نئی دہلی، 7 جنوری: سخت سیکیورٹی کے درمیان آج کسانوں نے تینوں زرعی قوانین کے خلاف احتجاجی مقامات سنگھو، ٹکری اور غازی پور کی سرحدوں سے اپنے ٹریکٹر مارچ کا آغاز کیا۔
بھارتی کسان یونین (ایکتا اُگرہن) کے سربراہ جوگندر سنگھ اُگرہن نے کہا کہ کسانوں نے مارچ میں 3،500 سے زیادہ ٹریکٹر اور ٹرالیوں کے ساتھ حصہ لیا۔
کسانوں نے غازی پور بارڈر سے پلوال تک ٹریکٹر ریلی نکالی۔
احتجاج کرنے والے کسان یونینوں کے مطابق یہ ان کی 26 جنوری کے مجوزہ ٹریکٹر پریڈ کے لیے صرف ’’مشق‘‘ ہے جو ہریانہ، پنجاب اور اتر پردیش کے مختلف حصوں سے قومی دارالحکومت میں داخل ہوگی۔
دہلی پولیس اور ہریانہ پولیس کے عملہ کی بھاری نفری کے درمیان کسانوں نے صبح گیارہ بجے کے لگ بھگ ٹریکٹر مارچ شروع کیا اور کنڈلی مانیسر۔ پلوال ایکسپریس وے کی طرف بڑھا۔
سینئر بی کے یو رہنما راکیش ٹکیت کی سربراہی میں ٹریکٹر مارچ پلوٹو کی طرف بڑھا۔
انھوں نے کہا ’’آنے والے دنوں میں ہم تینوں زرعی قوانین کے خلاف اپنا احتجاج تیز کردیں گے۔ آج کے مارچ میں ہریانہ سے لگ بھگ 2500 ٹریکٹر شریک ہوئے ہیں۔‘‘
ایک اور کسان رہنما نے کہا ’’ہم انتباہ کرنا چاہتے ہیں کہ اگر حکومت ہمارے مطالبات کو قبول نہیں کرتی ہے تو کسانوں کا احتجاج مزید شدت اختیار کرے گا۔‘‘
شدید سردی اور تیز بارش کے باوجود ہزاروں کسان 40 دن سے دہلی کے متعدد سرحدی مقامات پر ڈیرے ڈالے ہوئے ہیں اور نئے زرعی قوانین کے خاتمے کا مطالبہ کر رہے ہیں۔
کسان یونینوں اور تین مرکزی وزرا کے مابین مذاکرات کا ساتواں دور پیر کے روز بے نتیجہ رہا تھا۔ مذاکرات کا اگلا دور کل ہونے والا ہے۔