صاف ستھرا اور صحت مند مستقبل ہماری مشترکہ ذمہ داری: ڈاکٹر مبشر احمد

حیدرآباد (دعوت نیوز ڈیسک)

سی آئی او کی شجرکاری مہم کا اختتامی اجلاس، ہزاروں بچوں اور نوجوانوں کی بھرپور شرکت
حیدرآباد سمیت مختلف شہروں میں دو ہزار سے زائد پودے لگائے گئے
’’بچوں میں فطرت اور ماحولیات سے محبت بیدار کرنا وقت کی اہم ضرورت ہے۔ اگر ہم سب مل کر پودے لگانے اور ان کی حفاظت کی طرف توجہ دیں تو آنے والی نسلوں کے لیے ایک بہتر اور صحت مند ماحول فراہم کیا جا سکتا ہے۔‘‘ ان خیالات کا اظہار مہمانِ خصوصی ڈاکٹر سرسوتی کاوُلا (رکن AIMs) نے کیا ۔
دراصل پچھلے دنوں چلڈرن اسلامک آرگنائزیشن (CIO) حیدرآباد کی جانب سے’مٹی میں ہاتھ، دل وطن کے ساتھ‘ مہم کے سلسلے میں ملک گیر شجر کاری مہم کا اختتامی اجلاس اسلامک سنٹر لکڑ کوٹ، حیدرآباد میں نہایت کامیابی اور شاندار انداز میں منعقد ہوا۔ اجلاس کی صدارت ڈاکٹر محمد مبشر احمد، ناظم شہر جماعت اسلامی ہند گریٹر حیدرآباد نے کی۔ اجلاس کا آغاز تلاوتِ کلامِ پاک اور اس کا اردو و انگریزی ترجمہ پیش کرنے سے ہوا۔ اس کے بعد پرچم کشائی عمل میں آئی اور حمد باری تعالیٰ پیش کی گئی۔ پروگرام کے دوران CIO کا تعارف اور تنظیمی ترانہ بچوں کے گروپ نے پیش کیا جسے حاضرین نے بے حد پسند کیا۔ اسی طرح مہم کا ترانہ اور ایک پُر اثر، خاموش تمثیل (Mime Act) بھی بچوں نے پیش کی جس پر سامعین نے زبردست داد دی۔ اس موقع پر مہم کی تفصیلی رپورٹ پیش کی گئی جس میں بتایا گیا کہ حیدرآباد سمیت ملک کے مختلف حصوں میں ہزاروں بچوں، نوجوانوں اور رضاکاروں نے پودے لگا کر ماحولیات کے تحفظ کا شعور عام کیا۔
اس موقع پر ناظم شہر ڈاکٹر محمد مبشر احمد نے خطاب کرتے ہوئے بچوں کی تنظیم (سی آئی او) کی سرگرمیوں کو مؤثر قرار دیا اور کہا کہ بچوں کے ساتھ ساتھ والدین اور خصوصاً ماؤں کا بھی اس مہم میں شامل ہونا خوش آئند ہے۔ڈاکٹر محمد مبشر احمد نے اپنے خطاب میں کہا کہ صاف ستھرا اور صحت مند مستقبل ہماری مشترکہ ذمہ داری ہے۔ انہوں نے اس بات پر زور دیا کہ اگر ہم سب مل کر محنت کریں تو اپنی آئندہ نسلوں کو ایسا ماحول دے سکتے ہیں جہاں وہ کھلے آسمان کے نیچے کھیل سکیں اور صحت مند فضا میں پروان چڑھ سکیں۔
پروگرام کے اختتام پر نمایاں کارکردگی دکھانے والے بچوں اور مقابلوں کے فاتحین اور والینٹروں کو ناظم شہر ڈاکٹر محمد مبشر احمد نے اپنے ہاتھوں سے انعامات پیش کیے۔ بعد ازاں شکریہ کے کلمات ادا کیے گئے اور دعا پر پروگرام اختتام پذیر ہوا۔
واضح رہے کہ اس مہم کے تحت شرکا کو ماحولیات کی حفاظت کا پیغام دیا گیا۔ CIO کے ذمہ داران نے کہا کہ یہ مہم مستقبل میں بھی جاری رہے گی تاکہ زیادہ سے زیادہ درخت لگا کر ملک کو سر سبز بنایا جائے۔ بچوں نے واضح کیا کہ ہریالی میں اضافہ نہ صرف آکسیجن کی سطح کو بڑھاتا ہے بلکہ آنے والی نسلوں کے لیے صحت مند ماحول کی ضمانت بھی ہے۔ اس مہم کے تحت شہر حیدرآباد کے مختلف مقامات پر بچوں اور والینٹروں کی نگرانی میں دو ہزار سے زائد پودے لگائے گئے۔

***

ہفت روزہ دعوت – شمارہ 24 اگست تا 30 اگست 2025