نئی دہلی، جولائی 6: مرکزی کابینہ نے بدھ کے روز ڈیٹا پروٹیکشن بل کلیئرنگ ڈیکس کو منظوری دے دی ہے، جسے پارلیمنٹ کے مانسون سیشن میں پیش کیا جائے گا۔
ڈیٹا کے تحفظ کے لیے قانون سازی کی مرکز کی جانب سے یہ دوسری کوشش ہے اور سپریم کورٹ کی جانب سے پرائیویسی کے حق کو تمام ہندوستانیوں کا بنیادی حق قرار دینے کے تقریباً چھ سال بعد یہ بل آیا ہے۔
اس پر قانون کی کمی کا مطلب یہ ہے کہ حکومت اور نجی کمپنیاں کسی شخص کا ڈیٹا کیسے اکٹھا اور استعمال کرتی ہیں اس کا کوئی چیک اینڈ بیلنس نہیں ہے۔ یہ ایک ایسے وقت میں تشویش کا باعث ہے جب ہندوستان میں ڈیٹا کی خلاف ورزیوں میں اضافہ ہوا ہے۔
الیکٹرانکس اور انفارمیشن ٹیکنالوجی کی وزارت کے ایک اہلکار نے بدھ کو دی پرنٹ کو بتایا کہ حکومت کو اس بل کے مسودے پر 21,000 سے زیادہ تبصرے موصول ہوئے ہیں جو نومبر میں پیش کیا گیا تھا۔ اہلکار نے کہا ’’ہم نے تقریباً 48 تنظیموں سے مشورہ کیا… ہم نے اس بل کا مسودہ اس انداز میں تیار کیا ہے کہ یہ وقت کی کسوٹی پر قائم رہے، اگرچہ ٹیکنالوجی بدلتی رہے۔‘‘
تاہم بل کی تفصیلات اب تک خفیہ ہیں اور نریندر مودی حکومت نے معلومات کے حق کی درخواستوں کے جواب میں مسودہ پر سول سوسائٹی اور سرکاری اداروں سے موصول ہونے والے تبصروں کو شیئر کرنے سے بھی انکار کر دیا۔
سپریم کورٹ کے سابق جج بی این سری کرشنا، جنھوں نے پرسنل ڈیٹا پروٹیکشن بل کے پہلے مسودے کے ساتھ آنے والی ایک کمیٹی کی قیادت کی تھی، نے کہا تھا کہ نومبر کا مسودہ بنیادی طور پر ناقص ہے کیوں کہ اس سے ایگزیکیٹو کو ’’ذاتی ڈیٹا کی رازداری اور بنیادی حقوق کی خلاف ورزی کرنے کا موقع ملے گا۔‘‘
ریٹائرڈ جج نے مزید کہا تھا کہ مسودہ قانون تمام سرکاری محکموں اور اداروں کو اس کی دفعات سے مستثنیٰ قرار دے سکتا ہے۔ انھوں نے خبردار کیا تھا ’’یہ ایک خطرناک صورت حال ہے اور ایگزیکیٹو کو من مانی کارروائی کرنے کی واضح دعوت ہے۔‘‘
انڈین ایکسپریس کے مطابق ماہرین کے خدشات کے باوجود بل میں مرکز اور اس کی ایجنسیوں کو دی گئی چھوٹ برقرار رکھی گئی ہے۔
ڈیٹا پروٹیکشن بورڈ آف انڈیا، جسے ان ضابطوں کی تعمیل کو یقینی بنانے اور خلاف ورزی کرنے والوں پر جرمانے عائد کرنے کی ذمہ داری سونپی جائے گی، کو بھی برقرار رکھا گیا ہے۔ دی ہندو کی خبر کے مطابق ایک اہلکار نے بتایا ہے کہ ’’ڈیٹا بریچنگ کی صورت میں 500 کروڑ روپے کا جرمانہ لاگو ہوگا۔‘‘