بھارت خارجہ پالیسی میں توازن پیدا کرے، امریکہ سے ٹیرف تنازعہ مذاکرات سے حل کیا جائے

نئی دلی ( دعوت نیوز ڈیسک)

ملک کو اپنی صنعتی کمزوریاں دور کرنی ہوں گی، ہنر مندی اور پیداوار میں سرمایہ کاری ضروری
جماعت اسلامی ہند کے امیر سید سعادت اللہ حسینی نے بھارت کی درآمدات پر اضافی پچیس فیصد ٹیرف عائد کرنے کے حوالے سے امریکی صدر ڈونالڈ ٹرمپ کے فیصلے پر تشویش کا اظہار کرتے ہوئے کہا کہ اس سے کل ٹیرف کی شرح پچاس فیصد تک پہنچ گئی ہے۔ یہ فیصلہ غیر ضروری اور جانب دارانہ ہے، اس سے نہ صرف بھارتی معیشت بلکہ امریکی معیشت اور عالمی تجارت کے استحکام کو بھی نقصان پہنچے گا۔
انہوں نے کہا کہ یہ بات ناقابلِ فہم ہے کہ بھارت کو روس سے خریداری پر سزا کے طور پر نشانہ بنایا جائے، جبکہ دیگر متعدد ممالک بشمول یورپی یونین روس سے خریداری کرتے رہتے ہیں لیکن ان کے ساتھ اس طرح کا رویہ اختیار نہیں کیا جاتا۔ دنیا میں کسی بھی ملک کو یہ اختیار حاصل ہے کہ وہ اپنی خارجہ، تجارتی اور اقتصادی پالیسیاں خود وضع کرے۔ اقتصادی حربوں کے ذریعے کسی کو مجبور کرنا خطرناک اور عالمی تعاون کو کمزور کرنے کا سبب بن سکتا ہے۔
امیر جماعت نے کہا کہ ’’مجوزہ پچاس فیصد ٹیرف تجارت میں، بالخصوص محنت طلب شعبوں جیسے ٹیکسٹائل، قالین اور خوراک کی برآمدات سے وابستہ چھوٹے اور درمیانے درجے کے کاروبار کے لیے مشکلیں کھڑی کرے گا۔ اتنا زیادہ ٹیرف نہ صرف برآمد کنندگان کو نقصان پہنچائے گا بلکہ ہزاروں مزدوروں کے روزگار کے خاتمے کا سبب بھی بنے گا، جس کا منفی اثر امریکی صارفین پر بھی پڑے گا۔ انہیں مہنگی اشیاء اور محدود مصنوعات کے انتخاب کا سامنا کرنا پڑے گا۔‘‘
امیر جماعت نے حکومتِ ہند سے کہا کہ وہ اس حالیہ بحران سے سبق حاصل کرے اور اپنی سفارتی حکمتِ عملی پر نظر ثانی کرے۔ اب وقت آچکا ہے کہ بھارت اپنی خارجہ پالیسی کا از سر نو جائزہ لے۔ یہ سامراجی طاقتیں نہ کبھی کسی خود مختار اور با وقار قوم کی وفادار دوست رہی ہیں اور نہ ہی رہ سکتی ہیں۔ ہمیں ان سے دوستی کے لیے اپنے اصولی موقف پر کبھی کوئی سمجھوتہ نہیں کرنا چاہیے۔ بھارت کو چاہیے کہ وہ ایک متوازن اور غیر جانب دارانہ موقف اختیار کرے، نہ کہ امریکہ یا دیگر سامراجی قوتوں کے ساتھ ضرورت سے زیادہ قربت اختیار کرے؟ ہمارا موجودہ یکطرفہ جھکاؤ نہ تو ہمارے قومی مفاد میں ہے اور نہ ہی یہ معاشی یا سفارتی طور پر ہمارے لیے فائدہ مند ہے۔
انہوں نے بھارت کی جانب سے فوری رد عمل کے حوالے سے درج ذیل نکات کی نشان دہی کی:
-1 تجارتی تنوع:
’’ہمیں جاپان، جنوبی کوریا، یورپی یونین اور آسٹریلیا جیسے شراکت داروں کے ساتھ اپنے معاشی تعلقات کو مزید گہرا کرنا ہوگا اور آسیان، برکس اور دیگر علاقائی بلاکس کے ساتھ تعاون کو فروغ دینا، ہوگا جو ایسے بیرونی دباؤ کے خلاف ایک حفاظتی دیوار کا کام کرے گا۔‘‘
-2 متبادل معاشی قوتوں کو مضبوط بنانا:
بھارت کو چاہیے کہ وہ برکس جیسے متبادل معاشی اتحادوں کو مضبوط بنانے میں فعال قیادت کا کردار ادا کرے تاکہ عالمی معاشی میدان میں طاقت کی متوازن تقسیم ممکن ہو سکے۔ یہی واحد راستہ ہے جس کے ذریعے یہ یقینی بنایا جا سکتا ہے کہ کوئی بھی ملک غیر ضروری اثر و رسوخ استعمال کرتے ہوئے خود مختار ممالک پر دباؤ نہ ڈالے یا ان کے خود مختار حقوق میں مداخلت نہ کرے۔
-3 داخلی معاشی استحکام:
’’بھارت کو گھریلو کاروباری سرگرمیوں کی حمایت کے لیے مخصوص معاشی اور مالیاتی اقدامات اپنانے کی ضرورت ہے۔ ملکی معیشت، خاص طور پر محنت طلب پیداواری اور زرعی شعبے کو اس انداز میں مضبوط بنایا جانا چاہیے کہ بڑی معاشی طاقتوں پر انحصار کم ہو۔ مالیاتی نظم و ضبط کو اس طرح متوازن کیا جائے کہ بنیادی ڈھانچے، پیداواری صلاحیتوں اور انسانی وسائل کی بہتری کے لیے سرمایہ جاتی اخراجات میں اضافہ ممکن ہو۔‘‘
آخر میں امیر جماعت اسلامی ہند نے پالیسی سازوں پر زور دیا کہ اس چیلنج کو داخلی اصلاحات کے لیے ایک انتباہ کے طور پر استعمال کریں اور کہا کہ ’’بھارت کو اپنی صنعتی کمزوریوں کو دور کرنا ہوگا، کاروبار کے لیے آسانیاں بڑھانی ہوں گی، ہنر مندی کے شعبے میں سرمایہ کاری کرنی ہوگی اور لاجسٹک اخراجات کو کم کرنا ہوگا۔ ایک مضبوط معیشت بیرونی اقتصادی دباؤ کے خلاف بہترین حفاظتی آلہ ہے۔ حکومت کو ایک اصولی، خود مختار اور متوازن خارجہ پالیسی اپنانی ہوگی جو ہماری معاشی خود مختاری کا تحفظ کرے اور ایک منصفانہ عالمی تجارتی نظام کی تشکیل میں بھی مؤثر کردار ادا کرے۔‘‘

***

ہفت روزہ دعوت – شمارہ 17 جولائی تا 23 اگست 2025