افغانستان، پاکستان اور بھارت میں شدید زلزلے کے جھٹکے محسوس کیے گئے، پڑوسی ممالک میں11 افراد ہلاک
نئی دہلی، مارچ 22: منگل کی رات پاکستان، افغانستان اور بھارت میں 6.5 شدت کے زلزلے کے جھٹکوں سے کم از کم 11 افراد ہلاک اور سینکڑوں زخمی ہو گئے۔
امریکی جیولوجیکل سروے کے مطابق زلزلے کا مرکز شمال مشرقی افغانستان میں جرم کے قریب تھا اور اس کی گہرائی 187 کلومیٹر تھی۔
تاہم پاکستان کے محکمۂ موسمیات نے زلزلے کی شدت 6.8 بتائی اور بعد میں افغانستان کے ساتھ ملک کی سرحد کے ساتھ ہندوکش پہاڑی سلسلے میں 3.7 آفٹر شاک کی اطلاع دی۔
پاکستان کی ایمرجنسی سروسز کے ترجمان بلال فیضی اور دیگر حکام نے خبر رساں ایجنسی اے پی کو بتایا کہ ملک کے مختلف حصوں میں کچھ گھروں کی چھتیں گرنے سے نو افراد ہلاک ہوئے۔
پولیس افسر شفیع اللہ گنڈا پور نے دی ڈان کو بتایا کہ پاکستان کے شمالی ضلع سوات میں 150 افراد زخمی ہوئے ہیں، جنھیں علاج کے لیے ہسپتال منتقل کیا جا رہا ہے۔
افغانستان کی آفات سے نمٹنے کی وزارت کے ترجمان شفیع اللہ رحیمی نے روئٹرز کو بتایا کہ زلزلے کے باعث صوبہ لغمان میں دو افراد ہلاک ہوئے۔
20 کے قریب دیگر افراد کے زخمی ہونے کی اطلاع ہے۔
افغانستان کی وزارت صحت کے ترجمان شرافت زماں نے کہا کہ ’’بدقسمتی سے اور زیادہ جانی نقصان ہو سکتا ہے کیوں کہ زلزلہ نہایت شدید تھا۔‘‘
طالبان کے ترجمان ذبیح اللہ مجاہد نے ٹوئٹر پر کہا کہ وزارت صحت عامہ نے تمام مراکز صحت کو اسٹینڈ بائی پر رہنے کو کہا ہے۔
پاکستان میں وزیر اعظم شہباز شریف نے ملک کے ڈیزاسٹر مینجمنٹ حکام کو ہدایت کی کہ وہ کسی بھی ہنگامی صورتحال سے نمٹنے کے لیے چوکس رہیں۔
ہندوستان میں زلزلے کے جھٹکے پورے شمالی علاقے میں محسوس کیے گئے، بشمول دہلی، جموں و کشمیر، ہریانہ، پنجاب، ہماچل پردیش، اتراکھنڈ اور راجستھان۔ ابھی تک ہندوستان میں کسی جانی یا مالی نقصان کی کوئی اطلاع نہیں ہے۔