’’ہم ٹویٹر کو بند کردیں گے‘‘: سابق سی ای او کا دعویٰ ہے کہ کسانوں کے احتجاج کے دوران ہندوستانی حکومت نے پلیٹ فارم پر دباؤ ڈالا

نئی دہلی، جون 13: ٹوئٹر کے شریک بانی جیک ڈورسی نے پیر کے روز کہا کہ بھارتی حکام نے کمپنی کو دھمکی دی تھی کہ اگر اس نے کسانوں کے احتجاج کے دوران اختلافی آوازوں کے خلاف کارروائی نہیں کی تو وہ ملک میں اس مائیکرو بلاگنگ پلیٹ فارم کو بند کر دیں گے۔

ڈورسی نے یہ تبصرے یوٹیوب چینل بریکنگ پوائنٹس کے ساتھ انٹرویو کے دوران کیے، جب ان سے غیر ملکی حکومتوں کی جانب سے اپنے مطالبات کی تعمیل کے لیے ٹوئٹر پر دباؤ ڈالنے کی مثالیں دینے کو کہا گیا۔

ٹویٹر کے سابق چیف ایگزیکٹیو آفیسر نے کہا ’’مثال کے طور پر ہندوستان نے کسانوں کے احتجاج کے بارے میں ہم سے بہت سی درخواستیں کی تھیں – خاص صحافیوں کے ارد گرد جو حکومت پر تنقید کر رہے تھے۔ ایسا کہا گیا ’’ہم ہندوستان میں ٹویٹر بند کر دیں گے‘‘…اور ’’ہم آپ کے ملازمین کے گھروں پر چھاپے ماریں گے‘‘، جو انھوں نے کیا بھی۔‘‘

ڈورسی نے کہا کہ ہندوستانی حکام نے دھمکی دی تھی کہ اگر کمپنی نے ان کی درخواستوں پر عمل نہیں کیا تو وہ ملک میں ٹویٹر کے دفاتر کو بند کر دیں گے۔ ڈورسی نے کہا ’’…اور یہ ہندوستان ہے، ایک جمہوری ملک۔‘‘

لیکن الیکٹرانکس اور ٹیکنالوجی کے مرکزی وزیر مملکت راجیو چندر شیکھر نے منگل کو ڈورسی کے ان دعووں کو سراسر جھوٹ قرار دیتے ہوئے مسترد کر دیا۔

انھوں نے دعویٰ کیا "ڈورسی کے ٹویٹر کو ہندوستانی قانون کی خودمختاری کو قبول کرنے میں ایک مسئلہ تھا۔ اس نے ایسا برتاؤ کیا جیسے ہندوستان کے قوانین اس پر لاگو نہیں ہوتے ہیں۔ ہندوستان ایک خودمختار ملک کے طور پر اس بات کو یقینی بنانے کا حق رکھتا ہے کہ ہندوستان میں کام کرنے والی تمام کمپنیاں اس کے قوانین کی پیروی کریں۔‘‘

چندر شیکھر نے کہا کہ ’’کسانوں کے احتجاج کے دوران بہت ساری غلط معلومات تھیں اور ’’نسل کشی کی رپورٹیں بھی‘‘ جو یقینی طور پر جعلی تھیں۔ ایسا لگتا ہے کہ وہ #ModiPlanningFarmerGenocide ہیش ٹیگ کے ساتھ 2021 سے ٹویٹس کا حوالہ دے رہا تھا، جسے مرکز نے ٹویٹر کو روکنے کی ہدایت کی تھی۔‘‘

مرکزی وزیر نے منگل کو مزید کہا کہ ’’ریکارڈ کو صاف کرنے کے لیے کسی پر چھاپہ نہیں مارا گیا اور نہ ہی کسی کو جیل بھیجا گیا۔ ہماری توجہ صرف ہندوستانی قوانین کی تعمیل کو یقینی بنانے پر تھی۔‘‘

This is an outright lie by @jack – perhaps an attempt to brush out that very dubious period of twitters history

Facts and truth@twitter undr Dorsey n his team were in repeated n continuous violations of India law. As a matter of fact they were in non-compliance with law… https://t.co/SlzmTcS3Fa

— Rajeev Chandrasekhar ???????? (@Rajeev_GoI) June 13, 2023

تاہم کئی اپوزیشن لیڈروں نے مرکزی حکومت کی جانب سے ٹوئٹر پر دباؤ کے بارے میں ڈورسی کے دعووں پر سخت رد عمل ظاہر کیا۔ انڈین یوتھ کانگریس کے صدر سری نواس بی وی نے ٹویٹر پر انٹرویو کے اقتباسات اس عنوان کے ساتھ شیئر کیے: ’’مدر آف ڈیموکریسی – ان فلٹرڈ۔‘‘

شیو سینا (ادھو بالا صاحب ٹھاکرے) کی رکن پارلیمنٹ پرینکا چترویدی نے الزام لگایا کہ مرکز میں بھارتیہ جنتا پارٹی کی قیادت والی حکومت نے ’’کسانوں کی حمایت کرنے والوں کی آوازوں کو خاموش کرنے کے لیے سوشل میڈیا پلیٹ فارم پر دباؤ ڈالنے کی کوشش کی۔‘‘

فروری 2021 میں حکومت نے ٹوئٹر سے ایسے سینکڑوں اکاؤنٹس کو ہٹانے کو کہا تھا، جنھوں نے نومبر 2020 میں شروع ہونے والے کسانوں کے بڑے پیمانے پر ہونے والے مظاہروں کو سنبھالنے پر مرکز کو تنقید کا نشانہ بنایا تھا۔ سوشل میڈیا پلیٹ فارم نے شروع میں ایسا کرنے سے انکار کر دیا تھا، لیکن آخر کار اس کے مقامی ملازمین کو دھمکیاں ملنے کے بعد اس نے حکومت کے حکم کی تعمیل کی۔

مرکز نے مئی 2021 میں نافذ ہونے والے انفارمیشن ٹکنالوجی کے نئے قواعد کی پوری طرح تعمیل نہ کرنے پر ٹویٹر پر بار بار تنقید کی تھی۔

اگست میں ٹوئٹر کے سابق سیکیورٹی چیف پیٹر زٹکو نے الزام لگایا تھا کہ ہندوستانی حکومت نے سوشل میڈیا کمپنی کو مجبور کیا کہ وہ اس کے ایک ’’ایجنٹ‘‘ کو پے رول پر رکھے۔ زٹکو نے یہ بھی الزام لگایا تھا کہ اس ’’ایجنٹ‘‘ کو اس وقت صارف کے ڈیٹا تک رسائی دی گئی تھی، جب حکومت کو ’’شدید احتجاج‘‘ کا سامنا تھا۔