پنجاب کے سیلاب زدہ علاقوں کا جماعتِ اسلامی ہند کا دورہ

نئی دہلی (دعوت نیوز ڈیسک)

حکومت معاوضہ دے، عوام اور اہلِ خیر آگے آئیں، مولانا شفیع مدنی کی اپیل
جماعتِ اسلامی ہند کے قومی سکریٹری مولانا شفیع مدنی نے اپنے رفقاء کے ہمراہ پنجاب کے مختلف سیلاب زدہ علاقوں—سنگرا اور باؤپور جدید (ضلع کپورتھلہ) سوندر چک اور بہادر پور (تحصیل کولیا سفر، ضلع پٹھان کوٹ) اور سندھوپور (ضلع جالندھر) کا تفصیلی دورہ کیا۔ کولیا گاؤں میں سیلاب نے تباہی مچاتے ہوئے تیس پختہ مکانات بہا دیے اور چار قیمتی جانیں ضائع ہو گئیں، جن میں تین معصوم بہن بھائی اور ان کی پچھتّر سالہ دادی شامل تھیں۔
وفد نے مقامی سکھ رہنماؤں، نوڈل افسروں اور متاثرہ دیہاتیوں سے ملاقات کی اور ان کی فوری ضروریات کا بغور جائزہ لیا۔ گفتگو میں اس امر پر زور دیا گیا کہ متاثرین کو بروقت اور جامع ریلیف فراہم کی جائے جس میں خوراک، رہائش، صاف پینے کا پانی، طبی سہولتیں اور طویل مدتی بحالی کے اقدامات شامل ہوں تاکہ سیلاب سے متاثر ہونے والے خاندان اپنی زندگی دوبارہ شروع کر سکیں۔
جماعتِ اسلامی ہند اور سوسائٹی فار برائٹ فیوچر کے رضاکار شب و روز راحت و بچاؤ کے کاموں میں سرگرم ہیں۔ وہ ضروری سامان تقسیم کر رہے ہیں، طبی امداد فراہم کر رہے ہیں اور بے گھر خاندانوں کی ہر ممکن اعانت کر رہے ہیں۔
مولانا شفیع مدنی نے اپنے پیغام میں کہا
“ہم متاثرینِ سیلاب کی کربناک صورتحال پر گہری تشویش رکھتے ہیں۔ جماعتِ اسلامی ہند اور اس کی شراکت دار تنظیمیں اس وقت تک خوراک، رہائش، طبی امداد اور بحالی کے تمام ممکنہ وسائل فراہم کرتی رہیں گی جب تک کہ معمولاتِ زندگی بحال نہ ہو جائیں۔”
انہوں نے مزید کہا کہ ہم متاثرہ برادریوں کے ساتھ کھڑے ہیں اور ان کی راحت اور تعمیرِ نو کے لیے مسلسل کوشاں ہیں۔ ہماری حکومت سے بھی اپیل ہے کہ امدادی اشیاء کی تقسیم میں سرعت لائے، متاثرہ علاقوں میں بنیادی ڈھانچے کو بہتر کرے اور متاثرین کو مناسب معاوضہ ادا کرے تاکہ وہ اپنی زندگی نئے سرے سے تعمیر کر سکیں۔
مولانا شفیع مدنی نے اہلِ خیر اور عام شہریوں سے بھی دردمندانہ اپیل کی کہ وہ اس کارِ خیر میں آگے آئیں اور متاثرہ خاندانوں کو اس کڑی آزمائش سے نکلنے میں مدد کریں۔
***

***

ہفت روزہ دعوت – شمارہ 21 اگست تا 27 اگست 2025