کورونا وائرس: ہندوستان تین لاکھ سے زیادہ اموات ریکارڈ کرنے والا تیسرا ملک بنا، گذشتہ ایک دن میں 2.22 لاکھ نئے کیسز درج ہوئے

نئی دہلی، مئی 24: وزارت صحت کے اعداد و شمار کے مطابق ملک میں گذشتہ 24 گھنٹوں کے دوران 4،454 اموات ہونے کے بعد آج ملک میں کورونا وائرس سے ہونے والی اموات کی تعداد 3 لاکھ سے تجاوز کر گئی۔ ہندوستان ریاستہائے متحدہ اور برازیل کے بعد 3 لاکھ سے زیادہ اموات ریکارڈ کرنے والا تیسرا ملک بن گیا ہے۔

دریں اثنا گذشتہ ایک دن میں 2،22،315 نئے کیسز کے ساتھ متاثرین کی مجموعی تعداد 2،67،52،447 تک پہنچ گئی۔ جب کہ اموات کی مجموعی تعداد 3،03،720 تک جاپہنچی ہے۔ ملک میں فعال کیسز 27،20،716 ہیں

حکومت نے بتایا کہ ابھی تک 19،50،04،184 سے زائد افراد کو ویکسین دی جاچکی ہے۔

اتوار کے روز گگن دیپ کانگ نے کہا کہ ہندوستان نے بین الاقوامی مارکیٹ میں کورونا وائرس ویکسین خریدنے کے عمل میں تاخیر کی ہے اور اب اس کے پاس بین الاقوامی منڈی میں ویکسین کے صرف چند آپشن ہی باقی بچے ہیں۔

دریں اثنا حکومت پنجاب نے کہا کہ ریاستہائے متحدہ کی دوا ساز کمپنی موڈیرنا نے اپنی سرکاری پالیسی کا حوالہ دیتے ہوئے براہ راست ریاست کو کورونا وائرس ویکسین کی فراہمی سے انکار کردیا ہے۔ کمپنی صرف مرکز کے ساتھ ہی معاملات کر سکتی ہے۔ ویکسینیشن کے ریاستی نوڈل آفیسر وکاس گرگ نے کہا کہ امریندر سنگھ حکومت جانسن اینڈ جانسن سمیت تمام ممکنہ ذرائع سے ویکسین خریدنے کے لیے عالمی سطح پر ٹینڈر کے امکانات کی تلاش کر رہی ہے۔

دہلی اور مہاراشٹر سمیت کچھ دیگر ریاستوں نے بھی کہا ہے کہ ان کے پاس 18 سے 45 سال کے درمیان افراد کو ٹیکے لگانے کے لیے ناکافی سامان ہے۔

دریں اثنا وبائی مرض کی دوسری لہر کو سنبھالنے پر شدید تنقید کا سامنا کرنے والی بھارتیہ جنتا پارٹی کے صدر جے پی نڈا نے ملک بھر میں پارٹی کارکنوں کو لکھا ہے کہ وہ صحت کے بحران سے نمٹنے کے لیے اپنی سرگرمیوں میں اضافہ کریں۔