نشہ ، جوا ، خودکشی اور سود کے خلاف مالیگاؤں میں بیداری کا علم بلند

مالیگاؤں (دعوت نیوز ڈیسک)

سردار ہائی اسکول اینڈ جونیئر کالج، مالیگاؤں کی جانب سے پچھلے دنوں ایک بیداری ریالی کا اہتمام کیا گیا جس کا مقصد نوجوانوں میں نشہ، خود کشی، جوا، سود اور دیگر سماجی برائیوں کے خلاف شعور پیدا کرنا اور تعلیمی اہمیت کو اجاگر کرنا تھا۔ اس ریالی میں طلبہ و طالبات نے اپنے اساتذہ اور معلمات کی نگرانی میں جوش و خروش سے حصہ لیا۔
ادارے کے پرنسپل ایوبی شاہد کی سرپرستی میں ریالی نکالی گئی جبکہ اساتذہ کرام نے تنظیم و رہنمائی کی ذمہ داری نبھائی۔ ریالی کے دوران شہر کے مختلف محلوں بشمول گرووار وارڈ، اسلام نگر، امن چوک، راجہ نگر اور خوشامد پورہ سے گزر کر عوام کو بیدار کیا گیا۔
طلبہ و طالبات نے ہاتھوں میں پلے کارڈز اور بینرز اٹھا رکھے تھے جن پر اصلاحی پیغامات درج تھے، وہ بآواز بلند نعرے لگا رہے تھے، جیسے:
"نشہ حرام ہے، خود کشی حرام ہے!”
"سود، سٹہ، شراب، کتا گولی، ایم ڈی جیسے نشے سماج کا ناسور ہیں!”
"سماجی برائیاں شہر پر بدنما داغ ہیں!”
"شہر کو سماجی برائیوں سے پاک کرو، تعلیم کو عام کرو!”
"امت کی زبوں حالی کا واحد حل، تعلیم!”
یہ نعرے نہ صرف طلبہ کے جذبے کا مظہر تھے بلکہ مالیگاؤں جیسے حساس شہر میں سماجی بیداری کی ایک موثر کوشش بھی بن گئے۔ راہ چلتے افراد، دکاندار اور مقامی باشندوں نے ریالی کو توجہ سے دیکھا اور کئی افراد نے طلبہ کے جذبے کی تحسین کی۔
ادارے کے پرنسپل ایوبی شاہد نے میڈیا سے گفتگو کرتے ہوئے کہا:
"تعلیم محض کتابوں تک محدود نہیں بلکہ یہ ایک ہمہ گیر شعور ہے جس کے ذریعے نوجوانوں کو برائیوں سے روکنا اور انہیں سماج کا مؤثر فرد بنانا ممکن ہے۔ آج کی ریالی اسی پیغام کی ایک عملی مثال ہے۔”
اس موقع پر کئی اساتذہ اور سماجی کارکنوں نے اس بات پر زور دیا کہ موجودہ وقت میں خود کشی اور نشہ جیسی مہلک برائیاں نوجوان نسل کو کھوکھلا کر رہی ہیں جن کے خلاف اجتماعی سطح پر کوششیں ناگزیر ہیں۔
سردار ہائی اسکول کی اس کاوش کو شہر بھر میں سراہا جا رہا ہے اور دیگر تعلیمی اداروں کے لیے یہ ایک مثال بن سکتی ہے کہ تعلیمی ادارے محض تعلیم ہی نہیں بلکہ اخلاقی و سماجی اصلاح کے مراکز بھی بنیں۔

***

ہفت روزہ دعوت – شمارہ 17 جولائی تا 23 اگست 2025