نے کہا کہ رازداری کا حق آئین کی دفعہ 21 کے تحت محفوظ ایک بنیادی حق ہے۔

رمیش نے کہا تھا کہ وہ اختلافی نوٹ پیش کرنے پر مجبور ہیں کیوں کہ وہ پینل کو بل کے سیکشن 35 اور 12 میں تجویز کردہ ترامیم کو قبول کرنے کے لیے قائل نہیں کر سکے۔

مجوزہ قانون کی دفعہ 35 نے مرکز کو یہ اختیار دیا کہ وہ ہندوستان کی خودمختاری اور سالمیت، ریاست کی سلامتی، خارجہ تعلقات اور امن عامہ کے مفاد میں کسی بھی سرکاری ایجنسی کو اس بل کے دائرہ کار سے مستثنیٰ کر سکتا ہے۔

سیکشن 12 اس شرط کے استثنا کے لیے فراہم کیا گیا ہے جس کے تحت حکومت افراد کا ذاتی ڈیٹا ان کی رضامندی کے بغیر جمع کر سکتی ہے۔

اگست میں وزارت اطلاعات کے ایک نامعلوم اہلکار نے دی انڈین ایکسپریس کو بتایا تھا کہ نیا بل ڈیٹا کے تحفظ کے وسیع تر نظریات کو شامل کرے گا اور سپریم کورٹ کے 2017 کے فیصلے کے مطابق ہوگا۔