کورونا وائرس: دہلی کے کچھ اسپتالوں میں آکسیجن کی فراہمی کی گئی، لیکن قلت کے خدشات لگاتار برقرار

نئی دہلی، اپریل 21: پی ٹی آئی کی خبر کے مطابق دہلی کے کچھ بڑے سرکاری اور نجی اسپتالوں کو کورونا وائرس کے مریضوں کے علاج کے لیے مرکز سے فوری مدد طلب کرنے کے بعد آج صبح طبی آکسیجن کی فراہمی کی گئی ہے۔ گذشتہ روز سرکاری اسپتالوں نے کہا تھا کہ ان کے پاس صرف آٹھ سے بارہ گھنٹے تک کے لیے ہی آکسیجن موجود ہے، جب کہ کچھ نجی اسپتالوں میں صرف چار یا پانچ گھنٹوں کے لیے اسٹاک موجود ہے۔

سر گنگا رام اسپتال اور گرو تیغ بہادر اسپتال جیسے بڑے اسپتال میں بھی آکسیجن صرف کچھ گھنٹوں کے لیے بچی تھی۔ لیکن حکام کا کہنا ہے کہ بحران کا خاتمہ وقت پر کیا گیا۔

گنگا رام اسپتال کو صبح 3 بجے سے پہلے ایک نجی فروخت کنندہ سے ساڑھے 4 ہزار کیوبک میٹر آکسیجن کی فراہمی ہوئی۔ ایک اور سپلائر نے بعد میں 6،000 کیوبک میٹر آکسیجن بھیجا۔

چیئر پرسن ڈی ایس رانا نے این ڈی ٹی وی کو بتایا ’’اس وقت کل ضرورت 11،000 کیوبک میٹر کی ہے۔ سپلائی کل صبح 9 بجے تک 24 گھنٹے جاری رہنی چاہیے۔ انڈین آکسیجن اور آئینوکس نے دن کے دوران ٹینکوں کو دوبارہ بھرنے کا وعدہ کیا ہے۔‘‘

گنگا رام اسپتال میں تمام 132 آئی سی یو بیڈز پر قبضہ کر لیا گیا ہے۔ غیر آئی سی یو وارڈ کے 487 میں سے صرف تین بستر خالی ہیں۔

گرو تیغ بہادر اسپتال کے ایک عہدیدار نے پی ٹی آئی کو بتایا کہ ایک فرم سے آکسیجن لانے والا ایک ٹرک صبح قریب ڈیڑھ بجے یہاں پہنچا۔ منگل کی رات 10.20 بجے کے لگ بھگ وزیر صحت ستیندر جین نے کہا تھا کہ دہلی کے دوسرے بڑے اسپتال، جی ٹی بی اسپتال میں آکسیجن اسٹاک صبح 2 بجے سے زیادہ نہیں چل سکتا ہے اور انھوں نے نریندر مودی حکومت سے مدد طلب کی ہے۔

مشرقی دہلی کے پٹپڑ گنج کے میکس اسپتال کے عہدیداروں نے این ڈی ٹی وی کو بتایا کہ آکسیجن فرم آئینوکس کی ایک کھیپ کو آکسیجن کے ساتھ صبح 2 بجے پہنچنا تھا، لیکن وہ صبح آٹھ بجے پہنچا۔ ان کا کہنا تھا کہ چھ گھنٹے کی تاخیر ایک ’’ڈراؤنے خواب‘‘ کی طرح تھی۔ انھوں نے مزید کہا کہ آکسیجن کا ذخیرہ بدھ کی سہ پہر سے زیادہ نہیں چلے گا۔ اسپتال میں داخل 300 مریضوں میں سے 200 آکسیجن سپورٹ پر ہیں۔

دریں اثنا دہلی میں گذشتہ ایک دن میں ریکارڈ 28،395 کورونا وائرس معاملات ریکارڈ کیے گئے اور 277 اموات درج کی گئیں۔ پچھلے سال مارچ میں دہلی میں وبائی بیماری پھیلنے کے بعد سے یہ معاملات اور اموات دونوں اعتبار سے سب سے بڑا یک روزہ اضافہ ہے۔ مریضوں کے علاج کے لیے آکسیجن کی سنگین قلت کے درمیان شہر میں مثبت ہونے کی شرح 32.82 تک بڑھ گئی ہے۔