نئی دہلی، نومبر 26: جموں وکشمیر کی تحقیقاتی ایجنسی (ایس آئی اے) نے ہفتے کے روز جنوبی ضلع اننت ناگ میں جماعت اسلامی کی جائیدادوں کا پتہ لگا کر اُنہیں ضبط کر لیا ہے۔
پولیس ذرائع نے بتایا کہ (یو اے پی اے) کی شق 8 کے تحت ضلع مجسٹریٹ اننت ناگ نے ممنوعہ تنظیم جماعت اسلامی کی جائیدادوں کو ضبط کیا۔
انہوں نے کہاکہ ضبط شدہ جائیداد میں شاپنگ کمپلیکس، باغات، زرعی اراضی اور رہائشی مکان، ایک کنال چار مرلہ اراضی جس میں دو منزلہ عمارت اور فلاح عام ٹرسٹ کا دفتر بھی شامل ہے، کو ضبط کرنے کی کاروائی کی گئی۔
ذرائع نے بتایا کہ رکھ مومن میں 30 کنال ایک مرلہ اراضی، سروے نمبر 797 کے تحت جنوبی ضلع اننت ناگ کے مٹن میں 12 مرلہ اراضی پر ایک دو منزلہ رہائشی مکان بھی شامل جو خسرہ نمبر 2222 کے تحت جماعت اسلامی کے نام پر تبدیل کیا گیا ہے۔
معلوم ہوا ہے کہ ضبط شدہ جائیداد میں اننت ناگ کے سرسائی میں 16 مرلہ زمین اور اننت ناگ میں چھ کنال، اننت ناگ میں دس مرلہ کے علاوہ ضلع میں دیگر جائیدادیں بھی شامل ہیں۔
اس سے قبل تحقیقاتی ایجنسی (ایس آئی اے) نے 10 نومبر کو جنوبی ضلع شوپیاں میں بھی جماعت اسلامی سے وابستہ کروڑوں روپیہ مالیت کی جائیدادوں کو ضبط کیا تھا۔