ٹرن آؤٹ ڈیٹا اپ لوڈ کرنے میں تاخیر کیوں؟

نئی دہلی ،19مئی :۔

لوک سبھا الیکشن 2024 کے انتخابات جاری رہیں ۔ اس دوران الیکشن کمیشن آف انڈیا پر اپوزیشن پارٹیوں کی جانب سے جانبداری کے الزاماعات عائد کئے جا رہے ہیں ۔اس سلسلے میں الیکشن کمیشن آف انڈیا کے ذریعہ پولنگ کے اختتام کے بعد ٹرن آؤٹ ڈیٹا اپ لوڈ کرنے میں تاخیر کے الزامات عائد کئے گئے اور  سپریم کورٹ میں بھی عرضی دائر کی گئی ہے جس پر عدالت عظمی نے الیکشن کمیشن آف انڈیا سے کچھ سوال پوچھے ہیں ۔ رپورٹ کے مطابق سپریم کورٹ نے جمعہ کے روز الیکشن کمیشن آف انڈیا (ای سی آئی) سے کہا کہ وہ پولنگ کے 48 گھنٹوں کے اندر لوک سبھا انتخابات 2024 میں پولنگ کے ووٹوں کی تعداد سمیت تمام پولنگ اسٹیشنوں میں ووٹر ٹرن آؤٹ کے حتمی تصدیق شدہ ڈیٹا کا انکشاف کرنے کی درخواست کا جواب دے۔

چیف جسٹس آف انڈیا (سی جے آئی) ڈی وائی چندرچوڑ اور جسٹس جے بی پارڈی والا اور منوج مشرا کی بنچ 2019 کے ایک کیس میں ایسوسی ایشن فار ڈیموکریٹک ریفارمز (ADR) کی جانب سے  ٹرانسفر کی گئی درخواست کی سماعت کر رہی تھی۔ ای سی آئی کے وکیل امیت شرما نے درخواست کی مخالفت کی اور اے ڈی آر   پر بھی سوال اٹھایا۔عدالت نے ای سی آئی کو ایک ہفتے کے اندر اپنا جواب داخل کرنے کی ہدایت کی اور کیس کو 24 مئی کو غور کے لیے مقرر کیا۔

اے ڈی آر نے دلیل دی کہ ای سی آئی کے ذریعہ 30 اپریل کو شائع کردہ ووٹر ٹرن آؤٹ کا ڈیٹا پہلے مرحلے کے 11 دن بعد اور دوسرے مرحلے کے 4 دن بعد تھا۔

ایڈوکیٹ پرشانت بھوشن،اے ڈی آر کی طرف سے پیش ہوئے، نے کہا کہ ای سی آئی  کو پولنگ ووٹوں کی قطعی تعداد کا انکشاف کرنا چاہیے، یہ مطالبہ کئی اپوزیشن رہنماؤں اور کارکنوں نے اٹھایا ہے۔این جی او نے کہا کہ ووٹر ٹرن آؤٹ کی تفصیلات شائع کرنے میں تاخیر کے علاوہ، الیکشن کمیشن کی طرف سے جاری کردہ ابتدائی ووٹر ٹرن آؤٹ فیصد کے اعداد و شمار میں بھی غیر معمولی طور پر تیزی سے اضافہ ہوا۔

اس پیش رفت نے عوام کے ذہنوں میں عوامی ڈومین میں دستیاب پولنگ ڈیٹا کی صداقت کے بارے میں خطرے کی گھنٹی بجا دی ہے اور یہاں تک کہ آیا الیکٹرانک ووٹنگ مشینوں (ای وی ایم) کو تبدیل کر دیا گیا ہے۔