نئی دہلی: کانگریس کے معروف رہنما اور سابق وزیر خزانہ پی چدمبرم نے کہا ہے کہ وزیر اعظم نریندر مودی کی قیادت والی حکومت میں کساد بازاری کی وجہ سے ملک نہ صرف اقتصادی طور پر بلکہ سیاسی طور پر بھی الگ تھلگ پڑ گیا ہے اور پوری دنیا پوچھ رہی ہے کہ آخر ہندوستان میں کیا ہو رہا ہے۔
انھوں نے کہا کہ سیاسی سطح پر اس ملک کو بابائے قوم مہاتما گاندھی، پنڈت جواہر لال نہرو اور بابا صاحب ڈاکٹر بھیم راؤ امبیڈکر کے ہندوستان کے بجائے گولوالکر اور ساورکر کے نظریات کا ملک بنایا جا رہا ہے۔ انھوں نے کہا کہ ملک اقتصادی اور سیاسی سطح پر غیر مستحکم ہو گیا ہے اور پوری دنیا میں ہم اکیلے پڑ گئے ہیں۔ جموں و کشمیر میں حالات ٹھیک نہیں ہے اور شمال مشرقی جل رہا ہے۔ جاپان کے وزیر اعظم شنزو آبے نے ہندوستان کا دورہ منسوخ کردیا۔ یہاں تک کی بنگلہ دیش کے وزرا نے بھی ہندوستان کا پروگرام ملتوی کر دیا ہے۔ اس طرح سے ہم پوری دنیا میں اقتصادی اور سیاسی سطح پر الگ تھلگ پڑ گئے ہیں۔