اعجاز قرآن

اردو زبان میں قرآنی معجزوں پر تشفی بخش معلومات کا ذخیرہ

تاریخ اشاعت - 14 دسمبر، 2023

نام کتاب: اعجاز قرآن
مصنف: پروفیسر محمد سعود عالم قاسمی
سن اشاعت:2023ء
صفحات:255
قیمت:500 روپے
ناشر: پروفیسر خلیق احمد نظامی مرکز علوم القرآن، علی گڑھ مسلم یونیورسٹی ، علی گڑھ
ابو سعد اعظمی

پروفیسر محمد سعود عالم قاسمی کی زیر تعارف کتاب ’اعجاز قرآن‘ایک بہترین اور جامع کتاب ہے جس میں پیش لفظ، مقدمہ اور کتابیات کے علاوہ کُل بارہ ابواب ہیں۔ ان میں معجزہ کی تعریف اور تاریخ، قرآن کے دائمی معجزہ ہونے کے دلائل، اعجاز قرآن کی تاریخ اور اس موضوع پر قدیم وجدید علماء کی تصانیف کا ذکر، فصاحت وبلاغت، نظم ومناسبت ، حروف مقطعات، فواصل، قسم، غیب کی خبریں، تعلیمات قرآن، قراءت اور آیات کائنات میں بکھرے ہوئے اعجاز قرآن کے مظاہر کو اعجاز قرآن کے مختلف وجوہ کی حیثیت سے پیش کیا گیا ہے۔مقدمہ میں مصنف نے واضح کردیا ہے کہ "قرآن اپنے حروف، الفاظ، معانی، تعلیمات، اخبار، اسلوب اور اثرات ہر لحاظ سے معجزہ ہے۔لغت اور ادب کے ماہرین کے لیے قرآن کی فصاحت وبلاغت معجزہ ہے، عالموں اور دانش وروں کے لیے قرآن کی تعلیم معجزہ ہے۔ سیاست دانوں کے لیے اس کا اصول حکمرانی معجزہ ہے۔ سائنس دانوں اور حقائق اشیاء پر غور کرنے والوں کے لیے اس کی آیات کائنات معجزہ ہے۔عارفوں اور زاہدوں کے لیے اس کا نظام عبادت وتزکیہ نفس معجزہ ہے۔نغمہ اور حسن صوت کے دلدادہ لوگوں کے لیے اس کی قراءت معجزہ ہے۔ غرضیکہ قرآن کریم کو جس پہلو سے دیکھیے اس کا اعجاز روشن ہے”۔ (ص10-11)
کتاب میں سب سے پہلے معجزہ کی لغوی واصطلاحی تعریف، خرق عادت کی قید سے متعلق علماء کے نقطہ نظر کا جائزہ لیتے ہوئے معجزہ اور جادو میں بنیادی فرق کو تین نکات کی صورت میں پیش کیا گیا ہے۔
1- جادو صرف شعبدہ ہوتا ہے، محض نظر بندی ہوتی ہے۔جب کہ معجزہ میں وقتی اور عارضی طور پر مخفی اسباب کے تحت اشیاء کی ماہیت بدلی جاتی ہے۔
2- جادوگر صرف جادوگر ہوتے ہیں، کسی روحانی پیغام اور رسالت ونبوت کے دعوے دار نہیں ہوتے جب کہ معجزہ پیش کرنے والے انبیاء خداکی طرف سے مبعوث ہونے اور انسانوں کی باذن اللہ رہنمائی کا دعوی کرتے ہیں۔
3- جادوگر صرف تماشا اور مظاہرہ فن کرتے ہیں۔ان کے سامنے انسانیت کی اصلاح،فلاح وترقی اور نجات اخروی کا کوئی مقصد نہیں ہوتا۔جب کہ انبیاء علیہم السلام بلند ترین نصب العین اور اعلیٰ مقاصد کے لیے معجزہ پیش کرتے ہیں۔
اس کے بعد انبیاء کرام کے معجزات کی حقیقت کا جائزہ لیتے ہوئے معجزہ کی دونوں قسمیں حسی اور مادی نیز عقلی اور علمی معجزہ پر تفصیلی گفتگو کی گئی ہے۔
دوسرے باب میں واضح کیا گیا ہے کہ قرآن ایک دائمی معجزہ ہے۔ نبی کریمؐ کو حسی معجزات بھی عطا ہوئے تھے لیکن مقصد نبوت کی تکمیل کے لحاظ سے علمی معجزہ ہی مناسب ہے۔ اس ضمن میں اس بات کا بھی حوالہ دینے کی کوشش کی گئی ہے کہ صرف قرآن ہی معجزہ کیوں ہے؟ دیگر آسمانی کتابیں معجزہ کیوں نہیں ہیں؟ قرآن کریم نے اس جیسا کلام پیش کرنے، پھر دس سورتیں پیش کرنے اور پھر قرآن جیسی ایک سورہ پیش کرنے کا کفار ومشرکین سے جو چیلنج کیا تھا اس کا ذکر کرتے ہوئے قرآن اور کہانت کے فرق کو واضح کیا گیا ہے۔ حضرت حسان بن ثابت کے اشعار پر خنساء کے نقد کے ذریعہ نزول قرآن کے وقت عربوں کی فصاحت وبلاغت کے معیار پر روشنی ڈالی گئی ہے اور یہ واضح کیا گیا ہے کہ کفار ومشرکین جن قرآن کی سورتوں کا جواب لانے سےعاجز رہے تو انہوں نے تشدد کا راستہ اختیار کیا اور کلام الٰہی کی زبان کو خاموش کرنے کے لیے تیر وتلوار کا سہارا لیا۔
باب سوم جو اس کتاب کا سب سے طویل باب ہے، اس میں اعجاز قرآن کی بحث کے آغاز پر روشنی ڈالتے ہوئے تیسری صدی ہجری سے پندرہویں صدی ہجری تک اعجاز قرآن کو موضوع بحث بنانے والے مصنفین کی تفصیلات فراہم کردی گئی ہیں اور ان مصنفین نے جس پہلو سے قرآن کریم کے اعجاز کو ثابت کیا ہے،مختلف اقتباسات نقل کرکے ان کے نقطہ نظر کو مدلل کیا گیا ہے۔ اس باب میں فاضل مصنف نے تقریباً ایک سو دس مصنفین کی عربی و اردو کتابوں کا تذکرہ کیا اور اعجاز قرآن کے وجوہ کی تعین میں ان کے نقطۂ نظر کی بھی مختلف اقتباسات نقل کرکے ترجمانی کی ہے۔البتہ اس فہرست میں مولانا محمد فاروق خاں کی قرآن کریم کا صوتی اعجاز، پروفیسر عبدالمغنی کی قرآن کریم کا ادبی وبلاغی اعجاز، پروفیسر نثار احمد فاروقی کی کتاب قرآن کریم کا اسلوب اور اعجاز، ڈاکٹر حبیب الرحمن کی اعجاز القرآن تجزیہ وتحقیق، ڈاکٹر شمس کمال انجم کا ترجمہ بلاغت قرآن کریم وغیرہ کا ذکر نہیں آ سکا ہے۔ اسی طرح عصر حاضر کے مشہور ترک اسکالر شیخ بدیع الزماں سعید نورسی کی کتاب کا ذکر بھی چھوٹ گیا ہے۔ اس باب کی افادیت اس لحاظ سے بڑھ جاتی ہے کہ اس کے مطالعہ سے اعجاز قرآن کا پورا منظرنامہ سامنے آجاتا ہے ۔
باب چہارم کے اندر فصاحت وبلاغت میں اعجاز قرآن کے پہلوؤں کی نشاندہی کی گئی ہے۔ اعجاز قرآن پر موجود قدیم عربی لٹریچر میں اس پہلو سے تفصیلی بحثیں ملتی ہیں۔ فاضل مصنف نے فصاحت وبلاغت کی تعریف کرتے ہوئے خطابی، باقلانی اور زرکشی کے حوالہ سے اس کی وضاحت کی ہے۔ علامہ ابن الاصبغ نے اپنی کتاب بدائع القرآن میں قرآن کریم کے محاسن اور صنائع لفظی کی سو قسمیں بیان کی ہیں۔ مصنف نے اس کا بھی ذکر کردیا ہے۔ اس کے بعد الفاظ کی فصاحت، بلاغت قرآن، موقع ومحل کی نزاکت، اسالیب بیان اور منظر کشی وغیرہ کے ذیلی عناوین قائم کرکے قرآن کریم ادبی وبلاغی اعجاز کی ترجمانی کی گئی ہے۔
پانچویں باب میں نظم قرآن کے اندر اعجاز قرآن تلاش کرنے کی کوشش کی گئی ہے اور رازی، زرکشی، مصطفی صادق رافعی، عبداللہ دراز، فراہی اور مولانا سید ابولاعلیٰ مودودی وغیرہ سے خصوصی استفادہ کیا گیا ہے۔ مولانا مودودیؒ کے حوالہ سے انہوں نے لکھا ہے کہ ’’موضوع، مرکزی موضوع اور مدعا،ان تین بنیادی امور کو ذہن میں رکھ کر کوئی شخص قرآن کو دیکھے تو صاف نظر آئے گا کہ یہ کتاب کہیں بھی اپنے موضوع، اپنے مدعا اور مرکزی مضمون سے بال برابر بھی نہیں ہٹی ہے۔ اول سے لے کر آخر تک اس کے مختلف النوع مضامین اس کے مرکزی موضوع کے ساتھ اس طرح جڑے ہوئے ہیں جیسے ایک ہار کے چھوٹے بڑے رنگ برنگ جواہر ہار کے رشتہ میں مربوط ومنسلک ہوتے ہیں‘‘۔ (ص126-127)
قرآنی آیات اور سورتوں کی مناسبت پر جو کتابیں تحریر کی گئی ہیں ان کی تفصیل پیش کرتے ہوئے آیات کے باہمی ربط وتعلق کو جن مفسرین نے بیان کیا ہے ان میں امام رازی، علامہ برہان الدین البقاعی، عبدالحق حقانی، اشرف علی تھانوی وغیرہ کا بھی حوالہ دیا گیا ہے۔
قرآن کریم میں 29 ایسی سورتیں وارد ہیں جن کا آغاز حروف مقطعات سے ہوا ہے۔ مفسرین کی بڑی تعداد حروف مقطعات میں اعجاز قرآن کو پوشیدہ سمجھتی ہے اور اپنی بصیرت اور لسانی صلاحیت سے اس راز کی نقاب کشائی کرتی ہے۔ اس باب میں علامہ مہائمی نے ان حروف مقطعات کی جو تشریح وتوضیح کی ہے اسے نقل کیا گیا ہے۔
ساتویں باب میں قرآنی فواصل کا تذکرہ ہے۔ قرآن کے رموز و اوقاف پر علماء نحو وقراءت نے گراں قدر کتابیں لکھی ہیں اور فواصل کی بلاغت وحکمت اور اعجاز قرآن سے اس کے تعلق پر عمدہ اور دلنشیں بحث کی ہے۔ قاضی ابوبکر باقلانی کا کہنا ہے کہ فواصل میں بھی قرآن کریم کا اعجاز پوشیدہ ہے۔ فاضل مصنف نے متعدد آیات میں فواصل کا جو اہتمام پایا جاتا ہے اس کے نمونے پیش کرکے اس پر جو گفتگو کی ہے وہ ان کے قرآنی ذوق اور گہری بصیرت کا غماز ہے۔
آٹھویں باب میں قرآن کریم میں وارد قسموں میں اعجاز قرآن کو تلاش کرنے کی کوشش کی گئی ہے۔ اور نویں باب میں غیب کی خبروں سے متعلق اعجاز قرآن کو نمایاں کیا گیا ہے۔ اعجاز قرآن پر لکھنے والے قدیم مصنفین میں سےتقریباً ہر کسی نے غیب سے متعلق خبروں کی نشاندہی کو قرآن کریم کا اعجاز قرار دیا ہے اور اس کی متعدد مثالیں بھی پیش کی ہیں۔
دسواں باب ’اعجاز قرآن تعلیمات میں‘ کے عنوان سے ہے۔مصنف نے قرآن کریم کے فطری استدلال، کائنات میں غور وفکر کی دعوت، اللہ کی معرفت کا ادراک، اس کی صفات کی معرفت، آخرت کی معرفت، عمل کی اصلاح، عبادت اور خدمت خلق، حلال وحرام، انسانی حقوق، انسانی قدروں کا تحفظ، خاندان کی تشکیل، فرد اور معاشرہ کی اصلاح، دوسرے مذاہب سےسلوک وغیرہ کے ذیلی عناوین کے تحت قرآن کریم کی پاکیزہ اور روشن تعلیمات کو اس کے اعجاز کی حیثیت سے پیش کیا ہے۔
گیارہواں اور بارہواں باب بالترتیب "اعجاز قرآن قراءت میں” اور "اعجاز قرآن آیات کائنات میں” کے عنوان سے ہے۔ پہلے میں مصنف نے قرآن کریم کے صوتی وتاثیری اعجاز کو پیش کیا ہے۔ علامہ خطابی لکھتے ہیں: "اعجاز قرآن کی ایک وجہ دلوں میں اس کا اترنا اور نفوس میں اثر کرنا ہے۔ تم قرآن کے علاوہ کوئی دوسرا کلام نہیں پاؤگے خواہ نثر ہو یا نظم، جب وہ کانوں سے ٹکرائے تو اس کی لذت وحلاوت دل میں اتر جائے اور اس میں رونق وہیبت پیدا کردے جس سے روح مسرور ہوجائے اور شرح صدر حاصل ہوجائے”۔ (ص221) فاضل مصنف نے متعدد اہل علم مثلاً قاری عبد الباسط، شیخ محمد عبدہ وغیرہ کے حوالہ سے قرآن کریم کے صوتی اعجاز کا اعتراف نقل کیا ہے۔قرآن کریم کے سائنسی اعجاز پر اظہار خیال کرتے ہوئے لکھتے ہیں: "قرآن اس وقت بھی معجزہ تھا جب عربوں کو اس کی ہر سورت اپنا مثل لانے کا چیلنج دیتی تھی اور آج بھی معجزہ ہے جب کہ دنیا میں ہر طرح کے علوم کا طوفان برپا ہے اور کائنات کی اشیاء برہنہ ہوکر انسانی نگاہوں کے سامنے آگئی ہیں”۔ (ص234) ایک دوسری جگہ لکھتے ہیں: "انسان، حیوان، زمین، پہاڑ، فضا، آسمان بلکہ تمام مظاہر کائنات کو علمی تحقیقات وانکشافات نے انسانوں کی دسترس میں لاکر رکھ دیا۔ اس پس منظر میں قرآن کی ان آیات پر بھی ماہرین علوم طبیعیات وطب نے غور وفکر کیا جن کا تعلق انسان اور کائنات کی جسمانی اور مادی تخلیق وتشریح سے ہے۔ اس کی روشنی میں قرآن کے علمی اعجاز کی گرہ کشائی کی۔ ان گنت کتابیں قرآن اور سائنس کے حوالہ سے ہر زبان میں معرض وجود میں آئیں”۔ (ص236) فاضل مصنف نے اس باب میں قرآن اور سائنس کے حوالہ سےعصر حاضر کی مولفہ بعض اہم کتابوں کی نشاندہی بھی کی ہے۔
واقعہ یہ ہے کہ اردو لٹریچر میں اعجاز قرآن کے موضوع پر وقیع اور اہم کتابوں کی عدم موجودگی کا جو احساس ہے بڑی حد تک اس کتاب کے مطالعہ سے اس کی تلافی ہوجاتی ہے۔ اس کے مطالعہ سے نہ صرف یہ کہ اعجاز قرآن کا منظر نامہ اور اس کے وجوہ سے آگاہی ہوتی ہے بلکہ تاریخ کے مختلف ادوار میں اس موضوع پر لکھی گئی اہم کتابوں سے بھی قاری روشناس ہوجاتا ہے۔
پروفیسر محمد سعود عالم قاسمی علمی دنیا کا ایک معروف نام ہے۔وہ دارالعلوم دیوبند کے فاضل اور ادارہ تحقیق وتصنیف کے تربیت یافتہ ہیں ساتھ ہی انہوں نے علی گڑھ مسلم یونیورسٹی کے شعبہ دینیات سے ڈاکٹریٹ کی ڈگری بھی حاصل کی ہوئی ہے۔ وہ علی گڑھ مسلم یونیورسٹی کے شعبہ دینیات سے تقریباً 30 سال سے بھی زائد عرصہ سے بحیثیت مدرس منسلک ہیں۔ تحریر وتقریر کا یکساں ذوق ہے۔ زبان وبیان پر غیر معمولی قدرت حاصل ہے۔ علوم القرآن ان کا خاص موضوع ہے۔ شاہ ولی اللہ کے قرآنی فکر کا مطالعہ، قرآن کی دعوت فکر، منہاج ترجمہ وتفسیر، مطالعہ تفاسیر قرآن، علامہ شبلی نعمانی کی قرآن فہمی، المدخل الی علوم القرآن قرآنیات پر ان کی اہم کتابیں ہیں۔
***