سماج میں بڑھتا ہوا اخلاقی زوال ملک اور انسانیت کے لیے خطرہ

نئی دلی(دعوت نیوز ڈیسک)

مرکز جماعت اسلامی ہند، نئی دلی میں ’دھارمک جن مورچہ‘ کے تحت ملک میں بڑھتے ہوئے اخلاقی زوال کے مسئلہ پر ایک اہم بین المذہبی مذاکرے کا انعقاد کیا گیا جس میں مختلف مذاہب سے وابستہ رہنماؤں اور مذہبی قائدین نے شرکت کی۔
اس موقع پر دھارمک جن مورچہ کے صدر پروفیسر سلیم انجینئر نے اپنے صدارتی کلمات میں کہا کہ ’’سماج میں اخلاقی زوال کی بنیادی وجہ یہ ہے کہ انسان اپنے مذہب اور خدا سے دور ہو رہا ہے۔ مذہبی رہنماؤں کی ذمہ داری بنتی ہے کہ وہ مل کر ملک کو اخلاقی و روحانی انحطاط سے بچانے کی کوشش کریں – اخلاقی زوال ہی ملک میں بیشتر برائیوں کی جڑ ہے – ہمیں مذہبی تعلیمات کی روشنی میں اپنے اخلاقی معیار کو بلند کرنے کے لیے مستقل محنت کرنی چاہیے۔‘‘
پروگرام میں سناتن دھرم کے نمائندے سوامی سشیل گوسوامی مہاراج نے کہا کہ ’’ملک میں رہنے والے ہم سب بھائی بھائی ہیں۔ سب اپنے اپنے دھرم کو مانتے ہیں، کوئی دھرم کسی کو نفرت نہیں سکھاتا۔ ہم سب کو مل کر ملک کی وِکاس کے لیے کام کرنا چاہیے۔‘‘
سکھ مذہب سے تعلق رکھنے والے گیانی منگل سنگھ نے گرو گرنتھ کے حوالے سے گفتگو کرتے ہوئے کہا کہ ’’بھائی چارہ اور مساوات سماج کی ترقی کے لیے ضروری ہے۔ لوگوں میں بیداری لانے کے لیے اس طرح کے پروگرام بڑے پیمانے پر منعقد کیے جانے چاہئیں۔‘‘
عیسائی مذہب کی نمائندگی کرتے ہوئے فادر ناربرٹ ہرمن نے بائبل کی تعلیمات پر روشنی ڈالتے ہوئے کہا کہ ’’محبت کرو خدا سے اور محبت کرو اپنے پڑوسی سے، یہ بائیبل کی تعلیم ہے۔ ہمیں دوسروں کے ساتھ ویسا وہی برتاؤ کرنا چاہیے جو ہم دوسروں سے اپنے لیے چاہتے ہیں۔‘‘
پروگرام میں شامل ہونے والی اہم شخصیات میں پارسی مذہب سے تعلق رکھنے والے جناب مرزبان زئی والا، روی داس سماج کے سنت ویر سنگھ ہتکاری، بدھ مذہب کے یَشی فنت شوک، یہودی مذہب کے ایزی کیل مالیکر، برہما کماری تنظیم سے وابستہ بہن حسین اور بہائی مذہب کے نیلاکشی راج کھوا شامل تھے۔
پروگرام کی نظامت جناب وارث حسین صاحب، دھارمک جن مورچہ کے کوارڈینیٹر نے کی۔ شرکاء نے اس طرح کے پروگرام کے انعقاد پر مسرت کا اظہار کرتے ہوئے کہا کہ انہیں اس بین المذہبی مذاکرے سے بہت کچھ سیکھنے، سمجھنے اور ایک دوسرے سے قریب آنے کا موقع ملا، آج کے بھارت کو ایسی کوششوں کی اشد ضرورت ہے۔
***

***

ہفت روزہ دعوت – شمارہ 21 اگست تا 27 اگست 2025