غزہ ،13نومبر :۔
اسرائیل اور حماس کے درمیان جنگ جاری ہے اور فلسطینیوں کی شہادت میں مستقل اضافہ درج کیا جا رہا ہے۔غزہ پٹی پر 7 اکتوبر سے تنازع شروع ہونے کے بعد سے اسرائیلی حملوں میں شہید ہونے والے فلسطینیوں کی تعداد 11,180 ہو گئی ہے۔
غزہ حکومت کے میڈیا آفس کے ڈائریکٹر اسماعیل الثوابط نے شفا میڈیکل کمپلیکس میں ایک نیوز کانفرنس میں بتایا کہ اب تک کل مرنے والوں میں 4,609 بچے اور 3,100 خواتین شامل ہیں جب کہ 28,000 سے زیادہ زخمی ہیں۔ الثوابط نے کہا کہ غزہ میں 22 اسپتالوں اور 49 مراکز صحت نے اسرائیلی حملوں اور پاور جنریٹرز کو چلانے کے لیے درکار ایندھن کی کمی کی وجہ سے کام بند کر دیا ہے۔
انہوں نے اسرائیل پر شفا میڈیکل کمپلیکس کے انتہائی نگہداشت یونٹ، سرجری کی عمارت اور میٹرنٹی وارڈ پر حملے شروع کرنے کا الزام لگایا اور غزہ میں لڑائی کو روکنے اور وہاں کے لوگوں تک ایندھن سمیت تمام انسانی امداد پہنچانے کے لیے فوری عالمی کوششوں کی اپیل کی ہے۔