مسلم تنظیمیں ایک ’مشترکہ ایجنڈے‘پر متفق ہوں یہ وقت کی اہم ضرورت ہے :ظفرالاسلام خاں

نئی دہلی (دعوت نیوز ڈیسک)

کنونشن میں مشاورت کی پہلی پچاس سالہ تاریخ پر مبنی ضخیم دستاویزات کا اجرا
آل انڈیا مسلم مجلس مشاورت کی ساٹھویں سالگرہ پر ایک نہایت کامیاب قومی مسلم کنونشن میں ملک کے سرکرہ مسلم قائدین، دانشور اور سماجی کارکنوں نے شرکت کی۔ نئی دہلی کے انڈیا اسلامک کلچرل سنٹر کے وسیع ہال میں منعقدہ اس کنونشن میں مقررین نے مسلمانوں کو اپنی شیرازہ بندی کرنے پر زور دیتے ہوئے کہا کہ جو لوگ مسلمانوں میں ذات پات کی تفریق پیدا کر رہے ہیں وہ ملت کے سب سے بڑے دشمن ہیں۔ آج مجموعی طور پر تمام مسلمان پسماندگی کی دلدل میں پھنسے ہوئے ہیں اور انہیں باہر نکالنے کے لیے متحد ہونے کی ضرورت ہے۔ اس اجلاس کو خطاب کرنے والوں میں پلاننگ کمیشن کی سابق رکن ڈاکٹر سیدہ سیدین حمید، سابق ممبر پارلیمنٹ محمد ادیب، لوک سبھا کے ممبر مولانا محب اللہ ندوی، مسلم پرسنل لا بورڈ کے سکریٹری مولانا یٰسین عثمانی، راشٹریہ علماء کونسل کے صدر مولانا عامر رشادی، انڈین نیشنل لیگ کے صدر پروفیسر محمد سلیمان، کاروان محبت کے صدر ہرش مندر، زکوٰۃ فاؤنڈیشن کے صدر ڈاکٹر سید ظفر محمود، اے پی سی آر کے سکریٹری ندیم خان، سی ایس ڈی ایس کے پروفیسر ہلال احمد، سینئر وکلا ایم آرشمشاد اور فیروز خان غازی، صحافی ضیاءالاسلام، ڈاکٹر جاوید عالم اور مشاورت کے جنرل سکریٹری معصوم مرادآبادی کے نام قابل ذکر ہیں۔
آل انڈیا مسلم مجلس مشاورت (رجسٹرڈ) کے صدر اور عالمی شہرت یافتہ اسلامی اسکالر ڈاکٹر ظفرالاسلام خاں نے اپنے افتتاحی خطاب میں کہا کہ ’’آج سے اکسٹھ برس پہلے ہمارے بزرگوں نے بہت مشکل حالات میں مشاورت کی بنیاد ڈالی تھی۔ آج کچھ شر پسند اور گمراہ عناصر اپنے آقاؤں کے اشارے پر اس کو نقصان پہنچانے کی کوشش کر رہے ہیں، لیکن یہ کوششیں کامیاب نہیں ہوں گی اور مشاورت کا کارواں یونہی آگے بڑھتا رہے گا۔ انہوں نے کہا کہ مشاورت کی پہلی پچاس دہائیوں پر محیط تاریخ کو بڑی محنت سے دو ضخیم جلدوں میں اردو اور انگریزی میں شائع کر دیا گیا ہے۔ انہوں نے اس بات پر زور دیا کہ تمام بڑی مسلم تنظیمیں ایک مشترکہ ایجنڈے پر متفق ہوں جس کا ایک بنیادی خاکہ ہم نے مجلہ میں پیش کر دیا ہے اور اس کی باقاعدہ شکل مسلم تنظیموں کے مشورے سے طے ہوگی‘‘
سابق ممبر پارلیمنٹ اور سرکردہ ملی رہنما محمد ادیب نے کہا کہ ’’مسلمانوں کو بحیثیت قوم اپنی اہمیت کا ادراک کرنے کی ضرورت ہے۔ آج سب سے بڑا المیہ یہ ہے کہ ہم نے اپنی شناخت کھو دی ہے اور ہمیں ہونے والے نقصان کا احساس تک نہیں ہے۔ مسلمانوں میں وسیع پیمانے پر بیداری پیدا کرنے کی ضرورت ہے تاکہ وہ اپنے بنیادی آئینی حقوق کی جدوجہد کے لیے سرگرم ہوں‘‘ ۔ڈاکٹر سیدہ سیدین حمید نے اپنے صدارتی خطاب میں کہا کہ ’’دستوری حقوق کی جدوجہد میں خواتین کو بھی شامل کرنے کی ضرورت ہے۔ انہوں نے کہا کہ یوم آزادی کے موقع پر لال قلعہ کی فصیل سے مسلمانوں کو گھس پیٹھیے کا تمغہ دیا گیا ہے۔ آسام سے مسلمانوں کو ملک بدر کرنے کی سازشیں ہورہی ہیں۔ انہیں روہنگیا قرار دے کر سمندر میں پھینکا جا رہا ہے۔ ملک میں درندگی کا ماحول ہے، لیکن عام ہندوستانی آج بھی صحیح سمت میں سوچتے ہیں۔ لمبی ہے غم کی شام مگر شام ہی تو ہے۔‘‘
ممبر پارلیمنٹ مولانا محب اللہ ندوی نے کہا کہ ’’آج کچھ لوگ ملک کی تاریخ کو بدلنے کی کوشش کر رہے ہیں اور وہ ہندوستان کی صدیوں پرانی تہذیب پر شب خون مار رہے ہیں۔ انہوں نے کہا کہ حق و انصاف کی آوازیں کمزور ضرور ہو رہی ہیں لیکن مسلمان اس صورتحال سے ہرگز مایوس نہ ہوں۔ جو لوگ مسلمانوں میں اونچ نیچ کا تفرقہ پیدا کر رہے ہیں وہ مسلم دشمن طاقتوں کے آلہ کار ہیں اور مسلمانوں کے اتحاد کو توڑنا چاہتے ہیں“ راشٹریہ علماء کونسل کے صدر مولانا عامر رشادی نے کہا کہ ”جب تک مسلمان سیاسی طور پر طاقتور نہیں ہوں گے، اس وقت تک ان کی بات نہیں سنی جائے گی۔ مسلمان اپنی ساکھ قائم کریں اور ملت میں انتشار پیدا کرنے والوں کو سبق سکھائیں۔ جو جماعتیں کام کر رہی ہیں ان کی ٹانگ کھینچنا چھوڑ دیجیے۔‘‘
کاروان محبت کے صدر ہرش مندر نے کہا کہ ’’تشویش ناک بات یہ ہے کہ وزیر اعظم نے لال قلعہ کی فصیل سے جس ڈیموگرافی کے تبدیل ہونے کی بات کہی ہے اس کا نشانہ مسلمان ہیں۔ انہوں نے کہا کہ بنگلہ دیشی اور روہنگیا دراندازی کا نام لے کر بنگالی مسلمانوں کو سرحد پار دھکیلا جا رہا ہے۔ مسلمان شہریوں کے دل میں یہ خوف پیدا کرنے کی کوشش کی جا رہی ہے کہ وہ اس ملک کے شہری نہیں ہیں۔ یہ سرکار انہیں ڈٹینشن سنٹر اور جنگلوں میں بھیج سکتی ہے یا دریا میں ڈبو سکتی ہے۔‘‘
آل انڈیا مسلم پرسنل لا بورڈ کے سکریٹری مولانا یٰسین عثمانی نے اس موقع پر کہا کہ ’’مسلمان مجموعی طور پر ایک پسماندہ قوم ہیں۔ مسلمانوں میں پسماندہ اور غیر پسماندہ کی بحث فسطائی طاقتوں نے شروع کی ہے، جس کے خطر ناک نتائج برآمد ہوں گے اور ملت کا شیرازہ بکھر جائے گا‘‘۔ انہوں نے کہا کہ مسلمان اپنے داخلی معاملات کو بہتر بنائیں۔ ہر اعتبار سے متحد رہیں۔ مسلکی، علاقائی، لسانی اور ذات پات کی بات قطعی نہ کریں۔ جو غیر مسلم ہمارے ہم خیال ہیں انہیں ساتھ لے کر آگے بڑھیں۔ہمیں سیاسی طور پر با شعور رہنا چاہیے اور کوئی بھی قوم اقتدار سے دور رہ کر آگے نہیں بڑھ سکتی“
کنونشن کے شروع میں کشمیری رہنما میر واعظ محمد عمر فاروق کا پیغام پڑھ کر سنایا گیا اور اس موقع پر نہایت ضخیم دستاویزات مشاورت کے انگریزی اور اردو اجزا کا اجراء عمل میں آیا جو مشاورت کی پہلی پچاس سالہ تاریخ پر مشتمل ہیں۔ کنونشن کے موقع پر ایک سوونیئر کا بھی اجرا ہوا جس میں پچھلے ساٹھ سال کے جائزے کے ساتھ موجودہ حالات کے بارے اہم مضامین شامل ہیں۔ اہم شرکاء میں پروفیسر محسن عثمانی ندوی، ڈاکٹر سید قاسم رسول الیاس، مفتی عطاء الرحمن قاسمی، سید تحسین احمد، ابرار احمد مکی، حافظ منظور احمد، شمس الضحیٰ، ڈاکٹر انوارالاسلام، ارشد سراج الدین مکی، پٹنہ سے ڈاکٹر ساجد علی، علی گڑھ سے عبید اقبال عاصم اور ڈاکٹر اسعد فیصل فاروقی، بلند شہر سے ڈاکٹر ظہیر احمد خاں اور خورشید عالم راہی، سورت (گجرات) سے محمد طاہر سورتی، سعودی عرب سے شکیل ہاشمی اور ظل الرحمن اور کشمیر سے میر شاہد سلیم سمیت بہت سے افراد نے شرکت کی۔

***

ہفت روزہ دعوت – شمارہ 24 اگست تا 30 اگست 2025