اترپردیش: ہندو دیوتاؤں کی تصویروں والے اخبار میں گوشت کے پکوان کی پیکنگ کے الزم میں ہوٹل کا مسلم مالک گرفتار

نئی دہلی، جون 5: اتوار کے روز اتر پردیش کے سنبھل میں ایک مسلمان کھانے پینے کے ہوٹل والے شخص کو ایسے اخبار میں گوشت کے پکوان لپیٹ کر فروخت کرنے کے الزام میں گرفتار کیا گیا جس پر ہندو دیوتاؤں کی تصویریں چھپی ہوئی تھیں۔

ٹائمز آف انڈیا کے مطابق محمد طالب کو ہندوتوا گروپ ہندو جاگرن منچ کے ضلعی صدر کیلاش گپتا کی شکایت پر گرفتار کیا گیا تھا۔ پی ٹی آئی نے رپورٹ کیا کہ پہلی معلوماتی رپورٹ میں الزام لگایا گیا ہے کہ طالب نے پولیس اہلکاروں پر چاقو سے حملہ کرنے کی بھی کوشش کی، جب وہ اسے گرفتار کرنے آئے۔

اس پر دفعہ 153A (مذہب، نسل، مقام پیدائش، رہائش کی بنیاد پر مختلف گروہوں کے درمیان دشمنی کو فروغ دینا)، 295A (جان بوجھ کر کسی بھی کمیونٹی کے مذہبی جذبات کو مجروح کرنا) اور 307 (قتل کی کوشش) کے تحت مقدمہ درج کیا گیا ہے۔

طالب کے خاندان کے ایک فرد نے ٹائمز آف انڈیا کو بتایا کہ اخبارات کا استعمال کئی سالوں سے کھانے پینے کی اشیا کی پیکنگ کے لیے کیا جاتا ہے۔

اس نے کہا ’’کیا کوئی اخبار کی سرخیوں یا تصویروں کو ریپر کے طور پر استعمال کرنے سے پہلے اسے غور سے دیکھتا ہے؟ کیا اس کے لیے کسی کو جیل بھیجا جا سکتا ہے؟ اس نے کبھی کسی کے جذبات کو ٹھیس نہیں پہنچائی۔‘‘

مہک ریسٹورنٹ، طالب کے ہوٹل، کے ایک کارکن نے بتایا کہ اس کے آجر نے ایک اسکریپ کی دکان سے اخبارات خریدے تھے اور انھیں دوسرے اداروں کی طرح صارفین کے لیے کھانے کی اشیا پیک کرنے کے لیے استعمال کر رہے تھے۔

انھوں نے ٹائمز آف انڈیا کو بتایا ’’یہ ایک عام عمل ہے، لیکن ہمیں یہ احساس نہیں تھا کہ اخبارات میں ہندو دیوتاؤں کی تصویریں تھیں۔ ہم کسی کے جذبات کو ٹھیس پہنچانا نہیں چاہتے۔‘‘

ایک پولیس افسر نے بتایا کہ نوراتری کے تہوار کے دوران شائع ہونے والی ہندو دیوتاؤں کی تصویروں والا ایک اخبار کھانے کے کمرے سے ملا ہے۔

سرکل آفیسر جتیندر کمار نے کہا ’’اتوار کی شام کو شکایت موصول ہونے کے بعد پولیس ہوٹل پہنچی اور جارحانہ مواد کو ضبط کر لیا۔ چونکہ معاملہ حساس ہے، ہم نے فوری طور پر ایف آئی آر درج کی اور ایک مخصوص کمیونٹی کے مذہبی جذبات کو ٹھیس پہنچانے کے الزام میں ہوٹل کے مالک کو گرفتار کر لیا۔‘‘