نئی دہلی، 13 جولائی: کانگریس کے رہنما راہل گاندھی نے ایک گراف شیئر کرتے ہوئے کوویڈ-19 سے لڑنے کے حکومتی دعوؤں پر سوال اٹھائے، جس میں دعوی کیا گیا تھا کہ وائرس کے خلاف جنگ میں ہندوستان ’’اچھی پوزیشن‘‘ میں ہے۔
واضح رہے کہ مرکزی وزیر داخلہ امت شاہ نے کہا تھا کہ وبائی مرض کے خلاف جنگ میں ہندوستان ایک اچھی پوزیشن میں ہے اور اسی عزم اور جوش و جذبے کے ساتھ ملک اس بیماری کا مقابلہ کرے گا۔
ایک ٹویٹ میں گاندھی نے گراف شیئر کرتے ہوئے پوچھا ’’کیا کوویڈ-19 کے خلاف جنگ میں ہندوستان اچھی پوزیشن پر ہے؟؟‘‘
"India at good position in #COVID19 battle?” pic.twitter.com/HAJz7En6Wo
— Rahul Gandhi (@RahulGandhi) July 13, 2020
انھوں نے ہندوستان میں کورونا وائرس کے بڑھتے معاملات کے یومیہ اوسط کا ایک گراف منسلک کیا، جس میں جنوبی کوریا اور نیوزی لینڈ جیسے دوسرے ممالک کے مقابلے میں ہندوستان میں معاملات میں مستقل اضافہ دیکھا گیا ہے۔
معلوم ہو کہ مرکزی وزارت صحت کے مطابق ملک میں اب تک وائرس کی وجہ سے مرنے والوں کی تعداد 23،174 تک جا پہنچی ہے، جب کہ آج صبح تک گذشتہ 24 گھنٹوں کے دوران 28،701 نئے معاملات کے ریکارڈ اضافے کے ساتھ متاثرین کی مجموعی تعداد 8،78،254 ہوگئی۔