فلسطین کی حمایت میں منعقدہ اجتماع کے خلاف بی جے پی  کے کارروائی  کے  مطالبہ پر کیرالہ کے وزیر اعلیٰ کی دو ٹوک

نئی دہلی ،31 اکتوبر :۔

بی جے پی پورے ملک میں ہونے والے فلسطین کی حمایت میں مظاہروں کے خلاف سر گرم ہے ۔ اس سسلے میں بی جے پی حکومتوں کی جانب سے متعدد ریاستوں میں جلوس نکالنے والوں اور فلسطین کی حمایت میں پوسٹ کرنے والوں کے خلاف مقدمات درج کئے گئے اور ان کی گرفتاری بھی عمل میں آئی مگر کیرالہ میں بی جے پی کو کامیابی نہیں ملی ۔

گزشتہ دنوں کیرالہ میں بڑے پیمانے پر فلسطین کی حمایت میں مظاہرہ کا انعقاد کیا گیا جس میں حماس کے رہنما خالد مشعل نے بھی ورچوئل طریقے سے شرکت کی اور خطاب کیا۔ جس پر بی جے پی چراغ پا ہے اور مسلسل تنقید کر رہی ہے ۔اسی سلسلے میں کیرالہ حکومت سے بی جے پی نے مظاہرہ کا انعقاد کرنے والوں کے خلاف کارروائی کا مطالبہ کیا ہے جس پر کیرالہ کے وزیر اعلیٰ نے بی جے پی کو دو ٹوک سنا دی ہے ۔وزیر اعلیٰ نے کہا کہ بھارتیہ جنتا پارٹی صرف فلسطین کی حمایت کرنے پر لوگوں کے خلاف مقدمات درج کرانے کی کوشش کر رہی تھی، لیکن کیرالہ میں یہ کوششیں کام نہیں آئیں گی، پیر کو وزیر اعلیٰ پنارائی وجین نے  بی جے پی کی امیدوں پر پانی پھیر دیا۔

وجین جمعہ کو ملاپورم میں ایک پروگرام میں حماس کے سابق سربراہ کے ورچوئل خطاب کے بارے میں مرکزی وزیر راجیو چندر شیکھر اور بی جے پی کے نفرت انگیز تبصروں پر جوابی حملہ کر رہے تھے۔

انہوں نے کہا کہ "یہ یہاں نہیں ہونے والا ہے۔ ہم اور ہمارا ملک ہمیشہ فلسطینی عوام کے ساتھ رہا ہے۔ کہا جاتا ہے کہ ایک فلسطینی جنگجو نے اس ریلی سے خطاب کیا تھا۔ میں جو سمجھتا ہوں وہ یہ ہے کہ یہ ایک ریکارڈ شدہ ویڈیو تھی۔ عام طور پر جب جماعت اسلامی یا کوئی دوسری تنظیم جلسوں کی اجازت مانگتی ہے تو پولیس عموماً اجازت دیتی ہے۔ اس میٹنگ کو بھی اس طرح کی اجازت دی گئی تھی۔

انہوں نے مزید کہا کہ "اس میٹنگ میں، اگر کچھ ایسا ہوا جو نہیں ہونا چاہیے تھا، تو پولیس اس کی جانچ کرے گی اور ضروری اقدامات کرے گی۔۔

بی جے پی اور دیگر ہندوتوا تنظیموں نے مسلم مخالف مہم چلائی ہے اور جماعت اسلامی کے یوتھ ونگ سالیڈیریٹی یوتھ موومنٹ کے زیر اہتمام جمعہ کے پروگرام کی تحقیقات کا مطالبہ کیا ہے۔ فلسطینی مزاحمتی تحریک حماس کے سابق سربراہ خالد مشعل نے عملی طور پر فلسطین نواز ریلی سے خطاب کیاتھا۔

فلسطینی مزاحمتی رہنما اور حماس کے سیاسی بیورو کے سابق سربراہ مشعل نے عربی میں اپنے خطاب میں اس بات کا اعادہ کیا کہ اسرائیلی قبضے کے خلاف مزاحمت جاری رہے گی۔

انہوں نے کہا: "ہمیں اسرائیلی قبضے کے خلاف اپنے معاشرے میں بڑے پیمانے پر احتجاج کا مشاہدہ کرنا چاہیے۔ سب سے پہلے، ہمیں متحد ہو کر سڑکوں پر نکلنا چاہیے، مختلف اقوام میں فلسطین کاز کے لیے ریلیاں نکالنا چاہیے اور امریکی سامراج کے خلاف بھی احتجاج کرنا چاہیے، جو ہمارے معاشرے کو متاثر کرنے والے صہیونی اقدامات میں شریک ہے۔ دوم، غزہ میں ہمارے بھائیوں کو فوری طور پر انسانی اور مالی امداد کی ضرورت ہے۔ تیسرا، ہمیں چوکنا رہنا چاہیے، جاری ناانصافیوں سے باخبر رہنا چاہیے۔ سوشل میڈیا اور میڈیا کی دیگر اقسام کا استعمال کرتے ہوئے، ہمیں اسرائیل کی طرف سے پھیلائی جانے والی غلط معلومات کا مقابلہ کرنا چاہیے اور فلسطینی جدوجہد کے ساتھ یکجہتی کے لیے کھڑے ہونا چاہیے۔‘‘