مہذب اور ترقی یافتہ سماج میں صنف کی بنیاد پر امتیاز کی کوئی گنجائش نہیں

حیدرآباد: (دعوت نیوز ڈیسک)

کسی بھی مہذب و ترقی یافتہ سماج میں صنف کی بنیاد پر امتیاز کی کوئی جگہ نہیں ہے۔ جن ممالک میں خواتین کو ان کے حقوق میسر ہیں وہ ممالک دنیا میں ترقی یافتہ ہیں۔ان خیالات کا اظہار مشہور ماہر معاشیات وتلنگانہ پبلک سرویس کمیشن کے معزز رکن پروفیسر عامر اللہ خان نے کیا۔ وہ مولانا آزاد نیشنل اردو یونیورسٹی کے مرکز برائے مطالعات نسواں و شعبہ تعلیم نسواں کے اشتراک سے منعقدہ جلسہ تقسیم انعامات سے مخاطب تھے۔پروفیسر عامر اللہ خان نے کہا کہ بھی سماج میں جنس کی بنیادپر امتیاز کا سلسلہ جاری ہے۔ لڑکیوں کو لڑکوں کے مقابلے کم غذا دی جاتی ہے جس سے لڑکیوں میں نیوٹریشن یا تغذیہ کے کمی کے مسائل پیدا ہورہے ہیں۔انہوں نے لڑکے اور لڑکیوں ہر دو کو یکساں غذا فراہم کرنے پر زوردیا۔ یادرہے کہ عالمی یوم خواتین 2025کے ضمن میں یونیورسٹی طلبہ کے لیے ”تمام لڑکیوں اور خواتین کے لیے : حقوق، مساوات اور بااختیاری “ عنوان کے تحت تقریری مقابلوں کا انعقاد کیا گیا۔ان مقابلوں میں طلبہ کی بڑی تعداد نے حصہ لیا۔ مقابلے میں حصہ لینے والے طلبہ کو اردو، ہندی اور انگریزی زمرے کے تحت اول اور دوم انعامات سے نوازا گیا۔ اول انعام پندرہ سو اور ایک سند جبکہ دوم انعام ایک ہزار روپیے اورایک سند پر مشتمل تھا۔ اردو زبان کے زمرے میں قانون کے طالب علم مسٹرعابد رضا اول، اردو پی ایچ ڈی کے اسکالر مسٹر محمد سلمان دوم، ہندی میں بی اے سال سوم کی طالبہ عالیہ ناز اول، ایم ایس سی فزکس کی طالبہ، اپراجیتا آنند دوم، جبکہ انگریزی میں لا کی اسٹوڈنٹ مس ماریہ سوری اول، ایم اے انگلش کی طالبہ فرہین غفار سندی نے دوم انعام حاصل کیا۔اس موقع پر قومی سطح پر یو جی سی جے آر ایف میں اول مقام حاصل کرنے والی یونیورسٹی کی ہونہار طالبہ انعم ظفر کو بھی تہنیت پیش کی گئی۔ یونیورسٹی کے رجسٹرار پروفیسر اشتیاق احمد نے بطور مہمان اعزازی خطاب کرتے ہوئے کہا کہ یونیورسٹی کے طلبہ ریاستی، زونل اور قومی سطح کے مختلف مقابلوں اور پروگراموں میں حصہ لے کر شاندار مظاہرہ کرتے ہوئے انعامات حاصل کررہے ہیں۔انہوں نے اپنے خطاب میں کہا کہ یونیورسٹی اپنے موجودہ وائس چانسلر پروفیسر سید عین الحسن صاحب کی قیادت میں ترقی کی سمت گامزن ہے جس کی مثال قومی سطح کے مقابلوں میں یونیورسٹی کے طلباءکی نمائندگی اور کامیابی ہے۔شعبہ تعلیم نسواں کی صدر ڈاکٹر شبانہ کیسر نے خطبہ استقبالیہ پیش کرتے ہوئے پروگرام کے اغراض ومقاصد میں بیان کیے۔ جبکہ ڈین اسکول برائے فنون و سماجی علوم ، ڈائریکٹر مطالعات نسواں پروفیسرشاہدہ نے صدارتی کلمات میں خواتین کی تعلیم پر زور دیا۔ انہوں نے 9مارچ یوم خواتین تقاریب کے ضمن میں یونیورسٹی میں منعقد کیے گئے مختلف سرگرمیوں کا بھی ذکر کیا۔پروگرام کنوینرو شعبہ تعلیم ِ نسواں کے فیکلٹی ڈاکٹر تبریزحسین نے پروگرام کی کارروائی چلائی۔ تقریب میں اساتذہ، طلبہ و یونیورسٹی اسٹاف کی بڑی تعداد موجود تھی۔

***

ہفت روزہ دعوت – شمارہ 23 مارچ تا 29 مارچ 2025