آسام: سی اے اے مخالف احتجاج کے دوران مرکزی وزیر کے گھر پر حملہ کرنے کے الزام میں دو بی جے پی کارکن گرفتار

گوہاٹی، فروری 5: گذشتہ سال 11 دسمبر کو منظور ہونے والے سی اے اے مخالف مظاہروں کے دوران بالائی آسام کے دلیاجان میں مرکزی وزیر مملکت برائے خوراک رامیشور تیلی کے گھر پر مبینہ طور پر حملہ کرنے کے الزام میں دو بی جے پی کارکنوں سمیت مجموعی طور پر 18 افراد کو گرفتار کیا گیا ہے۔

گرفتار بی جے پی کارکنوں کی شناخت دیباجیت ہزاریکا اور وکی سونار کے طور پر ہوئی ہے۔

اس بات کی تصدیق کرتے ہوئے کہ 11 دسمبر 2019 کو وزیر کے گھر پر حملہ کرنے اور پولیس پر پتھراؤ کرنے کے الزام میں 18 افراد کو گرفتار کیا گیا ہے، پولیس نے بتایا کہ دیباجیت ہزاریکا اور وکی سونار بی جے پی کارکن تھے۔

ریاستی بی جے پی رہنماؤں نے بھی اس بات کی تصدیق کی ہے کہ یہ دونوں پارٹی کے سرگرم کارکن تھے۔ ملزم کے لواحقین نے بھی اس بات کی تصدیق کی ہے کہ یہ دونوں رامیشور تیلی کے قریبی ساتھی تھے۔

ان کی گرفتاری پر ردعمل ظاہر کرتے ہوئے تیلی نے کہا کہ دونوں ملزم بی جے پی کے کارکن ہیں لیکن انھیں نہیں معلوم کہ انھیں کس لیے گرفتار کیا گیا ہے۔ لیکن اگر انھیں گرفتار کرلیا گیا ہے تو پولیس کے دعووں میں کچھ حقیقت ضرور ہوگی۔ وہ میرے پڑوس میں رہتے تھے اور ہمیشہ اپنے کنبہ کے ممبروں کے ساتھ میرے پروگراموں میں شریک ہوتے تھے۔”

دسمبر 2019 میں سی اے اے مخالف مظاہروں کے دوران متعدد اراکین اسمبلی اور بی جے پی رہنماؤں کے گھروں پر حملہ کیا گیا تھا۔ ان میں سے کچھ کے مکانات کو مکمل طور پر جلا دیا گیا تھا۔