سپریم کورٹ 17 اکتوبر سے شہریت کے قانون کی دفعہ 6A کو چیلنج کرنے والی عرضیوں کی سماعت کرے گا

نئی دہلی، ستمبر 21: سپریم کورٹ نے بدھ کے روز کہا کہ وہ 17 اکتوبر سے شہریت کے قانون 1955 کے سیکشن 6A کی آئینی جواز کو چیلنج کرنے والی عرضیوں کے ایک بیچ کی سماعت شروع کرے گا۔

چیف جسٹس ڈی وائی چندر چوڑ، جسٹس اے ایس بوپنا، ایم ایم سندریش، جے بی پاردی والا اور منوج مشرا کی آئینی بنچ ان درخواستوں کی سماعت کرے گی۔

ایکٹ کی دفعہ 6A ایک خاص شق ہے جو 1985 کے آسام معاہدے کے تحت آنے والوں کی شہریت سے متعلق ہے۔

آسام معاہدہ مرکز، ریاستی حکومت اور سماجی تنظیموں کے درمیان ایک معاہدہ ہے، جس نے غیر ملکیوں کی ملک بدری کے لیے احتجاج کی قیادت کی تھی۔ سیکشن 6A، جو 1985 میں شہریت ایکٹ میں داخل کیا گیا تھا، میں کہا گیا ہے کہ جو لوگ یکم جنوری 1966 سے 25 مارچ 1971 کے درمیان بنگلہ دیش سے آسام آئے تھے، انھیں اس ایکٹ کے تحت ہندوستانی شہریت کے لیے خود کو رجسٹر کرانا ہوگا۔

اس سیکشن کو چیلنج کرنے والی سترہ درخواستیں سپریم کورٹ میں زیر التوا ہیں۔

آسام سنملیتا مہاسنگھ، درخواست گزاروں میں سے ایک، نے استدلال کیا ہے کہ دفعہ 6A امتیازی اور من مانی ہے کیوں کہ یہ آسام میں داخل ہونے والے غیر دستاویزی تارکین وطن اور ملک کے باقی حصوں میں داخل ہونے والوں کو شہریت دینے کے لیے مختلف کٹ آف تاریخیں فراہم کرتی ہے۔ تنظیم نے یہ عرضی 2012 میں دائر کی تھی۔

تاہم دی ہندو کی خبر کے مطابق مرکزی حکومت نے اصرار کیا ہے کہ یہ دفعہ درست ہے اور اس نے عدالت سے یہ درخواستیں خارج کرنے کی درخواست کی ہے۔

دسمبر 2014 میں سپریم کورٹ نے 13 سوالات کیے تھے، جن میں یہ بھی شامل تھا کہ آیا اس شق نے آسام کے شہریوں کے ’’سیاسی حقوق‘‘ کو کمزور کیا ہے اور کیا اس سے آسامی لوگوں کے اپنے ثقافتی حقوق کے تحفظ کے حقوق کی خلاف ورزی ہوئیہے اور کیا ہندوستان میں غیر قانونی تارکین وطن کی آمد کا سلسلہ شروع ہوا ہے؟

تاہم 10 جنوری کو سپریم کورٹ نے کہا کہ اس معاملے میں ابتدائی مسئلہ یہ ہے کہ آیا یہ سیکشن ’’کسی آئینی کمزوری کا شکار ہے‘‘ یا نہیں۔