کوویڈ ۔19: یوپی آج آدھی رات سے نوئیڈا، غازی آباد اور لکھنؤ سمیت 15 اضلاع میں ہاٹ سپاٹس کو سیل کرے گا۔

لکھنؤ، اپریل 8: اے این آئی کے مطابق اتر پردیش حکومت کورونا وائرس سے بدترین طور پر متاثر 15 اضلاع کے کچھ حصوں کو سیل کرے گی، جن میں گوتم بدھ نگر، غازی آباد، میرٹھ، لکھنؤ، آگرہ، شاملی اور سہارنپور وغیرہ شامل ہیں۔

اے این آئی کے مطابق چیف سکریٹری آر کے تیواری نے بتایا ’’یوپی کے پندرہ اضلاع میں وائرس کا اثر زیادہ ہے۔ ان اضلاع کے ان حصوں کو سیل کرنے کے احکامات جاری کردیے گئے ہیں، جہاں سے یہ مقدمات پائے گئے ہیں۔ کمیونٹی ٹرانسمیشن کو روکنا ضروری ہے۔ وہاں صرف ضروری اشیا اور میڈیکل ٹیموں کی اجازت ہوگی۔‘‘

اس اعلان کے بعد گوتم بدھ نگر کے ڈسٹرکٹ مجسٹریٹ سہاس ایل یتھیراج نے لوگوں سے نہ گھبرانے کی اپیل کی اور انھیں یقین دہانی کرائی کہ اشیائے ضروریہ کی فراہمی بلا تعطل جاری رہے گی۔ انھوں نے ٹویٹر پر لکھا ’’شناخت شدہ ہاٹ سپاٹس سیل کردیے جائیں گے اور ضروری سامان کی ہوم ڈیلیوری خدمات ضلع کے تمام مقامات پر دستیاب ہوگی۔‘‘

وزارت صحت اور خاندانی بہبود کے مطابق اتر پردیش میں اب تک 326 کورونا وائرس کے معاملات ہیں۔ ریاست میں تین افراد کوویڈ 19 کی وجہ سے فوت ہو چکے ہیں۔

یہ اعلان اس وقت سامنے آیا جب وزیر اعظم نریندر مودی نے آج منعقدہ آل جماعتی میٹنگ کے بعد کہا کہ کورونا وائرس وبائی پر قابو پانے کے لیے ملک گیر لاک ڈاؤن کو 14 اپریل سے آگے بڑھایا جاسکتا ہے۔

اس سے قبل اتر پردیش حکومت کے ایک سینئر عہدیدار نے کہا تھا کہ 15 اپریل کو لاک ڈاؤن کو ختم نہیں کیا جانا چاہیے، کیونکہ ملک میں کورونا وائرس کے معاملات میں اضافہ ہورہا ہے۔ اترپردیش کے ایڈیشنل چیف سکریٹری اونیش اوستھی نے کہا تھا ’’چوں کہ پچھلے دو دنوں میں کورونا وائرس کے معاملات کی تعداد میں نمایاں اضافہ ہوا ہے، لہذا یہ کہنا درست نہیں ہوگا کہ 14 اپریل کے بعد لاک ڈاؤن اٹھا لیا جائے گا۔‘‘

مرکزی وزارت صحت نے بتایا کہ بدھ کی صبح تک ملک بھر میں کورونا وائرس کے واقعات کی تعداد بڑھ کر 5،194 ہوگئی۔