دہلی میں وائرس پھیل رہا ہے، ابھی لاک ڈاؤن میں نرمی نہیں کی جائے گی: کیجریوال

نئی دہلی، 19 اپریل: وزیر اعلی اروند کیجریوال نے آج کہا دہلی کی حکومت نے فیصلہ کیا ہے کہ قومی دارالحکومت میں کورونا وائرس کے بڑھتے پھیلاؤ کی وجہ سے جاری لاک ڈاؤن میں نرمی نہیں کی جائے گی۔

ویڈیو کانفرنس سے خطاب کرتے ہوئے کیجریوال نے کہا کہ حکومت ایک ہفتے بعد صورت حال کا دوبارہ جائزہ لے گی۔

انھوں نے کہا کہ وائرس پھیل رہا ہے، کنٹینمنٹ زونز میں اضافہ ہوا ہے۔ لیکن انھوں نے یقین دلایا کہ صورت حال قابو میں ہے۔ انھوں نے مزید کہا ’’ایسی مثالیں بھی موجود ہیں جہاں علامات کے بغیر لوگ کوویڈ 19 سے متاثر پائے گئے۔‘‘

وزیراعلیٰ نے نشان دہی کی کہ ملک بھر میں پائے جانے والے کیسوں میں سے 12 فیصد معاملات دہلی میں ہیں۔

انھوں نے بتایا کہ شہر میں اب تک 1،933 کورونا وائرس کے کیسز رپورٹ ہوئے ہیں۔