زرعی قوانین مخالف احتجاج: کانگریس سمیت 16 اپوزیشن جماعتوں نے جمعہ کو پارلیمنٹ میں صدر کے خطاب کا بائیکاٹ کرنے کا اعلان کیا

نئی دہلی، جنوری 28: کانگریس سمیت حزب اختلاف کی سولہ جماعتوں نے کہا ہے کہ انھوں نے نئے زرعی قوانین کے خلاف احتجاج کرنے والے کسانوں سے اظہار یکجہتی کے لیے پارلیمنٹ کے دونوں ایوانوں کی مشترکہ نشست سے صدر کے خطاب کا بائیکاٹ کرنے کا فیصلہ کیا ہے۔ صدر رام ناتھ کووند جمعہ کو مشترکہ اجلاس سے خطاب کریں گے۔

مشترکہ بیان میں فریقین نے کہا کہ وزیر اعظم نریندر مودی اور بھارتیہ جنتا پارٹی کی حکومت کسانوں کی طرف سے زرعی قوانین کو مسترد کرنے کے مطالبے کے ردعمل میں ’’متکبر، اٹل اور غیر جمہوری‘‘ رہی ہے۔ فریقین نے تینوں متنازعہ قوانین کو واپس لینے کا مطالبہ بھی کیا۔

The Congress party & 15 other Opposition parties have decided to boycott the President’s address to Parliament on 29th Jan 2021 in solidarity with the farmers of India.

Here is the joint statement: pic.twitter.com/mJo9Q4fXyd

— Congress (@INCIndia) January 28, 2021

بیان میں کہا گیا ہے کہ ’’تینوں زرعی قوانین ریاستوں کے حقوق پر حملہ ہیں اور آئین کے وفاقی جذبے کی خلاف ورزی کرتے ہیں۔ اگر انھیں منسوخ نہیں کیا گیا تو یہ قوانین قومی فوڈ سیکیورٹی کی عمارت کو مؤثر طریقے سے ختم کردیں گے، جو ایم ایس پی ، سرکاری خریداری اور عوامی تقسیم کے نظام پر قائم ہے۔‘‘

فریقین نے کہا کہ زرعی بلوں کو ریاستوں یا کسانوں کی یونین سے مشاورت کیے بغیر لایا گیا تھا اور اس میں ملک گیر اتفاق رائے کا فقدان ہے۔ بیان میں کہا گیا ہے کہ ’’پارلیمنٹری جانچ پڑتال کو نظرانداز کیا گیا اور پارلیمنٹری قواعد، طریقوں اور کنونشنوں کی بے دریغ خلاف ورزی کرتے ہوئے اور اپوزیشن کا مذاق اڑاتے ہوئے ان قوانین کو آگے بڑھایا گیا۔ ان قوانین کی آئینی صداقت اب بھی زیربحث ہے۔‘‘

حزب اختلاف کی جماعتوں نے یہ بھی الزام لگایا کہ یوم جمہوریہ کے موقع پر کسانوں کی ٹریکٹر ریلی کے دوران ہونے والے تشدد کو جنم دینے میں مرکزی حکومت کی ایجنسیوں کا کردار ہے۔ انھوں نے واقعے کی غیرجانبدار تحقیقات کا مطالبہ کیا ہے۔ ان کا کہنا تھا کہ یہ کسان احتجاج منگل کے واقعہ کے سوا زیادہ حد تک پرامن رہا ہے۔

انھوں نے کہا کہ جب کہ اپنے احتجاج کے دوران کسان سرد اور تیز بارش کا سامنا کر رہے تھے، تو مرکز بے قابو رہا اور واٹر کینن، آنسو گیس اور لاٹھی چارج سے انھیں جواب دیا۔

انھوں نے الزام لگایا کہ ’’حکومت کے زیر اہتمام ڈس انفارمیشن کمپین کے ذریعے جائز عوامی تحریک کو بدنام کرنے کی ہر ممکن کوشش کی گئی ہے۔‘‘