ترکی کے ساتھ تعلقات میں کشیدگی، بھارت کی جانب سے سفری ہدایات جاری

نئی دہلی : بھارت نے بدھ کے روز ترکی جانے والے اپنے شہریوں کے لیے سفری ہدایات (ٹریول ایڈوائزری)جاری کر کے کہا کہ وہ اپنے سفر کے دوران بہت محتاط رہیں۔ بھارت نے سفری ہدایات بظاہر ترکی کے شمالی شام پر حملے کے نتیجے میں پیدا ہونے والی خطے کی صورت حال کے پیش نظر جاری کی ہیں لیکن خیال کیا جاتا ہے کہ بھارت نے یہ ہدایات ترک صدر رجب طیب ایردوآن کے کشمیر پر موقف کی وجہ سے جاری کی ہیں۔ حال ہی میں ترک اردوآن کے اقوام متحدہ کے فورم پر جموں و کشمیر کے معاملے پر پاکستان کے موقف کی پُر زور حمایت کی تھی۔ یہی وجہ ہے کہ سفری ہدایات کو ترکی کے خلاف بھارت کی سفارتی حکمت عملی کے طور پر دیکھا جا رہا ہے۔

اس سے قبل وزیر اعظم نریندر مودی کا دورہ ترکی بھی منسوخ کردیا گیا تھا۔بھارت نے گذشتہ ہفتے یہ دورہ منسوخ کردیا تھا۔ 2014 میں مودی کے وزیر اعظم بننے کے بعد یہ ان کا ترکی کا پہلا دورہ تھا۔ دونوں فریقین نے دو روزہ دورے پر اصولی طور پر اتفاق کیا لیکن باضابطہ طور پر کسی بھی چیز کا اعلان نہیں کیا گیا۔ مودی اگلے ہفتے سعودی عرب کے دورے کے بعد انقرہ کا دورہ کرنے والے تھے۔ بھارت کی طرف سے کہا گیا ہے کہ چونکہ دورے کا باضابطہ طور پر اعلان نہیں کیا گیا تھااور نہ ہی اسے حتمی شکل ہی دی گئی تھی ، لہذ اسے منسوخ کرنے کی ضرورت نہیں ہے۔

واضح رہے کہ گذشتہ ماہ اقوام متحدہ کی جنرل اسمبلی سے خطاب کے دوران ایردوآن نے کشمیر کے بارے میں پاکستان کے مؤقف کی بھرپور حمایت کی اور بھارت پر انسانی حقوق کی وسیع پیمانے پر خلاف ورزیوں کا الزام لگایاتھا ۔ بعد میں انہوں نے اعلان کیا کہ وہ مسئلہ کشمیر کو تمام فورمز میں اٹھائیں گے۔

پیرس میں فنانشل ایکشن ٹاسک فورس (ایف اے ٹی ایف) کے اجلاس میں ملائیشیا اور چین کے ساتھ ترکی نے بھی پاکستان کی حمایت کی۔ سفری ہدایات جاری کرنے والی حکومت ہند نے حالانکہ یہ واضح کیا کہ ابھی تک ترکی میں بھارتی شہریوں کو کوئی نقصان نہیں پہنچا ہے۔

سفری ہدایات میں کہا گیا ہے ، ’’ترکی کی موجودہ صورتحال کے پیش نظر ، وہاں جانے والے بھارتی شہریوں سے پوچھ گچھ کی جارہی ہے۔ اگرچہ ابھی تک ملک میں کسی ناخوشگوار واقعے کی کوئی اطلاع موصول نہیں ہوئی ہے ، تاہم مسافر ین ترکی سے سفر کرتے وقت انتہائی احتیاط برتنے کی اپیل کی جاتی ہے۔ ‘‘

علاوہ ازیں ہدایات میں کہا گیا ہے کہ بھارتی شہری انقرہ میں بھارتی سفارتخانے سے ہیلپ لائن نمبروں کے ذریعے رابطہ کرسکتے ہیں۔ سفارتخانے کی طرف سے ہیلپ لائن نمبر بھی جاری کردیئے گئے ہیں۔ شہری کسی بھی امداد یا معلومات کے لیے 903124408259 ، 903124382195 ، 902122962131 اور 902122962132 پر رابطہ قائم کر سکتے ہیں۔

یہ خیال کیا جاتا ہے کہ بھارت کی سفری ہدایات سے ترکی پر اثر پڑے گا جو کہ حالیہ دنوں میں بھارتی سیاحوں کے لیے پسندیدہ مقامات کے طور پر ابھرا ہے۔ اس سال جنوری اور جولائی کے درمیان ، ایک لاکھ چوبیس ہزار بھارتی سیاح ترکی کا دورہ کرچکے ہیں ، یہ تعداد گزشتہ سال کے مقابلے 56 فیصد زیادہ ہے۔