معیشت بہتر، لوگ شادیاں کررہے ہیں

نئی دہلی 15 نومبر: مرکزی وزیر سریش انگڈی نے معاشی صورت حال کے بارے میں اپوزیشن کی تنقیدوں کو مسترد کرتے ہوئے دعویٰ کیاکہ ایئرپورٹس اور ٹرینیں عوام سے کھچا کھچ بھرے پڑے ہیں۔ جابجا لوگوں کی شادیاں ہورہی ہیں جس سے اشارے ملتے ہیں کہ ملک کی معیشت بہترین ہے۔ مملکتی وزیر ریلوے نے مزید کہاکہ ہر تین سال میں ایک مرتبہ معیشت میں سست روی پیدا ہوتی ہے اور اس میں بہت جلد بہتری پیدا ہوجاتی ہے۔ لیکن چند افراد محض وزیراعظم نریندر مودی کی ساکھ کو متاثر کرنے کی کوشش میں ان  پر یہ الزامات عائد کررہے ہیں۔