قلم اللہ کی نعمت، اس کے تقدس کی حفاظت وقت کا تقاضا

لکھنو: ( دعوت نیوز ڈیسک)

صفا انسٹیٹیوٹ فار میڈیا لٹریسی اینڈ جرنلزم کے زیر اہتمام انجمن فلاح دارین ہال میں ’’صحافتی اخلاقیات اور سیرتِ رسول ﷺ‘‘ کے عنوان سے مذاکرہ منعقد ہوا۔ صدارت معروف ادیب اور بانگ حرا کے سابق ایڈیٹر مولانا محمد علاء الدین ندوی نے کی، جب کہ سینئر صحافی عبیداللہ ناصر مہمانِ خصوصی تھے۔ مولانا محمد جہانگیر عالم قاسمی، مولانا ذکی نور عظیم ندوی اور شاہین اسلام انصاری نے بھی خصوصی خطاب کیا۔
مولانا علاء الدین ندوی نے کہا کہ قلم اللہ کی بڑی نعمت ہے جس کا تقدس ہمیشہ قائم رہے گا۔ نبی اور رسول کے معنی ہی پیغام پہنچانے والے کے ہیں، اس سے صحافت کی عظمت اور صحافی کی ذمہ داری واضح ہوتی ہے۔ ایک صحافی کے قلم کے نیچے ہزاروں جانیں ہوتی ہیں، اس لیے مسلم صحافیوں پر لازم ہے کہ صحافتی اصولوں کے ساتھ دینی رہنمائی کو بھی ملحوظ رکھیں۔
عبیداللہ ناصر نے کہا کہ اصل صحافت وہ ہے جو سچائی اور ایمانداری کے ساتھ سماج کو فائدہ پہنچائے۔ آج اگرچہ میڈیا میں جھوٹ اور پروپیگنڈہ عام ہے لیکن کچھ صحافی اپنی ذمہ داری بخوبی نبھا رہے ہیں۔
مولانا جہانگیر عالم قاسمی نے کہا کہ اسلام زندگی کے ہر شعبے میں رہنمائی کرتا ہے۔ زبان اللہ کی امانت ہے، اس لیے بولنے سے پہلے تحقیق ضروری ہے۔ احادیث میں زبان کے درست استعمال پر زور دیا گیا ہے، اس لیے ایک مسلم صحافی کو ان ہدایات کا لحاظ کرنا چاہیے۔
مولانا ذکی نور عظیم ندوی نے کہا کہ صحافت ایک بڑی ذمہ داری ہے اور اس کے لیے علم بنیادی شرط ہے۔ اسلام حق گوئی پر زور دیتا ہے لیکن ہر سچ کو ہر وقت بیان کرنا ضروری نہیں۔ انہوں نے میڈیا کی موجودہ صورتِ حال پر تنقید کرتے ہوئے کہا کہ حقیقت کچھ اور پیش کچھ اور کی جاتی ہے، اس لیے مسلمانوں کے بارے میں ہونے والے منفی پروپیگنڈے کا جائزہ لینا ضروری ہے۔
مفتی منور سلطان ندوی نے کہا کہ ابلاغ کے تمام عناصر پر شریعت نے رہنمائی کی ہے۔ خبر دینے والے کو سچائی کی تاکید ہے اور خبر سننے یا پڑھنے والے کو تحقیق کا حکم دیا ہے۔ انہوں نے کہا کہ ہمیں بلا تحقیق مواد آگے نہ بھیجنے اور ذمہ دارانہ رد عمل دینے کی عادت ڈالنی چاہیے۔
پروگرام کی نظامت غفران نسیم نے کی اور صفا انسٹیٹیوٹ کا تعارف پیش کیا۔ قاری اسعد کی تلاوت سے جلسہ کا آغاز ہوا اور مولانا مصطفیٰ ندوی مدنی کی دعا پر اختتام ہوا۔ مذاکرہ میں صحافیوں، اہلِ قلم اور دانش وروں کی بڑی تعداد شریک ہوئی۔

***

ہفت روزہ دعوت – شمارہ 21 اگست تا 27 اگست 2025